ନୀଳଗିରି ୨୩।୧୧: ଇଚ୍ଛାଥିଲା ଡିପ୍ଲୋମା ପାସ୍ କରି ଇଞ୍ଜିନିୟର ହେବାକୁ । ପାଠପଢା ସରିବା ପରେ ସହଜରେ ମିଳିଲାନି ଚାକିରୀ । ପିଲାଦିନୁ ଚାଷ ପ୍ରତି ଦୁର୍ବଳତା ଥିଲା । ନିଜ ଜମିରେ ଫାର୍ମ ହାଉସଟିଏ କରିବାର ସ୍ବପ୍ନ ଦେଖିଥିଲେ । ଆଜି ତାଙ୍କର ସେ ସ୍ବପ୍ନ ପୂରଣ ନହେଲେ ବି ଚାଷ କରି ସଫଳ ହୋଇଛନ୍ତି ଯୁବ ଇଞ୍ଜିନିୟର । ଅର୍ଗାନିକ ଉପାୟରେ ପାହାଡିଆ ଅଞ୍ଚଳରେ କଳାଧାନ ଚାଷ କରି ଯୁବପୀଢ଼ିଙ୍କ ପାଇଁ ଉଦାହରଣ ପାଲଟିଛନ୍ତି ବାଲେଶ୍ବର ଜିଲ୍ଲା ନୀଳଗିରି ଅଞ୍ଚଳର ସୌମ୍ୟକାନ୍ତ ପ୍ରଧାନ ।
{"id":366455,"sizeSlug":"large"}ବାଲେଶ୍ଵର ଜିଲ୍ଲା ନୀଳଗିରି ଏନଏସି ୨ ନମ୍ବର ୱାର୍ଡର ଘାଟଘରସାହି ଅଞ୍ଚଳରେ ସୌମ୍ୟକାନ୍ତ ପ୍ରଧାନଙ୍କ ଘର । ବାପା ରମାନାଥ ପ୍ରଧାନ ଓ ମା’ ଅହଲ୍ୟାଙ୍କ ସୁପୁତ୍ର ହେଉଛନ୍ତି ସୌମ୍ୟକାନ୍ତ । ୨୦୧୩ ମସିହାରେ ଡିପ୍ଲୋମା ଇଞ୍ଜିନିୟରିଂ ପାସ୍ କରିବା ପରେ ଚାକିରୀ ଖୋଜିଥିଲେ ସୌମ୍ୟକାନ୍ତ । ମାତ୍ର ତାଙ୍କୁ ଏତେ ସହଜରେ ଚାକିରୀ ମିଳିନଥିଲା । ରାଜ୍ୟ ବାହାରୁ ବିଭିନ୍ନ କମ୍ପାନୀରୁ ତାଙ୍କୁ ଅଫର ଆସିଥିଲା । ହେଲେ ବାପା-ମା’ଙ୍କର ଏକମାତ୍ର ପୁଅ ହୋଇଥିବା ସେମାନଙ୍କୁ ଛାଡି ଯାଇପାରିନଥିଲେ ସୌମ୍ୟକାନ୍ତ ।
{"id":366456,"sizeSlug":"large"}ଏହି ସମୟରେ ବଡବାପା ଆଇନଜୀବୀ ରଘୁନାଥ ପ୍ରଧାନ ଓ କାକା ସାମ୍ବାଦିକ ରାଧାନାଥ ପ୍ରଧାନ ତାଙ୍କୁ ପ୍ରେରଣା ଯୋଗାଇଥିଲେ । ପାହାଡିଆ ଅଞ୍ଚଳ ଜମିରେ ଫାର୍ମ ହାଉସ କରିବା ସହ ଚାଷ କାମ କରିବାକୁ ଟିପ୍ସ ମଧ୍ୟ ଦେଇଥିଲେ । ଏହାପରେ ଚାକିରୀ ପଛରେ ନଗୋଡ଼ାଇ ଧାନ ଚାଷ ଆରମ୍ଭ କରିଥିଲେ ସୌମ୍ୟକାନ୍ତ । ଏହି ସମୟରେ ଆମେରିକାରେ ରହୁଥିବା ନୀଳଗିରି ଅଞ୍ଚଳର ଯୁବ ବୈଜ୍ଞାନିକ ଚନ୍ଦନ କାନ୍ତ ଦାସଙ୍କ ସହ ତାଙ୍କର ଦେଖା ହୋଇଥିଲା । ଅର୍ଗାନିକ ଉପାୟରେ କଳା ଧାନ ଚାଷ କରିବାକୁ ସେ ପରାମର୍ଶ ଦେଇଥିଲେ । କଳା ଧାନର ଚାଉଳରେ ହାର୍ଟ, ଡାଇବେଟିସ ସହ ଅନ୍ୟ ବଡ଼ବଡ଼ ରୋଗର ନିରାକରଣ ହେଉଥିବାରୁ ଏହାର ଚାହିଦା ବଜାରରେ ରହିଛି । ଚନ୍ଦନ ମାତ୍ର ୫ କେଜି ଧାନ ସୌମ୍ୟକାନ୍ତଙ୍କୁ ଦେଇଥିଲେ । ସୌମ୍ୟକାନ୍ତ ଅନଲାଇନରେ ଏହି ଚାଷ ଓ ଚାଉଳର ଉପକାରିତା ଦେଖି ଚାଷ ପାଇଁ ଇଚ୍ଛା ପ୍ରକାଶ କରିଥିଲେ ।
{"id":366457,"sizeSlug":"large"}ଚଳିତ ବର୍ଷ ସାଢ଼େ ୭ ଏକର ଜମିରେ ସାଳଫୁଲ, ସ୍ବର୍ଣ୍ଣ ଧାନ ଚାଷ କରିବା ସହ କଳା ଧାନ ଚାଷ ମଧ୍ୟ କରିଥିଲେ । ଧାନ ଚାଷ ମଧ୍ୟ ବେଶ୍ ଭଲ ହୋଇଥିଲା । କଳା ଧାନର ଚାଉଳ କେଜି ପ୍ରତି ୪୫୦ ଟଙ୍କା ବିକ୍ରୟ ହେଉଛି । ସୋମ୍ୟକାନ୍ତଙ୍କ ଦ୍ବାରା କରାଯାଇଥିବା ଏହି ଚାଷ ଅନ୍ୟ ଚାଷୀଙ୍କ ପାଇଁ ପ୍ରେରଣା ଯୋଗାଇଛି ।
{"id":366459,"sizeSlug":"large"}ସୌମ୍ୟକାନ୍ତ ଏକ ବେସରକାରୀ ଇଞ୍ଜିନିୟରିଂ କଲେଜରେ ମେକାନିକାଲ ବିଭାଗର ସହକାରୀ ଶିକ୍ଷକ ଭାବେ କାର୍ଯ୍ୟରତ ଅଛନ୍ତି । କଳା ଧାନ ଦ୍ବାରା ରୋଗୀଙ୍କ ଉପକାରିତାକୁ ଦୃଷ୍ଟିରେ ରଖି ଆସନ୍ତା ବର୍ଷ ଅଧିକରୁ ଅଧିକ ଜମିରେ ଚାଷ କରିବେ ଜଣାପଡିଛି । ପରିବାର ଲୋକେ ପୁଅର ଏଭଳି ସଫଳତା ପାଇଁ ଖୁସିହୋଇଥିବା ବେଳେ ପ୍ରୋତ୍ସାହନ ଦେଇଥିବା ବୈଜ୍ଞାନିକ ଚନ୍ଦନ କାନ୍ତ ଦାସ ସୌମ୍ୟକାନ୍ତଙ୍କ ଏଭଳି ସଫଳତା ଦେଖି ସୁଦୂର ଆମେରିକାରୁ ଶୁଭେଚ୍ଛା ଜଣାଇଛନ୍ତି।