ଟିଟିଲାଗଡ ୦୮|୧୨: ଧାନ ଅମଳସରିଲା, ଆରମ୍ଭ ହେଲା ଦାଦନ ଋତୁ । ଟିଟିଲାଗଡ ରେଲ ଷ୍ଟେସନରୁ ଦାଦନ ଖଟିବାକୁ ରାଜ୍ୟ ବାହାରକୁ ଯାଉଛନ୍ତିଶହ ଶହ ଶ୍ରମିକ । ତେବେ ସବୁଠୁ ବଡ ଅଭିଯୋଗ, ଦାଦନ ଶ୍ରମିକ ଚାଲାଣକୁ ସହଯୋଗ କରୁଛି ଟିଟିଲାଗଡ ଜିଆରପି । ସୁପରଫାଷ୍ଟ ଟ୍ରେନ ଷ୍ଟେସନରୁ ଛାଡିବା ପରେ ବି ଶ୍ରମିକ ଚାଲାଣପାଇଁ ଅଟକି ଯାଉଛି ପ୍ଲାଟଫର୍ମରେ । ଏଭଳି ଦେଖିବାକୁମିଳିଛି ଟିଟଲାଗଡ ରେଳ ଷ୍ଟେସନରେ ।
ପ୍ଲାର୍ଟଫର୍ମରେ ଅଛନ୍ତି ଶ୍ରମିକ । ପାଖରେ ରହିଛନ୍ତି ଟିଟିଲାଗଡ ଜିଆରପି ଅଧିକାରୀଙ୍କ ସମେତ ସଦଳବଳ । ହେଲେ ଏହି ପୋଲିସ ଫୋର୍ସ ଦାଦନ ଶ୍ରମିକମାନଙ୍କୁ ଉଦ୍ଧାର କରିବା ପାଇଁ ନୁହେଁ । ବରଂ ଶ୍ରମିକଦଲାଲ ସହ ମିଶି ସେମାନଙ୍କୁ ବାହାର ରାଜ୍ୟକୁ ଚାଲାଣ କରିବା ପାଇଁ । ସମ୍ବଲପୁର ନାନ୍ଦେଡ ନାଗାବଲୀ ଏକ୍ସପ୍ରେସରେ ଆଜି ବଲାଙ୍ଗିର ଓ ବରଗଡ ଜିଲ୍ଲାର ଶହ ଶହ ଦାଦନଶ୍ରମିକ ପିଲାଛୁଆଙ୍କୁ ଧରି ହାଇଦ୍ରାବାଦ ତଥା ୱାରଙ୍ଗାଲ ଅଭିମୁଖେ ଯାତ୍ରା କରୁଛନ୍ତି । ଟ୍ରେନ ଭିତରେ ବହୁ ଶିଶୁଶ୍ରମିକ ବି ଅଛନ୍ତି । ଦାଦନ ଦଲାଲ ସହ ପୁରା ଦାମରେ ଲାଗିପଡିଛି ରେଲୱେ ପୋଲିସ ଶ୍ରମିକମାନଙ୍କୁ ଟ୍ରେନ ଭିତରକୁ ଚଢେଇବା ପାଇଁ ।
{"id":61952}
କେବଳ ଏତିକି ନୁହେଁ। ଦାଦନ ଦଲାଲର ହାତ ଟ୍ରେନ ଚାଳକ ଉପରେ ବି ରହିଛି। ପ୍ଲାର୍ଟଫର୍ମରୁ ଟ୍ରେନ ଛାଡିବା ପରେ ବି ବେଶ୍ ଆରାମରେ ହାତ ହଲାଇ ଟ୍ରେନକୁ ରୋକି ଶ୍ରମିକମାନଙ୍କୁ ଜୋର ଜବରଦସ୍ତଟ୍ରେନ୍ ଭିତରକୁ ଠେଲିଦେଉଛନ୍ତି । ଏସବୁ ଦୃଶ୍ୟ କ୍ୟାମେରାରେ ରେକର୍ଡ ହେବା ଦେଖି ଦାଦନଦଲାଲକୁ ପୋଲିସ ବାବୁମାନେ ଜିଆରପି ଥାନାକୁ ନେଇ ଆସିଲେ । ହେଲେ ଏଠି ବି ଦଲାଲଙ୍କ ନାଲି ଆଖି ଦେଖିବାକୁମିଳିଛି । ତେବେ ଟିଟିଲାଗଡ ଜିଆରପି ଅଧିକାରୀ କିଛି ନଜାଣିବା ଭଳି ଅଭିନୟ କରିବା ସହ ଟ୍ରେନ୍ ଭିତରେ କୌଣସି ଶିଶୁ ତଥା ନାବାଳକ ନଥିବା ବି କହିଛନ୍ତି । ପୁରା ଘଟଣାରେ ପୋଲିସର କାର୍ଯ୍ୟ ଦକ୍ଷତା ଉପରେ ପ୍ରଶ୍ନ ଚିହ୍ନ ଲାଗିଛି ।