ନୂଆଦିଲ୍ଲୀ ୮।୭: କେନ୍ଦ୍ର ସରକାର ବ୍ୟବସାୟୀ ଓ କର୍ମଚାରୀଙ୍କ ଲାଗି ଏମ୍ପ୍ଲଇ ପ୍ରେଭିଡେଣ୍ଟ ଫଣ୍ଡ (ଇପିଏଫ)ରେ ୨୪ ପ୍ରତିଶତ ସହାୟତା ଅଧିକ ୩ ମାସ ପର୍ଯ୍ୟନ୍ତ ସମ୍ପ୍ରସାରିତ କରିଛନ୍ତି। ପ୍ରଧନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବୁଧବାର ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ବୈଠକରେ ଏହି ନିଷ୍ପତ୍ତି ହୋଇଛି। କ୍ୟାବିନେଟ୍ ଇପିଏଫ ଅଂଶଦାନ ଅର୍ଥାତ କର୍ମଚାରୀଙ୍କ ୧୨ ଓ ନିୟୋଜକଙ୍କ ୧୨ ମୋଟ ୨୪ ପ୍ରତିଶତ ସରକାର ଆଉ ୩ ମାସ ପର୍ଯ୍ୟନ୍ତ ପୈଠ କରିବେ ବୋଲି ନିଷ୍ପତ୍ତି ହୋଇଥିବା ବୈଠକ ପରେ କେନ୍ଦ୍ର ମନ୍ତ୍ରୀ ପ୍ରକାଶ ଜାବଡେକର କହିଛନ୍ତି।
ଜାବଡେକର କହିଛନ୍ତି ଯେ ଇପିଏଫ ଅଂଶଦାନ ବାବଦେ ସରକାର ୪ ହଜାର ୮୬୦ କଟି ଟଙ୍କା ପୈଠ କରାଯିବ। ସରକାରଙ୍କ ଏହି ନିଷ୍ପତ୍ତି ଦେଶର ୩.୬୭ ଲକ୍ଷ ନିଯୁକ୍ତିଦାତା ଓ ୭୨ ଲକ୍ଷ କର୍ମଚାରୀଙ୍କୁ ଆଶ୍ୱସ୍ତ କରିବ ବୋଲି ଜାବଡେକର ଆଶାବ୍ୟକ୍ତ କରିଛନ୍ତି। କେନ୍ଦ୍ର ସରକାରଙ୍କ ଗରିବ କଲ୍ୟାଣ ପ୍ୟାକେଜ୍ ଅନ୍ତର୍ଗତ ଯେଉଁ କମ୍ପାନୀ ୧୦୦ ଜଣ କର୍ମଚାରୀଙ୍କୁ ନିଯୁକ୍ତି ଦେଇଛନ୍ତି ଓ କର୍ମଚାରୀଙ୍କ ସର୍ବାଧିକ ବେତନ ୧୫ ହଜାରରୁ କମ୍ ସେ କ୍ଷେତ୍ରରେ ସରକାର ଉଭୟ କମ୍ପାନୀ ଓ କର୍ମଚାରୀଙ୍କ ୨୪ ପ୍ରତିଶତ ଅଂଶ ଧନ ନିଜେ ବହନ କରିଛନ୍ତି।
ଅନୁଷ୍ଠିତ କ୍ୟାବିନେଟ୍ ବୈଠକରେ ସାର୍ବଜନିକ କ୍ଷେତ୍ରର ଓରିଏଣ୍ଟାଲ ଇନସ୍ୟୁରାନ୍ତ କମ୍ପାନୀ ଲିମିଟେଡ, ନ୍ୟାସନାଲ ଇନସ୍ୟୁରେନ୍ସ କମ୍ପାନୀ ଲିମିଟେଡ ଓ ୟୁନାଇଟେଡ ଇଣ୍ଡିଆ ଇନସ୍ୟୁରେନ୍ସ କମ୍ପାନୀ ଲିମିଟେଡ୍ ଲାଗି ୧୨ ହଜାର ୪୫୦ କୋଟି ଟଙ୍କାର ପୁଞ୍ଜିଗତ ନିବେଶକୁ ମଧ୍ୟ ମଞ୍ଜୁରି ଦିଆଯାଇଛି।