ଢେଙ୍କାନାଳ ୨୭/୫: ଢେଙ୍କାନାଳ ଜିଲ୍ଲା ଗଁନ୍ଦିଆ ଥାନା ଅନ୍ତର୍ଗତ କୋକେଇଦା ଗାଁରେ ଶ୍ରୀ ଜଗନ୍ନାଥ ଆଗ୍ରୋଭେଟ ନାମକ ଏକ କୁକୁଡ଼ା ଫାର୍ମ ମାଲିକଙ୍କ ପକ୍ଷରୁ ଜଙ୍ଗଲ ଜମି ଦଖଲକୁ ନେଇ ବ୍ୟାପକ ଉତ୍ତେଜନା ପ୍ରକାଶ ପାଇଛି । ଏପରିକି କଟକ ନଖରା ଅଂଚଳର କିଛି ଯୁବକଙ୍କୁ ଦୁଇଟି ଗାଡ଼ିରେ ନେଇ କୁକୁଡ଼ା ଫାର୍ମ ମାଲିକ କୋକେଇଦା ଗ୍ରାମରେ ଆତଙ୍କ ସୃଷ୍ଟି କରିଛନ୍ତି । ଏହି ଯୁବକମାନେ ଗ୍ରାମବାସୀଙ୍କ ଉପରକୁ ବୋମା ମାଡ଼ କରିଥିବା ଜଣାପଡ଼ିଛି । ଫଳରେ ଅଜୟ ଦେହୁରୀ ନାମକ ଜଣେ ଯୁବକ ଆହତ ହୋଇଛନ୍ତି ।
ଗ୍ରାମବାସୀ ଏହି ଆକ୍ରମଣକାରୀ ଯୁବକମାନଙ୍କ ସହ ମୁହାଁମୁହିଁ ହୋଇଛନ୍ତି । ଏହାକୁ ନେଇ କୋକେଇଦା ଗ୍ରାମରେ ତୀବ୍ର ଉତ୍ତେଜନା ପ୍ରକାଶ ପାଇଛି । ଆକ୍ରମଣକାରୀଙ୍କ ମଧ୍ୟରୁ ୪ ଜଣ ସ୍କର୍ପିଓରେ ଖସି ପଳାଇଥିବା ବେଳେ ଏକ ସ୍ୱିଫ୍ଟ କାରରେ ଆସିଥିବା ଦୁଇ ଜଣଙ୍କୁ ଗ୍ରାମବାସୀ କାବୁ କରିଛନ୍ତି । ଖବର ପାଇଁ ଘଟଣାସ୍ଥଳରେ ଗଁନ୍ଦିଆ ପୋଲିସ ପହଞ୍ଚି କାରକୁ ଜବତ କରିଥିବା ସହ କାବୁ ହୋଇଥିବା ଦୁଇ ଯୁବକଙ୍କୁ ଅଟକ ରଖିଛି ।
ଏ ସମ୍ପର୍କରେ ପୋଲିସ ତଦନ୍ତ ଆରମ୍ଭ କରିଛି । ଏହି କୋକେଇଦା ଗ୍ରାମରେ କଟକ ନଖରା ଅଂଚଳର ଜଣେ ବ୍ୟକ୍ତି ଶ୍ରୀ ଜଗନ୍ନାଥ ଆଗ୍ରଭେଟ ନାମକ ଏକ କୁକୁଡ଼ା ଫାର୍ମ ତିଆରି କରିଥିବା ଜଣାପଡିଛି । ପୂର୍ବରୁ ସରକାରୀ ଜମିରେ ଗଛ ଲଗାଇ ସୃଷ୍ଟି କରିଥିବା ଜଙ୍ଗଲକୁ କାଟି ରାସ୍ତା ନେବାକୁ ଦାବି କରୁଥିଲା କୁକୁଡ଼ା ଫାର୍ମ ମାଲିକ। ତେବେ ଏହାକୁ ଗ୍ରାମବାସୀ ଦୀର୍ଘ ବର୍ଷ ହେଲା ବିରୋଧ କରି ଆସୁଥିଲେ । ଜଙ୍ଗଲ ଜମିକୁ ଜବର ଦଖଲ କରିବା ଉଦ୍ୟମ କରି ଗ୍ରାମବାସୀଙ୍କୁ ବିଭିନ୍ନ ସମୟରେ କୁକୁଡ଼ା ଫାର୍ମ ମାଲିକ ନାନା ଧମକ ଚମକ ଦେଇ ଆସୁଥିଲେ । ଏହା ସହ ଆଜି ଭଡ଼ାଟିଆ ଗୁଣ୍ଡାମାନଙ୍କୁ ଧରି କୁକୁଡ଼ା ଫାର୍ମ ମାଲିକ ଗାଁରେ ବୋମାମାଡ କରିବା ସହ ଗ୍ରାମବାସୀଙ୍କୁ ଭୟଭୀତ କରିବାକୁ ଚେଷ୍ଟା କରିଥିବା ଅଭିଯୋଗ ହୋଇଛି।
