ନୂଆଦିଲ୍ଲୀ ୧୫।୬: କେନ୍ଦ୍ର ସରକାରଙ୍କ କର୍ମଚାରୀ, ଅଭିଯୋଗ ଓ ପେନସନ୍ ବିଭାଗ କର୍ମଚାରୀଙ୍କ ଲାଗି ନୂଆ ନିର୍ଦ୍ଦେଶନାମା ଜାରି କରିଛନ୍ତି। ଏଥିରେ ଅନୁ ସଚିବ (ଅଣ୍ଡରସେକ୍ରେଟାରୀ) ପଦବୀରୁ ଆରମ୍ଭ କରି ନିମ୍ନ ପାହ୍ୟାର ସବୁ ଅଧିକାରୀଙ୍କୁ ଜୁନ ୧୬ରୁ ନିୟମିତ ଅଫିସ ଆସିବାକୁ ନିର୍ଦ୍ଦେଶ ଦିଆଯାଇଛି। ତେବେ ଏଥିରୁ ଗର୍ଭବତୀମହିଳା କର୍ମଚାରୀ ଓ କଣ୍ଟେନମେଣ୍ଟ ଜୋନରେ ରହୁଥିବା କର୍ମଚାରୀଙ୍କୁ ବାଦ ଦିଆଯାଇଛି।
ଜୁନ ୩୦ ପର୍ଯ୍ୟନ୍ତ ଅଧିକାରୀ ଓ କର୍ମଚାରୀଙ୍କୁ ସମସ୍ତ କାର୍ଯ୍ୟଦିବସରେ କାର୍ଯ୍ୟାଳୟରେ ଉପସ୍ଥିତ ରହିବାକୁ କୁହାଯାଇଛି। ଏହି ସମୟରେ କାର୍ଯ୍ୟାଳୟରେ କଡାକଡି କୋଭିଡ କଟକଣା ପାଳନ ଯେପରି ୨ ଗଜ ଦୂରତା, ବାରମ୍ବାର ହାତ ଧୋଇବା ଓ ସାନିଟାଇଜରର ବ୍ୟବହାର ଜରୁରି କରାଯାଇଛି। କର୍ମଚାରୀ କାର୍ଯ୍ୟାଳୟ ଆସିଲେବି ଏକାଠି ହୋଇ ଆଳାପ ଆଲୋଚନା କରିବା ଅଥବା ଭିଡ ଜମାଇବା ଉପରେ ବିଭାଗ କଟକଣାଲାଗୁ କରିଛନ୍ତି।
ଦେଶର ବିଭିନ୍ନ ରାଜ୍ୟରେ କରୋନା ସଂକ୍ରମଣ ହ୍ରାସ ହେବା ପରେ ବିଭାଗ ପକ୍ଷରୁ ଅଧିକାରୀ ଓ କର୍ମଚାରୀଙ୍କୁ କାର୍ଯ୍ୟାଳୟରେ ଯୋଗ ଦେବାକୁ ନିର୍ଦ୍ଦେଶ ଦେଇଛନ୍ତି। ତେବେ କର୍ମଚାରୀଙ୍କର ଏବେ ବାୟୋମେଟ୍ରିକ ଉପସ୍ଥାନ ଗ୍ରହଣ କରାଯିବନି। କିଛି ସମୟ ପର୍ଯ୍ୟନ୍ତ ରେଜିଷ୍ଟରରେ କର୍ମଚାରୀଙ୍କୁ ସ୍ୱାକ୍ଷର କରି କାର୍ଯ୍ୟାଳୟରେ ପ୍ରବେଶ କରିବାକୁ ପଡିବ ବୋଲି କୁହାଯାଇଛି।
ଅଧିକାରୀ ଓ କର୍ମଚାରୀଙ୍କୁ କାର୍ଯ୍ୟାଳୟକୁ ସେମାନଙ୍କ ସିଫ୍ଟ ଅନୁଯାରେ ଆସିବାକୁ କୁହାଯାଇଛି। ପ୍ରଥମସିଫ୍ଟ ପୂର୍ବାହ୍ନ ୯ଟାରୁ ଅପରାହ୍ନ ୫ଟା ୩୦, ଦ୍ୱିତୀୟ ସିଫ୍ଟ ପୂର୍ବାହ୍ନ ସାଢେ ୯ଟାରୁ ସନ୍ଧ୍ୟା ୬ଟା ଓ ତୃତୀୟ ସିଫ୍ଟ ପୂର୍ବାହ୍ନ ୧୦ଟାରୁ ସନ୍ଧ୍ୟା ସାଢେ ୬ ପର୍ଯ୍ୟନ୍ତ ନିୟମିତ ଚାଲିବ ବୋଲି ନିର୍ଦ୍ଦେଶନାମାରେ କୁହାଯାଇଛି। ତେବେ କଣ୍ଟେନମେଣ୍ଟ ଜୋନରେ ରହୁଥିବା କର୍ମଚାରୀ ନିୟମ କୋହଳ ନ ହେବା ପର୍ଯ୍ୟନ୍ତ ଅଫିସକୁ ଆସିବେ ନାହିଁ। ହେଲେଏହି ସମୟରେ ୱାର୍କଫ୍ରମ ହୋମ କରିବେ। ଏଥିଲାଗି ସେତାଙ୍କର ସମସ୍ତ ଇଲେକ୍ଟ୍ରୋନିକ ଯୋଗାଯୋଗ ଉପକରଣରେ ଉପଲବ୍ଧ ରହିବାକୁ କୁହାଯାଇଛି।