Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • ନାକରେ ବୁଷ୍ଟର ଡୋଜ୍ ପରୀକ୍ଷଣକୁ ଡିସିଜିଆଇର ମଞ୍ଜୁରୀ, ଭାରତ ବାୟୋଟେକ୍ କରିବ କ୍ଲିନିକଲ ଟ୍ରାଏଲ
  • ||
  • ରାଜ୍ୟରେ ଆଉ ୧୦ ଜଣଙ୍କ ଜୀବନ ନେଲା କରୋନା, ମୃତ୍ୟୁ ସଂଖ୍ୟା ୮୫୬୦କୁ ବୃଦ୍ଧି
  • ||
  • ରାଜ୍ୟରେ କମୁଛି ସଂକ୍ରମଣ : ୨୪ ଘଣ୍ଟାରେ ଚିହ୍ନଟ ହେଲେ ୫୦୫୭ କୋଭିଡ୍ ପଜିଟିଭ୍, ୧୨୩୬୨୨୬ରେ ପହଞ୍ଚିଲା ସଂଖ୍ୟା
  • ||
  • ପାକିସ୍ତାନ: ବଲୁଚିସ୍ତାନ ଚେକ୍ ପୋଷ୍ଟ ଉପରେ ଆତଙ୍କୀ ହମଲା, ୧୦ ସୈନିକଙ୍କ ମୃତ୍ୟୁ
  • ||
  • ରାଉରକେଲା : ଭିଜିଲାନ୍ସ ଜାଲରେ ଲ୍ୟାମ୍ପ୍ସ ଏମ୍‌ଡି, ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଚଢାଉ
  • ||
  • ଭି. ଅନନ୍ତ ନାଗେଶ୍ୱରନ ହେବେ ଭାରତର ଆଗାମୀ ମୁଖ୍ୟ ଆର୍ଥିକ ପରାମର୍ଶଦାତା, ଅତିଶୀଘ୍ର ଘୋଷଣା କରିପାରନ୍ତି ସରକାର
  • ||
  • ସୋର : ଦେଶୀ ମଦ ଦୋକାନରେ ପଶି କର୍ମଚାରୀଙ୍କୁ କଟୁରୀରେ ହାଣିଲେ ଦୁର୍ବୃତ୍ତ, ଛଡାଇନେଲେ ୭୦ହଜାର ଟଙ୍କା
  • ||
  • କଣ୍ଟାବାଞ୍ଜି : ଚାଲାଣ ବେଳେ ୧୪ ଶ୍ରମିକ ଉଦ୍ଧାର, ଷ୍ଟେସନ ଯିବା ବାଟରେ ଧରିଲା ପୋଲିସ
  • ||
  • ରାଜ୍ୟରେ ୩ ଦିନ ଯାଏଁ ହାଡଭଙ୍ଗା ଶୀତ, ୬ ଜିଲ୍ଲା ବେଶୀ ଥରିବ
  • ||

ସମୁଦ୍ରରେ ଭାସୁଛି ୪୦ ଫୁଟ ତିମିର ମୃତଦେହ

24/05/2020 at 10:49 AM

ମହାକାଳପଡ଼ା ୨୪।୦୫: କେନ୍ଦ୍ରାପଡ଼ା ଜିଲ୍ଲା ଭିତରକନିକା ସାମୁଦ୍ରିକ ଅଭୟାରଣ୍ୟର ଗହୀରମଥା ରେଞ୍ଜ୍‌ ଅଧୀନ ଅଗରନାସୀ ସମୁଦ୍ରରେ ଏକ ବିରାଟକାୟ ତିମିର ମୃତଦେହ ଆଜି ଭାସୁଥିବାର ଦେଖିବାକୁ ମିଳିଛି । ମୃତ ତିମିର ଲମ୍ୱ ପ୍ରାୟ ୪୦ରୁ ୪୨ ଫୁଟ ହେବ ବୋଲି ବନ ବିଭାଗ ସୂତ୍ରରୁ ଜଣାପଡ଼ିଛି । ଦୀର୍ଘ ୪ ବର୍ଷ ହେବ ଭିତରକନିକା ସାମୁଦ୍ରିକ ଅଭୟାରଣ୍ୟ ଉପକୂଳରେ ବିଶାଳ ତିମିର ମୃତଦେହ ଦେଖିବାକୁ ମିଳୁଛି । ଏହି ତିମିର ମୃତ୍ୟୁର କାରଣ ଅଦ୍ୟାବଧି ସ୍ପଷ୍ଟ ହୋଇପାରିନି । ଖବର ପାଇ ବନ ବିଭାଗ ଅଧିକାରୀମାନେ ଘଟଣାସ୍ଥଳରେ ତଦନ୍ତ ଚଳାଇଛନ୍ତି । ଗତ ୧୯ ଓ ୨୦ ତାରିଖରେ ହୋଇଥିବା ମହାବାତ୍ୟା ଅମ୍‌ପନ୍‌ରେ ତିମିର ମୃତ୍ୟୁ ହୋଇଥାଇପାରେ ବୋଲି ରାଜନଗର ଡିଏଫ୍‍ଓ ବିକାଶ ରଞ୍ଜନ ଦାଶ କହିଛନ୍ତି । ଡିଏଫ୍‌ଓଙ୍କ କହିବାନୁସାରେ ଏନେଇ ଅନୁସନ୍ଧାନ ଜାରି ରହିଛି । ଏଥିପାଇଁ ରାଜନଗର ବନ ବିଭାଗ ତିମି ମାଛ ବିଶାରଦମାନଙ୍କ ସହାୟତା ଲୋଡ଼ିଛନ୍ତି । ଏହି ଅଞ୍ଚଳରେ ଏହା ଚତୁର୍ଥ ମୃତ ତିମି ଉଦ୍ଧାର ଘଟଣା ବୋଲି ଜଣାପଡ଼ିଛି ।

