ନୟାଗଡ, ୧୬/୦୬: ଚୋରର ଛୁରାମାଡରେ ବଡଭାଇ ମୃତ , ସାନଭାଇ ଗୁରୁତର । ଗୁରୁତର କଟକ ସ୍ଥାନାନ୍ତର। ଏପରି ଅଭାବନୀୟ ଘଟଣା ଘଟିଛି ଖଣ୍ଡପଡା ଥାନା କାଦୁଆ ଗାଁରେ। ବାଡିରୁ କଦଳୀ ଚୋରୀ କରୁଥିବା ଚୋର ଏହି କାଣ୍ଡ ଘଟାଇଛି ।
ସୂଚନା ଅନୁସାରେ, ବୁଧବାର ସକାଳ ସମୟରେ ବେଣାଗାଡିଆ ଗାଁର କାଠିଆ ନାମକ ଜଣେ ଯୁବକ କାଦୁଆ ଗାଁର ରମେଶ ମଲ୍ଲିକଙ୍କ ବାଡିରୁ କଦଳୀ ଚୋରି କରୁଥିଲା । ଏହି ସମୟରେ ରମେଶ ପାଟି କରିବାରୁ ସେ ଦୌଡି ପଳାଇଥିଲା । ରମେଶ ଏବଂ ତାଙ୍କ ସାନଭାଇ ବାବୁଲା ଏକ ବାଇକରେ ଯାଇ କାଠିଆକୁ କିଛି ଦୂରରେ ଧରିଥିଲେ । ଉଭୟଙ୍କ ମଧ୍ୟରେ ଧସ୍ତାଧସ୍ତି ସମୟରେ କାଠିଆ ଧରିଥିବା ଛୁରିରେ ଦୁଇଭାଇଙ୍କୁ ଆକ୍ରମଣ କରି ବାଇକ୍ ନେଇ ପଳାଇଯାଇଥିଲା ।
ଦୁଇଭାଇଙ୍କୁ ଗୁରୁତର ଅବସ୍ଥାରେ ଖଣ୍ଡପଡା ମେଡିକାଲରେ ଭର୍ତ୍ତି କରିଥିଲେ ସ୍ଥାନୀୟ ଲୋକେ । ମେଡିକାଲରେ ବଡଭାଇ ରମେଶକୁ ଡାକ୍ତର ମୃତ ଘୋଷଣା କରିଥିବାବେଳେ ସାନଭାଇ ବାବୁଲାକୁ କଟକ ସ୍ଥାନାନ୍ତର କରିଛନ୍ତି । ସେପଟେ କାଠିଆ ଫତେଗଡ ଥାନା କରବର ଗଁରେ ସମ୍ପର୍କୀୟଙ୍କ ଘରେ ଲୁଚିଥିବାବେଳେ ଗ୍ରାମବାସୀ ତାକୁ ଧରି ପୋଲିସ ଜିମା ଦେଇଛନ୍ତି । ଖଣ୍ଡପଡା ପୋଲିସ ଘଟଣାର ତଦନ୍ତ ଆରମ୍ଭ କରିଛି ।
