ଜାଲୌନ ୧୪/୦୧: ଉତ୍ତରପ୍ରଦେଶର ଜାଲୌନ ଜିଲ୍ଲାରେ ଶିଶୁ ଯୌନ ଶୋଷଣ ମାମଲାରେ ବହିଷ୍କୃତ ବିଜେପି ନେତାଙ୍କୁ ବୁଧବାର ଗିରଫ କରିଛି ପୋଲିସ। ତାଙ୍କ ପାଖରୁ ଜବତ ହୋଇଥିବା ଲାପଟପ, ଡିଭିଡି ଓ ହାର୍ଡ ଡିସ୍କରୁ ଅନେକ ଗୁଡ଼ିଏ ଅଶ୍ଳୀଳ ଭିଡିଓ ମିଳିଛି । ଭଗତ ସିଂହ ନଗରରୁ ଶିଶୁ ଯୌନ ଶୋଷଣ ମାମଲାରେ ଗିରଫ ହୋଇଥିବା ରାମବିହାରୀ ରାଠୋର ଘରୁ ଜବତ ହୋଇଥିବା ଲାପଟପ୍, ଡିଭିଡି ଓ ହାର୍ଡ ଡିସ୍କରୁ ୧୫ର-୨୦ ଅଶ୍ଳୀଳ ଭିଡିଓ ମିଳିଛି। ଏହି ସବୁ ଭିଡିଓରେ ଭିନ୍ନ ଭିନ୍ନ ଶିଶୁଙ୍କ ସହ ଅଭିଯୁକ୍ତ କରିଥିବା ଦୁଷ୍କର୍ମର ଚିତ୍ର ଦେଖିବାକୁ ମିଳିଛି ବୋଲି କୋଞ୍ଚ କୋତବାଲି ଏସଏଚଓ ଇମରାନ ଖାନ କହିଛନ୍ତି।
ରାଠୋର ପ୍ରଥମେ ଛୋଟ ଛୋଟ ଝିଅଙ୍କୁ ଟଙ୍କା ଲୋଭ ଦେଖାଇ ନିଜ ଆଡ଼କୁ ଆକୃଷ୍ଟ କରାଉଥିଲା। ପରେ ସେମାନଙ୍କର ଯୌନ ଶୋଷଣ କରି ଭିଡିଓ କରୁଥିଲା । ଏପରିକି ସେ ଛୋଟ ଝିଅମାନଙ୍କୁ ଧମକାଇ ଦୁଷ୍କର୍ମ କରୁଥିବା ମଧ୍ୟ ଏସଏଚଓ କହିଛନ୍ତି। ରାଠୋରକୁ ବୁଧବାର ଜେଲ ପଠାଯାଇଥିବା ବେଳେ ପୋଲିସ ମାମଲାର ଅଧିକ ଯାଞ୍ଚ କରୁଛି।
ତେବେ ଗିରଫ ଅଭିଯୁକ୍ତ ରାମବିହାରୀ ରାଠୋର କୋଞ୍ଚର ବିଜେପି ନଗର ପାଳିକା ଅଧ୍ୟକ୍ଷ ଥିଲା ବୋଲି ଜାଲୌନ ବିଜେପି ଜିଲ୍ଲାଧ୍ୟକ୍ଷ କହିଛନ୍ତି। କିନ୍ତୁ ଶିଶୁ ଯୌନ ଶୋଷଣ ମାମଲାରେ ଗିରଫ କରାଯିବା ପରେ ତାକୁ ପାର୍ଟିର ପ୍ରାଥମିକ ସଦସ୍ୟ ପଦରୁ ବହିଷ୍କାର କରାଯାଇଛି ବୋଲି ସେ କହିଛନ୍ତି।
