ଭୁବନେଶ୍ୱର ୨୬/୧୨: ରାଜଧାନୀରେ ସେକ୍ସ ରାକେଟ୍ ଚେର ମାଡି ମାଡି ଚାଲିଛି । ବାଂଲା ଦେଶରୁ ୧୫୦ରୁ ଅଧିକ କଲ ଗର୍ଲଙ୍କୁ ବେଆଇନ ଭାବେ ଅଣାଯାଇ ଏହି କଳାକାରନାମରେ ଲଗାଯାଉଛି । ସହର ବାହାରେ ଓ ଉପକଣ୍ଠରେ ଥିବା ଆପାର୍ଟମେଣ୍ଟମାନଙ୍କରେ ଚାଲିଛି ଏହି କାର୍ଯ୍ୟ ।
ଲକ୍ଷ୍ମୀସାଗର ଥାନା ପୁଲିସ୍ ଜଣେ ବାଂଲାଦେଶୀ ଯୁବତୀକୁ ଗିରଫ କରିଥିଲା । ଯୁବତୀଙ୍କୁ ଜେରା କରି ଅନେକ ବିସ୍ଫୋରକ ତଥ୍ୟ ପାଇଛି ପୁଲିସ୍ ।
ନୂଆବର୍ଷକୁ ଟାର୍ଗେଟ୍ କରି ଦଲାଲ୍ମାନେ ୧୫୦ରୁ ଅଧିକ ବାଂଲାଦେଶୀ ଯୁବତୀଙ୍କୁ ଭୁବନେଶ୍ୱର ଆଣିଛନ୍ତି ।
ବିଭିନ୍ନ ସ୍ଥାନରେ ଲୁଚାଇ ରଖି ବେପାର ଆରମ୍ଭ କରିଛନ୍ତି ।
ରାତିଟେ କଟାଇବା ପାଇଁ ଦାମ୍ ୪ ହଜାରରୁ ୩୦ ହଜାର ପର୍ଯ୍ୟନ୍ତ ରଖିଛନ୍ତି ।
ଏହା ଜାଣିବା ପରେ କମିଶନରେଟ୍ ପୁଲିସର ଭାଳେଣି ପଡ଼ିଛି ।
କେଉଁପଟୁ କେମିତି କାର୍ଯ୍ୟାନୁଷ୍ଠାନ ଆରମ୍ଭ କରିବ ତାହାର ଖିଅ ପାଉନି ପୁଲିସ ।
ସଂପୃକ୍ତ ବାଂଲାଦେଶୀ ଯୁବତୀଙ୍କ ଫୋନ୍ କଲ ଯାଞ୍ଚ କରି ପୁଲିସ୍ ଅନେକ ତଥ୍ୟ ପାଇଛି।
ଯୁବତୀଙ୍କ କିଛି ନିୟମିତ ଗ୍ରାହକଙ୍କ ନମ୍ବର ମଧ୍ୟ ପୁଲିସ୍ ପାଇଛି ।
ତା’ଛଡା କିଛି ଭଏସ ରେକର୍ଡିଂ, ଅଶ୍ଳୀଳ ସେଲ୍ଫି ଓ ଭିଡିଓ ହାତରେ ଲାଗିଛି । ଗିରଫ ଯୁବତୀଙ୍କ ସହିତ ନ୍ୟୁ ଆଶୀର୍ବାଦ ହୋଟେଲ୍ରେ ଆଉ ୪ ଜଣ ବାଂଲା ଯୁବତୀ ଥିଲେ । ସେମାନେ ଫେରାର ହୋଇ ଯାଇଛନ୍ତି। ବଡ଼ କଥା ହେଲା ଯେଉଁ ଦଲାଲ୍ ଏମାନଙ୍କୁ ଏଠାକୁ ଆଣିଥିଲା ସିଏ ନୂଆବର୍ଷରେ ବେପାର ଜମାଇବା ଲାଗି ଦେଢ଼ ଶହ ଯୁବତୀଙ୍କୁ ଭୁବନେଶ୍ୱରକୁ ଆଣିଛନ୍ତି ।
ବିଶେଷ କରି ଏହି ବାଂଲାଦେଶୀ ରୂପଜୀବୀମାନେ ତାରକା ହୋଟେଲ୍ରେ ଡେରା ପକାଇଛନ୍ତି । ୪ ହଜାର ଟଙ୍କାରୁ ଆରମ୍ଭ କରି ୩୦ ହଜାର ଟଙ୍କା ପର୍ଯ୍ୟନ୍ତ ଦର ରହିଛି ।
ଯଦି କୌଣସି ଗ୍ରାହକ ରୂପଜୀବୀଙ୍କୁ ସାଙ୍ଗରେ ଧରି ବିଭିନ୍ନ ଆଡ଼େ ବୁଲିବାକୁ ଚାହିଁବେ ତାହାର ସୁବିଧା ବି ରହିଛି । ସେଥିପାଇଁ ଅଲଗା ଦାମ ଦେବାକୁ ପଡ଼ିବ । ଜଣେ ରୂପଜୀବୀଙ୍କୁ ଯଦି ଏକାଧିକ ବ୍ୟକ୍ତି ନେବାକୁ ଚାହିଁବେ ତେବେ ରାତିକୁ ୩୦ ହଜାର ଟଙ୍କା ଦେବାକୁ ପଡିବ । ନୂଆବର୍ଷ ବେପାର ପୂର୍ବରୁ କାଳେ ପୁଲିସ୍ ଯୁବତୀମାନଙ୍କୁ ଧରି ଦେବ ସେଥିପାଇଁ ଦଲାଲମାନେ ସତର୍କ ରହିଛନ୍ତି । ଯୁବତୀଙ୍କୁ ବିଭିନ୍ନ ବାର୍ ଓ ସ୍ପା’ରେ କାମ କରିବାକୁ ନିୟୋଜିତ କରିଛନ୍ତି । ଏହି ରୂପଜୀବୀମାନେ ବାଂଲାଦେଶରୁ ପ୍ରଥମେ କୋଲକତା ଓ ସେଠାରୁ ଭୁବନେଶ୍ୱର ସମେତ ଅନ୍ୟ ସହରକୁ ଆସୁଛନ୍ତି ।
