ଭୁବନେଶ୍ବର ୭|୪ : ରାୟଗଡାରେ ଆଜି ନିର୍ବାଚନ ପ୍ରଚାର କରୁଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ରାୟଗଡାର ଗୁଣୁପୁର ଏବଂ ବିଷମ କଟକରେ ପ୍ରଚାର ବେଳେ ପୁଣି କେନ୍ଦ୍ରକୁ ଟାର୍ଗେଟ୍ କରିଛନ୍ତି ନବୀନ । ଗୁଣପୁର ବସନ୍ତ ପଡିଆରେ ଏକ ସାଧାରଣ ସଭାରେ ଯୋଗ ଦେଇ ରାଜ୍ୟ ସରକାରଙ୍କ ବିଭିନ୍ନ ଲୋକାଭିମୁଖୀ ଯୋଜନା ବିଷୟରେ କହିବା ସହ କେନ୍ଦ୍ରକୁ ସମାଲୋଚନା କରିଛନ୍ତି । କେନ୍ଦ୍ର ଅବହେଳା ସହ ବିପର୍ଯ୍ୟୟ ସମୟରେ ସହାୟତା ଦେଇନଥିବା କେନ୍ଦ୍ର ସରକାର ଭୋଟ୍ ଆସିଲେ କେବଳ ଓଡିଶାକୁ ଆସନ୍ତି ବୋଲି ସେ କହିଛନ୍ତି ।
ଏହା ସହିତ ଜୀବନର ଶେଷ ପର୍ଯ୍ୟନ୍ତ ଓଡିଶାବାସୀଙ୍କ ସେବା କରିବେ ବୋଲି ନିଜ ପ୍ରତିଶ୍ରୁତି ଦୋହରାଇଛନ୍ତି ନବୀନ । ଏହି ଅବସରରେ ଗୁଣପୁର ବିଧାନସଭା ପ୍ରାର୍ଥୀ ରଘୁନାଥ ଗମାଙ୍ଗ ଓ କୋରାପୁଟ ଲୋକସଭା ପ୍ରାର୍ଥୀ କୌଶଲ୍ୟା ହିକକାଙ୍କୁ ଶଙ୍ଖ ଚିହ୍ନରେ ଭୋଟ ଦେବାକୁ ନିବେଦନ କରିଥିଲେ। ଏହି ସଭାରେ ଆଜି କଂଗ୍ରେସ ବିଜେପିର ବହୁ ଛାମୁଆ ନେତା ବିଜେଡିରେ ସାମିଲ ହୋଇଛନ୍ତି । ମୁଖ୍ୟମନ୍ତ୍ରୀ ଆଜି ସ୍ଥାନୀୟ ମିନି ଷ୍ଟାଡିୟମଠାରେ ଅବତରଣ କରିବା ପରେ କଡା ସୁରକ୍ଷା ମଧ୍ୟରେ ଏକ ବାଇକ୍ ଶୋଭାଯାତ୍ରାରେ ରୋଡ ସୋରେ ସହର ପରିକ୍ରମା କରି ମଞ୍ଚକୁ ଯାଇଥିଲେ।
