କେନ୍ଦୁଝରରେ ହାତୀ ମାରିବାକୁ ବିଲରେ ବିଛା ଯାଇଥିବା ବିସ୍ଫୋରକ ଉପରେ ପାଦ ପଡିଯିବାରୁ ବିସ୍ଫୋରଣ ହୋଇ ୨ ଭାଇ ଗୁରୁତର :ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି
Published By : Prameya-News7 Bureau | November 17, 2018 IST
କେନ୍ଦୁଝର ୧୭/୧୧: କେନ୍ଦୁଝରରେ ହାତୀ ମାରିବାକୁ ବିଲରେ ବିଛା ଯାଇଥିବା ବିସ୍ଫୋରକ ଉପରେ ପାଦ ପଡିଯିବାରୁ ବିସ୍ଫୋରଣ ହୋଇ ୨ ଭାଇ ଗୁରୁତର ହୋଇଛନ୍ତି। ଗୁରୁତର ଅବସ୍ଥାରେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତି ଜଣଙ୍କ ଅବସ୍ଥା ସଙ୍କଟାପର୍ଣ୍ଣ ଯୋଗୁଁ କଟକ ସ୍ଥାନାନ୍ତର ପାଇଁ ଡାକ୍ତର ପରାମର୍ଶ ଦେଇଛନ୍ତି । ଅଭିଯୋଗ ଅନୁସାରେ ବିନିଦା ଗାଁର ଦୁଇ ଭାଇ କେଦାର ଜୁଆଙ୍ଗ ଓ ମୁକୁନ୍ଧ ଜୁଆଙ୍ଗ ନିଜର ଜଙ୍ଗଲ ଜମି ଅଧିକାରରେ ପାଇଥିବା ଜମିରେ ଚାଷ କରିଥିଲେ । ଆଜି ସକାଳୁ ସକାଳୁ ଦୁଇ ଭାଇ ବିଲକୁ ଯିବା ସମୟରେ ବିଲ ଭିତରେ କେହି ବିଛାଇଥିବା କିଛି ବିସ୍ଫୋରକ ଜିନିଷ ଉପରେ ସାନ ଭାଇ ମୁକୁନ୍ଦର ଗୋଡ ପଡିଯାଇଥିଲା । ଫଳରେ ତାହା ଖୁବ ଯୋରରେ ବିସ୍ଫୋରଣ ହୋଇଥିଲା ଓ ମୁକୁନ୍ଦ ୮ ରୁ ୧୦ ଫୁଟ ଉପରକୁ ଉଠି ଖସି ପଡିଥିଲେ ଓ ତାଙ୍କର ବାମ ଗୋଡଟି ଛେତରା ହୋଇଯାଇଛି । ବିସ୍ଫୋରଣ ଏତେ ଯୋର ଥିଲା ଯେ ତାଙ୍କ ପଛରେ ଆସୁଥିବା ତାଙ୍କର ବଡଭାଇ କେଦାରଙ୍କ ଆଖି ଓ ମୁଣ୍ଡରେ ଆଘାତ ଲାଗିଛି । ଘଟଣା ସ୍ଥଳରୁ ଉଭୟଙ୍କୁ ଗାଁ ଲୋକେ ଉଦ୍ଧାର କରି ଜିଲ୍ଲା ମୁଖ୍ୟ ଚିକିତ୍ସାଲୟରେ ଭର୍ତି କରିଛନ୍ତି । ସେମାନଙ୍କ ମଧ୍ୟରୁ ସାନ ଭାଇ ମୁକୁନ୍ଦଙ୍କ ଅବସ୍ଥା ଗୁରୁତର ଥିବାରୁ ଡାକ୍ତର କଟକ ସ୍ଥାନାନ୍ତର ପାଇଁ ପରାମର୍ଶ ଦେଇଛନ୍ତି। ଗତ କିଛି ଦିନ ହେବ ଏହ ଅଞ୍ଚଳରେ ଓ ଏହାର ପାଖଆଖ ଅଞ୍ଚଳରେ କିଛି ବଣୁଆ ହାତୀ ପଲ ଡେରା ପକାଇ ଏହି ଅଞ୍ଚଳରେ ଧାନ ଫସଲ ଖାଇଯାଉଛନ୍ତି । ତା ସହ କିଛି ବାରହା ମଧ୍ୟ ରାତିରେ ଧାନ ବିଲରେ ପଶି ଫସଲ ନଷ୍ଟ କରି ପକାଉଛନ୍ତି। ତେଣୁ ଏହି ହାତୀ କିମ୍ବା ବାରହା ମାରିବାକୁ କେହି ଏହା ପରି ବିସ୍ଫୋରକ ବିଛାଇଥିବା ସନ୍ଦେହ କରାଯାଉଛି ।