ନୂଆଦିଲ୍ଲୀ ୨୩।୦୮: ରାକେଶ ଆସ୍ଥାନାଙ୍କ ସୀମା ସୁରକ୍ଷା ବଳ(ବିଏସଏଫ)ର ପୂର୍ଣ୍ଣକାଳୀନ ମହାନିର୍ଦ୍ଦେଶକ ଭାବେ ପଦଭାର ସମ୍ଭାଳିବା ପରେ ବିଏସଏଫରେ ବୈଷୟିକ ଭାବେ ଢାଞ୍ଚାଗତରେ ପରିବର୍ତ୍ତନ ଆରମ୍ଭ ହୋଇ ଯାଇଛି। ଏହି ଆଧାରରେ ବିଏସଏଫ ପାଇଁ ୪୩୬ ଛୋଟ ଏବଂ ସୂକ୍ଷ୍ମ ଡ୍ରୋନ, ଭାରତ-ପାକିସ୍ତାନ ସୀମାରେ ଆଣ୍ଟି ଡ୍ରୋନ ସିଷ୍ଟମ ପାଇଁ ମଞ୍ଜୁରୀ ଦିଆଯାଇଛି। ଏହି ସିଷ୍ଟମ ପଞ୍ଜାବ, ଜାମ୍ମୁ ଓ କାଶ୍ମୀରରେ ଆତଙ୍କବାଦୀଙ୍କ ପାଇଁ ଅସ୍ତ୍ର ଶସ୍ତ୍ର ପରିବହନ କରୁଥିବା ଡ୍ରୋନକୁ ମଧ୍ୟ ମାରି ତଳେ ଖସାଇବାକୁ ସକ୍ଷମ।
ବ୍ୟାପକ ଏକୀକୃତ ସୀମା ପ୍ରବନ୍ଧନ(CIBM) ଯୋଜନା ଆଧାରରେ ପାକିସ୍ତାନ ଓ ବାଂଲାଦେଶ ସଂଲଗ୍ନ ସୀମାରେ ବିଏସଏଫ ଦ୍ଵାରା ସଞ୍ଚାଳିତ ସମସ୍ତ ୧୯୨୩ ସୀମା ପୋଷ୍ଟକୁ ସେନସର, ସିସିଟିଭି ଓ ଡ୍ରୋନ ଫିଡରେ ସୁସଜ୍ଜିତ କରାଯିବ। ଯାହା ଫଳରେ ୧୫୦୦ ଶିବିର ସୀମାର ରେକି କରିବା ଏବଂ ଆଣ୍ଟି ଡ୍ରୋନ ସିଷ୍ଟମର ବ୍ୟବହାର କରିବାରେ ସକ୍ଷମ ହେବେ।
ଗୃହ ମନ୍ତ୍ରଣାଳୟର ବରିଷ୍ଠ ଅଧିକାରୀଙ୍କ ଅନୁଯାୟୀ, ଛୋଟ ଓ ସୂକ୍ଷ୍ମ ଡ୍ରୋନର ମୂଲ୍ୟ ୮୮ କୋଟି ଟଙ୍କା ରହିଛି। ସୁରକ୍ଷା ଏଜେନ୍ସିର ସାହାଯ୍ୟରେ ବିଏସଏଫ ବର୍ତ୍ତମାନ ସମ୍ବେଦନଶୀଳ ପଞ୍ଜାବ ସୀମାରେ ସ୍ଵଦେଶୀ ଆଣ୍ଟି ଡ୍ରୋନ ସିଷ୍ଟମର ପରୀକ୍ଷଣ କରୁଛି। ଗତ ଏକ ବର୍ଷରେ ପାକିସ୍ତାନରେ ଖଲିସ୍ତାନ ଆତଙ୍କବାଦୀ ଓ ଜାମ୍ମୁ-କାଶ୍ମୀରରେ ଜିହାଦିଙ୍କୁ ରାଇଫଲ, ପିସ୍ତଲ ଓ ଗ୍ରେନେଡ ପହଞ୍ଚାଇବା ପାଇଁ ଚୀନ ଡ୍ରୋନର ବ୍ୟବହାର କରାଯାଉଛି। ଏହାକୁ ବିଏସଏଫ ଯବାନ ଅନେକ ଥର ପଣ୍ଡ କରି ସାରିଲେଣି।