ନୂଆଦିଲ୍ଲୀ ୨୫/୧୦ : ବ୍ୟତିବ୍ୟସ୍ତ କରିପକାଇଲାଣି କରୋନାର ଡେଲଟା ଭ୍ୟାରିଆଣ୍ଟ । ସଂକ୍ରମଣ ପୁଣି ବଢିବାରେ ଲାଗିଛି । କରୋନାର ଉତ୍ପତ୍ତି ସ୍ଥଳ ଚୀନରେ ପୁଣି ଅଣାୟତ ହେବାରେ ଲାଗିଛି କରୋନା । କୋଭିଡର ଡେଲଟା ଭ୍ୟାରିଆଣ୍ଟ ସେଠାରେ ମୁଣ୍ଡ ବିନ୍ଧାର କାରଣ ପାଲଟିଛି । ସଂକ୍ରମଣ ବୃଦ୍ଧିକୁ ଦୃଷ୍ଟିରେ ରଖି କିଛି ସ୍ଥାନରେ ପୁଣି ଲକଡାଉନ୍ ଘୋଷଣା କରାଯାଇଛି । ଏହା ସହିତ ପର୍ଯ୍ୟଟକମାନଙ୍କ ପାଇଁ କଟକଣା ଜାରି କରାଯାଇଛି । ବିଭିନ୍ନ ପର୍ଯ୍ୟଟନସ୍ଥଳୀଗୁଡିକୁ ବନ୍ଦ କରିଦିଆଯାଇଛି ।
ଚୀନର ମଙ୍ଗୋଲିୟା ସ୍ଥିତ ଏଜିନ୍ କାଉଣ୍ଟିଂ ଲୋକମାନଙ୍କୁ ଘରୁ ନବାହାରିବାକୁ କୁହାଯାଇଛି । ସେଠାରେ କରୋନା ସଂକ୍ରମଣ ପୁଣିଥରେ ବୃଦ୍ଧିପାଇବାରେ ଲାଗିଛି । ଏଜିନ୍ର ଜନସଂଖ୍ୟା ହେଉଛି ୩୫,୭୦୦ । ସେଠାରେ ଗତ ସପ୍ତାହକ ମଧ୍ୟରେ ୧୫୦ରୁ ଉର୍ଦ୍ଧ୍ବ ସଂକ୍ରମିତ ଚିହ୍ନଟ ହୋଇଛନ୍ତି । ସେଠାରେ କୋଭିଡ୍ ଗାଇଡଲାଇନ୍ ପାଳନ କରିବା ପାଇଁ ଲୋକମାନଙ୍କୁ କଡା ଚେତାବନୀ ଦିଆଯାଇଛି । ଚୀନ ସରକାରଙ୍କ ପକ୍ଷରୁ କରୋନା କଟକଣା ପାଳନ କରିବା ପାଇଁ ଜନସାଧାରଣଙ୍କୁ ଚେତାବନୀ ଦିଆଯାଇଛି ।
ମାତ୍ର ଗୋଟିଏ ସପ୍ତାହ ମଧ୍ୟରେ ଚୀନର ୧୧ ରାଜ୍ୟରେ ସଂକ୍ରମଣ ତୀବ୍ର ହେବାରେ ଲାଗିଛି । ଆସନ୍ତା କିଛି ଦିନ ମଧ୍ୟରେ ସଂକ୍ରମଣ ଆହୁରି ବଢିବା ନେଇ ଆକଳନ କରାଯାଉଛି । ତେଣୁ ଏହାକୁ ଦୃଷ୍ଟିରେ ରଖି ଚୀନର ଏଜିନ୍ ସମେତ ଅନ୍ୟ କିଛି ସହରରେ ଲକଡାଉନ୍ ଘୋଷଣା କରାଯାଇଛି । ରାଜଧାନୀ ବେଜିଂରେ ମଧ୍ୟ ସଂକ୍ରମଣ ପୁଣି ଥରେ ବୃଦ୍ଧିପାଇବା ଆରମ୍ଭ କରିଛି ।
ଚୀନର ପ୍ରସିଦ୍ଧ ପର୍ଯ୍ୟଟନସ୍ଥଳୀଗୁଡିକରେ ମଧ୍ୟ ରୋକ୍ ଲଗାଯାଇଛି । ଗାଂସୁରେ କରୋନା ସଂକ୍ରମଣ ମାମଲା ସାମ୍ନାକୁ ଆସିବା ପରେ ଭୟର ବାତାବରଣ ଦେଖିବାକୁ ମିଳିଛି । ଏହା ପରେ ସେଠାରେ ରହୁଥିବା ସମସ୍ତ ପର୍ଯ୍ୟଟକଙ୍କୁ ବିଦା କରାଯିବା ସହିତ ଗେଷ୍ଟ ହାଉସ ବନ୍ଦ କରାଯାଇଛି ଏବଂ ପର୍ଯ୍ୟଟନସ୍ଥଳୀକୁ ସମ୍ପୂର୍ଣ୍ଣ ଭାବେ ବନ୍ଦ କରିଦିଆଯାଇଛି । ଚୀନର ଇନର ମଙ୍ଗୋଲିୟାରେ ମଧ୍ୟ ସଂକ୍ରମଣ ବ୍ୟାପକ ହେବାରେ ଲାଗିଛି । ସୋମବାର ସେଠାରେ ୧୯ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ଯେତେବେଳେକି ପୂର୍ବରୁ ସେଠାରେ ଆଦୌ କରୋନା ଆକ୍ରାନ୍ତ ନଥିଲେ । ଗୋଟିଏ ଦିନରେ ଏତେ ସଂଖ୍ୟକ ଆକ୍ରାନ୍ତ ଚିହ୍ନଟ ହେବାପରେ ସଂକ୍ରମଣ ବଢିବା ନେଇ ଆଶଙ୍କା କରାଯାଉଛି । ଚୀନରେ ଡେଲଟା ଭ୍ୟାରିଆଣ୍ଟ ମାମଲା ବୃଦ୍ଧିପାଇବା ଏବେ ବିଶ୍ବବାସୀଙ୍କ ପାଇଁ ଚିନ୍ତାର କାରଣ ପାଲଟିଛି । ଆସନ୍ତା ଫେବୃଆରୀରେ ଚୀନରେ ହେବାକୁ ଥିବା ଓ୍ବିଣ୍ଟର ଅଲିମ୍ପିକ ପୂର୍ବରୁ ସଂକ୍ରମଣ ବୃଦ୍ଧି ପାଇବା ଭୟ ବଢାଇଦେଇଛି । ବିଶେଷ କରି ବାହାର ଦେଶର ଖେଳାଳି ଏବଂ ପ୍ରଶଂସକଙ୍କୁ ନେଇ ଚିନ୍ତା ବ୍ୟକ୍ତ କରିଛି ଚୀନ ସ୍ବାସ୍ଥ୍ୟ ମନ୍ତ୍ରାଳୟ
