କୋଏମ୍ବାଟୁର ୩୦/୧୦: ତାମିଲନାଡୁର କୋଏମ୍ବାଟୁରରେ ନ୍ୟାସନାଲ୍ ଏଲିଜିବିଲିଟି କମ୍ ଏଣ୍ଟ୍ରାସ୍ ଟେଷ୍ଟ (ନୀଟ୍)ର ଫଳାଫଳ କଣ ହେବ ଏନେଇ ଚିନ୍ତାରେ ପୁଣି ଜଣେ ୨୦ ବର୍ଷୀୟ ଯୁବକ ଆତ୍ମହତ୍ୟା କରିଛନ୍ତି । ରାଜ୍ୟରେ ପୁଣି ଜଣେ ମେଡିକାଲ ଆଶାୟୀ ଆତ୍ମହତ୍ୟା ଖବର ଚାଞ୍ଚଲ୍ୟ ଖେଳାଇଛି। କୋଏମ୍ବାଟୁରର ସଙ୍ଗରାୟପୁରମ ବାସିନ୍ଦା କେ. କିର୍ତ୍ତୀବାସନ ନାମକ ଜଣେ ଯୁବକ ସେପ୍ଟେମ୍ବରରେ ହୋଇଥିବା ନୀଟ୍ ପରୀକ୍ଷାରେ ଅଂଶଗ୍ରହଣ କରିଥିଲେ। ଏହାର ପରିଣାମ କିଛି ଦିନ ମଧ୍ୟରେ ଆସିବାର ଅଛି ।
ଏହା ତାଙ୍କର ତୃତୀୟ ପ୍ରୟାସ ଥିଲା ଏବଂ ଏହାକୁ ନେଇ ସେ ଚିନ୍ତିତ ଥିଲେ। ପୋଲିସର କହିବା ଅନୁଯାୟୀ, ଏହା ପୂର୍ବରୁ କିର୍ତ୍ତୀନିବାସ ୨୦୧୯ ଏବଂ ୨୦୨୦ରେ ମଧ୍ୟ ନୀଟ୍ ପରୀକ୍ଷା ଦେଇଥିଲେ। କିନ୍ତୁ ସେ କୃତକାର୍ଯ୍ୟ ହୋଇପାରିନଥିଲେ । ଦେଶର ବିଭିନ୍ନ ମେଡିକାଲ କଲେଜ୍ରେ ପ୍ରବେଶ ପାଇଁ ହେଉଥିବା ନୀଟ୍ ପରୀକ୍ଷାରେ ସେ ତୃତୀୟ ଥର ପାଇଁ ବସିଥିଲେ।
ନ୍ୟାସନାଲ୍ ଟେଷ୍ଟିଂ ଏଜେନ୍ସି ଦ୍ବାରା ଆନ୍ସର କି’ ପ୍ରକାଶ ପାଇବା ପରଠୁ ସେ ଚିନ୍ତାରେ ଥିଲେ। ସେ ନିଜର ଅଭିଭାବକଙ୍କୁ ଏଥର ମଧ୍ୟ ପାସ କରିପାରିବେ ନାହିଁ ବୋଲି କହିଥିଲେ । ପରୀକ୍ଷା ପରିଣାମ ପାଇଁ ଅପେକ୍ଷା କରିବାକୁ ତାଙ୍କର ବାପ-ମା ତାଙ୍କୁ ପରାମର୍ଶ ଦେଇଥିଲେ। ଏହା ସତ୍ବେ କିର୍ତ୍ତୀନିବାସ ଶୁକ୍ରବାର ଦ୍ବିପ୍ରହରରେ କୀଟନାଶକ ପିଇ ଆତ୍ମହତ୍ୟା କରିଛନ୍ତି। ଏହା ପରେ ତାଙ୍କୁ ପୋଲାଚି ସରକାରୀ ହସ୍ପିଟାଲକୁ ନିଆଯାଇଥିଲା। ସେଠାରୁ ଅନ୍ୟ ଏକ ହସ୍ପିଟାଲ ନିଆଯିବା ପରେ କିର୍ତ୍ତୀନିବାସଙ୍କ ମୃତ୍ୟୁ ହୋଇଥିଲା ।