୨୦୧୭ ମସିହାରେ ଏହି ସମୁଦ୍ର ଉପକୂଳର ହାବେଳିଖଟି ନିକଟରେ ଏକ ବିଶାଳ ତିମିର ଗଳିତ ମୃତଦେହ ଅଧା ବାଲିରେ ପୋତି ହୋଇଥିବା ଦେଖିବାକୁ ମିଳିଥିଲା । ୨୦୧୮ ମସିହାରେ ହାବେଳିଖଟି ଉପକୂଳରେ ୫୨ ଫୁଟ ଲମ୍ୱ ଏକ ତିମିର ଗଳିତ ଶରୀର ପଡ଼ିଥିଲା । ୨୦୧୯ରେ ଆଉ ଏକ ତିମିର ମୃତଦେହ ଭିତରକନିକାର ବାଉଁଶଗଡ଼ି ନଦୀର ଅହିରାଜପୁର ଗ୍ରାମରେ ଦେଖାଯାଇଥିଲା । ଅଗରନାସୀ ସ୍ଥିତିକୁ ଦେଖିଲେ ଗହୀରମଥା ସାମୁଦ୍ରିକ ଅଭୟାରଣ୍ୟ ପାଖରୁ ମାତ୍ର ୩ରୁ ୪ କିଲୋମିଟର ଜଳପଥରେ ଯିବାକୁ ପଡ଼େ । ଏଠାରେ ଅଲିଭ ରିଡ୍‌ଲେ କଇଁଛଙ୍କୁ ସୁରକ୍ଷା ଦେବାକୁ ବନ ବିଭାଗର ଏକ ଅସ୍ଥାୟୀ କ୍ୟାମ୍ପ ରହିଥାଏ । ଏଠାରେ ୫ରୁ ଊଦ୍ଧ୍ୱ କର୍ମଚାରୀ ପ୍ରହରା ଦେଇଥାନ୍ତି । ଏଠାରେ ବିଶାଳ ତିମିର ମୃତଦେହ ଉଦ୍ଧାର ହେବା ପରେ ଅଭୟାରଣ୍ୟର ବନ ବିଭାଗ କର୍ମଚାରୀଙ୍କ କାର୍ଯ୍ୟଦକ୍ଷତାକୁ ନେଇ ପ୍ରଶ୍ନ ଉଠିଛି । କିଛି ପରିବେଶବିତ୍‍ କହିଛନ୍ତି, ସମୁଦ୍ର ପ୍ରଦୂଷଣ, ତିମି-ତିମି ମଧ୍ୟରେ ଲଢ଼େଇ, ତିମି-ସାର୍କ ମଧ୍ୟରେ ଲଢ଼େଇ, ପ୍ରାକୃତିକ ମରଣ କିମ୍ୱା ସମୁଦ୍ର ମଝିରେ ବାହାର ଦେଶର ତିମି ଶିକାରୀଙ୍କ ଯୋଗୁଁ ତିମିଙ୍କର ମୃତ୍ୟୁ ଘଟେ ।

ମିଆଁମାର ଅଞ୍ଚଳର ତିମି ଶିକାରୀଙ୍କର ଏଭଳି କାର୍ଯ୍ୟ ହୋଇଥାଇପାରେ ବୋଲି ବି ଆଶଙ୍କା କରାଯାଉଛି । କଣ୍ଟା ଦ୍ୱାରା ତିମି ଶିକାର କରିବାର କୌଶଳ ସେମାନଙ୍କୁ ଜଣାଅଛି ବୋଲି ଅଞ୍ଚଳରେ ଆଲୋଚନା ହେଉଛି । ଗତ ନଭେମ୍ୱର ୧ରୁ ମେ ୩୧ ତାରିଖ ପର୍ଯ୍ୟନ୍ତ କଇଁଛ ସୁରକ୍ଷା ନିମନ୍ତେ ଏଠାରେ ପାଟ୍ରୋଲିଂ ଚାଲୁରହିଛି । ଏତିକିବେଳେ ଏ ଅଘଟଣ ନାନା ପ୍ରଶ୍ନ ଉଠାଇଛି । ଯାହା କି ତଦନ୍ତ ସାପେକ୍ଷ । ଅପରପକ୍ଷରେ ଏବେ ଯେଉଁ ତିମିର ମୃତଦେହ ମିଳିଛି ତାହା ଗଭୀର ସମୁଦ୍ରରେ ମହାବାତ୍ୟା ମାଡ଼ ଜନିତ କାରଣରୁ ହୋଇଥାଇପାରେ ବୋଲି ବନ ବିଭାଗ ସୂଚନା ଦେଇଛି । କେନ୍ଦ୍ରାପଡ଼ା ସମୁଦ୍ର ଉପକୂଳର ପାଖାପାଖି ଅଞ୍ଚଳର ଗଭୀର ସମୁଦ୍ରରେ ତିମିମାନଙ୍କ ବାସସ୍ଥାନ ଥାଇପାରେ ବୋଲି ମଧ୍ୟ ଅନୁମାନ କରାଯାଉଛି ।

   Related Posts