ଝାରସୁଗୁଡା ୨୭|୭: ଚିକିତ୍ସାରେ ଅବହେଳା ଯୋଗୁଁ ଶିଶୁ ମୃତ୍ୟୁ ଅଭିଯୋଗ ହୋଇଛି । ଝାରସୁଗୁଡା ସହରର ରେଳବାଇ କଲୋନୀରେ ରହୁଥିବା ଶନି ଷଣ୍ଢଙ୍କ ୯ମାସର ଶିଶୁ ପୁତ୍ର ଦେହରେ ଅସାବଧାନତା କାରଣରୁ ଗତ ୨୦ ତାରିଖରେ ଗରମ ଡାଲି ପଡି ପୋଡିଯାଇଥିଲା |
ଗୁରୁତର ଅବସ୍ଥାରେ ଶନି ନିଜର ୯ ମାସର ଶିଶୁପୁତ୍ରକୁ ମଙ୍ଗଳବଜାରରେ ଥିବା ପୁରାତନ ଡାକ୍ତରଖାନାରେ ଭର୍ତ୍ତି କରାଇଥିଲେ | ସେଠାରେ ପ୍ରାଥମିକ ଚିକିତ୍ସା ପରେ ଶିଶୁଟିକୁ ନୂତନ ଭାବେ ନିର୍ମିତ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇଥିଲେ ଡାକ୍ତର | ସେଠାରେ ଚିକିତ୍ସା ଚାଲିଥିବା ବେଳେ ଆଜି ସକାଳୁ ଶିଶୁଟିର ମୃତ୍ୟୁ ହୋଇଯାଇଥିଲା | ଫଳରେ ମୃତ ଶିଶୁପୁତ୍ରକୁ ଧରି ଡାକ୍ତରଖାନା ସମ୍ମୁଖରେ ଧାରଣାରେ ବସି ସ୍ଥାନୀୟ ଲୋକେ ଡାକ୍ତରଙ୍କ ଅବହେଳା ଯୋଗୁଁ ଏପରି ଅଘଟଣ ଘଟିଲା ବୋଲି ଅଭିଯୋଗ କରିଛନ୍ତି ।
ମୃତ ଶିଶୁଟିର ପରିବାରକୁ କ୍ଷତିପୂରଣ ଦାବି କରିଛନ୍ତି | ଏଥିସହ ମଙ୍ଗଳବଜାରରେ ଥିବା ପୁରାତନ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପୁଣି ଥରେ ପୂର୍ଣ୍ଣ କାର୍ଯ୍ୟକ୍ଷମ କରାଯିବାକୁ ଦାବି କରିଛନ୍ତି | ପ୍ରାୟ ୪ ଘଣ୍ଟା ପର୍ଯ୍ୟନ୍ତ ଏହିଭଳି ଅଭାବନୀୟ ପରିସ୍ଥିତିକୁ ଦେଖି ପୋଲିସ ଉତ୍ତେଜନାକାରୀଙ୍କ ସହ ଆଲୋଚନା କରିବା ପରେ ସେମାନେ ଡାକ୍ତରଖାନା ପରିସରରୁ ବାହାରି ଶନି ମନ୍ଦିର ଛକ ନିକଟରେ ରାସ୍ତା ରୋକ ଆରମ୍ଭ କରିଛନ୍ତି |