ଲଣ୍ଡନ ୩/୭ : ପିଲାଏ ସ୍କୁଲକୁ ନ ଯିବା ପାଇଁ ବାହାନା କରିବା ସାଧାରଣ କଥା । କିନ୍ତୁ ବ୍ରିଟେନର ପିଲାମାନେ ଯାହା କରୁଛନ୍ତି ତାହା ଶୁଣିଲେ ଉଡିଯିବ ଆପଣଙ୍କ ହୋସ୍ । ଏଠାରେ ଛୋଟ ଛୋଟ ପିଲା ସେମାନଙ୍କର ନକଲି କରୋନା ପଜିଟିଭ୍ ରିପୋର୍ଟ ପ୍ରସ୍ତୁତ କରୁଛନ୍ତି । ଯାହାଫଳରେ ସେମାନେ ସ୍କୁଲକୁ ଯିବାକୁ ପଡିବନି । ଟିକଟକ୍ ଭିଡିଓରେ ଏହି ଖୁଲ୍ଲାସା ହୋଇଛି ।

ଏହି ଭିଡିଓଗୁଡିକରେ ଦେଖିବାକୁ ମିଳୁଛି ପିଲାମାନେ ବିଭିନ୍ନ ପ୍ରକାରର ତରଳ ପଦାର୍ଥ ବ୍ୟବହାର କରି ନିଜକୁ ପିଜିଟଭ ଦର୍ଶାଉଛନ୍ତି । ସୂଚନା ଅନୁଯାୟୀ, ପିଲାମାନେ କରୋନା ଟେଷ୍ଟ କିଟ୍ ଉପରେ ଲେମ୍ବୁ ରସ କିମ୍ବା ଭିନେଗାର ପକାଇ ରିପୋର୍ଟ ପଜିଟିଭ ପ୍ରସ୍ତୁତ କରୁଛନ୍ତି । ଯାହାଫଳରେ ସେମାନଙ୍କୁ ସ୍କୁଲ ଯିବାକୁ ପଡିବ ନାହିଁ । ରିପୋର୍ଟରେ କୁହାଯାଇଛି ଯେ ବ୍ରିଟେନର ପିଲାମାନେ ରାପିଡ୍ ଡାଇଗ୍ନୋଷ୍ଟିକ୍ ଟେଷ୍ଟ (ଆରଡିଟି) ସମୟରେ ଲେମ୍ବୁ ରସ କିମ୍ବା ଅନ୍ୟ ପ୍ରକାରର ତରଳ ବ୍ୟବହାର କରୁଛନ୍ତି ଏବଂ ସେମାନଙ୍କର COVID ରିପୋର୍ଟ ପଜିଟିଭ ବୋଲି କହି ବିଦ୍ୟାଳୟକୁ ପ୍ରତାରଣା କରୁଛନ୍ତି ।

ସୋସିଆଲ ମିଡିଆରେ #fakecovidtest ନାମରେ ଏଭଳି ଭିଡିଓ ଅପଲୋଡ୍ ହେଉଛି । ସମାନ ନାମ ସହିତ ଏକ ଟିକଟକ ଆକାଉଣ୍ଟ ମଧ୍ୟ ଅଛି, ଯାହାର ୨୦,୦୦୦ରୁ ଅଧିକ ଫଲୋଅର ଅଛନ୍ତି । ଭିଡିଓରେ ଦେଖାଯାଇଛି ଯେ ଅଧିକାଂଶ ଛାତ୍ର ଲେମ୍ବୁ ରସ, ଆପଲ୍ ସସ୍, କୋକା କୋଲା, ଭିନେଗାର ଏବଂ ହ୍ୟାଣ୍ଡ ସାନିଟାଇଜର ବ୍ୟବହାର କରି ଦ୍ରୁତ ଆଣ୍ଟିଜେନ୍ ପରୀକ୍ଷା କରୁଛନ୍ତି । କରୋନା ରିପୋର୍ଟ ପଜିଟିଭ ଆସିବ ଆଉ ସେମାନେ ବିଦ୍ୟାଳୟକୁ ଯିବା ଠାରୁ ମୁକ୍ତି ପାଇପାରିବେ ।

ସ୍କୁଲ ଏବଂ କଲେଜ ଲିଡର ଆସୋସିଏସନର ସାଧାରଣ ସମ୍ପାଦକ ଜିଓଫ ବାର୍ଟନ ପ୍ରତିକ୍ରିୟାରେ କହିଛନ୍ତି ଯେ ଆମେ ନିଶ୍ଚିତ ଯେ ଏହି କାର୍ଯ୍ୟରେ ବହୁତ କମ୍ ଛାତ୍ର ଜଡିତ ଅଛନ୍ତି । ତଥାପି, ପରୀକ୍ଷା କିଟ୍ ଅନାବଶ୍ୟକ ଭାବରେ ବ୍ୟବହାର ନହେବାକୁ ଯତ୍ନ ନେବାକୁ ଆମେ ପିଲାମାନଙ୍କ ପରିବାରକୁ ଅନୁରୋଧ କରିଛୁ । ସେ ଥଟ୍ଟା କରି କହିଛନ୍ତି, 'ରାସାୟନିକ ପ୍ରତିକ୍ରିୟାରେ ଆଗ୍ରହୀ ଛାତ୍ରମାନଙ୍କ ପାଇଁ ଆମେ ପରାମର୍ଶ ଦେଇଛୁ ଯେ ବିଦ୍ୟାଳୟ ଲାବୋରେଟୋରୀ ଏହା କରିବା ପାଇଁ ସର୍ବୋତ୍ତମ ସ୍ଥାନ'।