ଭୁବନେଶ୍ବର୧|୪: ବିଜେପି ଆଜି ୧୧ ବିଧାନସଭା ଓ ୩ ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା କରିଛି । ତେବେ ସମସ୍ତଙ୍କ ନଜରରେ ଥିବା ପୁରୀ ବିଧାନସଭା ଆସନରେ ଜୟନ୍ତ ଷଢଙ୍ଗୀ ଓ ଭୁବନେଶ୍ବର ଉତ୍ତରରେ ଅଭିନେତ୍ରୀ ଅପରାଜିତା ମହାନ୍ତି ଏବଂ ପାଟକୁରାରେ ହେଭିଓ୍ବେଟ ନେତା ବିଜୟ ମହାପାତ୍ରଙ୍କୁ ପ୍ରାର୍ଥୀ କରିଛି ଦଳ । ଯାହା ଉପକୂଳ ରାଜନୀତିରେ ଚର୍ଚ୍ଚାକୁ ଖୋରାକ୍ ଯୋଗାଇଛି ।
ପାଟକୁରାରୁ ବିଜେପି ପ୍ରାର୍ଥୀ ହେଲେ ବିଜୟ ମହାପାତ୍ର । ଆଜି ବିଜେପି ୧୧ ବିଧାନସଭା ଓ ୩ ଲୋକସଭା ପାଇଁ ପ୍ରାର୍ଥୀ ଘୋଷଣା କରିଥିବା ବେଳେ ପାଟକୁରାରୁ ବିଜୟ ମହାପାତ୍ରଙ୍କ ନାଁ ଘୋଷଣା ହେବା ପରେ ଏହା ଉପକୂଳ ରାଜନୀତି ଚର୍ଚ୍ଚାକୁ ଖୋରାକ୍ ଯୋଗାଇଛି । ଏମିତି କରି ଦଳ ଉପକୂଳ ଓଡିଶାର ରାଜନୈତିକ ସମୀକରଣ ବଦଳାଇବା ସହ କେନ୍ଦ୍ରାପଡାରେ ବିଜୟ ଆଶାକୁ ବଳ ଦେବାକୁ ଚାହିଁଛି । ସେପଟେ ବିଜୟ କହିଛନ୍ତି ପାଟକରୁରା ତାଙ୍କ ଜନ୍ମ ମାଟି । ଦଳ ଯେଉଁ ଦାୟିତ୍ବ ଦେଇଛି ତାହାକୁ ସଫଳ କରିବା ପାଇଁ ସେ ଉଦ୍ୟମ କରିବେ । ସେପଟେ ବିଜେଡି ପାଟକୁରାରୁ ହେଭିଓ୍ବେଟ ନେତା ବେଦ ପ୍ରକାଶ ଅଗ୍ରଓ୍ବାଲଙ୍କୁ ପ୍ରାର୍ଥୀ କରିଛି । ତେଣୁ ପାଟକୁରାରେ ଏଥର ଲଢେଇ ଜମିବା ସ୍ପଷ୍ଟ ।
ସେହିଭଳି ବିଜେପି ଆଜି ଘୋଷଣା କରିଥିବା ୩ ଲୋକସଭା ଆସନରେ ମଧ୍ୟ ନୂଆ ରାଜନୈତିକ ସମୀକରଣ ଦେଖିବାକୁ ମିଳିଛି । ଲଗାତାର ଭାବେ ଭଦ୍ରକରୁ ବିଜେଡି ସାଂସଦ ଭାବେ ଜିତି ଆସୁଥିବା ଅର୍ଜୁନ ସେଠୀ ଟିକେଟ ନପାଇ ଦଳ ଛାଡିବା ପରେ ଅର୍ଜୁନଙ୍କ ପୁଅ ଅଭିମନ୍ୟୁ ସେଠୀଙ୍କୁ ଭଦ୍ରକରୁ ସାଂସଦ ପ୍ରାର୍ଥୀ କରିଛି ବିଜେପି । ହେଲେ ମୟୁରଭଞ୍ଜ ଲୋକସଭା ପାଇଁ ଦଳରେ ମିଶିଥିବା ଲକ୍ଷ୍ମଣ ଡୁଡୁଙ୍କୁ ଟିକେଟ ନଦେଇ ଇଂଜିନିୟର ବିଶ୍ବେଶର ଟୁଡୁଙ୍କୁ ପ୍ରାର୍ଥୀ କରିଛି ଦଳ । ଯାଜପୁରରୁ ଅମୀୟ ମଲ୍ଲିକଙ୍କୁ ଦେଇଛି ସାଂସଦ ଟିକେଟ୍ । ସେହିଭଳି ଆନନ୍ଦପୁର ବିଧାନସଭା ପାଇଁ ଆଲୋକ ସେଠୀ, ରାଇରଙ୍ଗପୁର ନବଚରଣ ମାଝୀ, ମୋରଡା କୃଷ୍ଣଚନ୍ଦ୍ର ମହାପାତ୍ର ଟିକେଟ ପାଇଛନ୍ତି । ନୀଳଗିରି ବିଧାୟକ ସୁକାନ୍ତ ନାୟକ ବିଜେଡି ଟିକେଟ ନପାଇ ବିଜେପିରେ ମିଶି ଟିକେଟ ହାତେଇଛନ୍ତି । ବିଜେପି ଛାଡି ବିଜେପିରେ ମିଶିଥିବା ଜୟନ୍ତ ଷଡଙ୍ଗୀଙ୍କୁ ପୁରୀରୁ ଟିକେଟ ଦେିଛି ବିଜେପି । ଆଠମଲ୍ଲିକ ଭଗିରଥୀ ପ୍ରଧାନ, ବାଙ୍କୀ ଶୁଭ୍ରାଂଶୁ ଶେଖର ପାଢୀ, ଆଠଗଡ ବ୍ରଜେନ୍ଦ୍ର ରାୟ, ମହାକାଳପଡା ବିଜୟ ପ୍ରଧାନ, ଭୁବନେଶ୍ବର ଉତ୍ତର ପାଇଁ ଅପରାଜିତା ମହାନ୍ତିଙ୍କୁ ପ୍ରାର୍ଥୀ କରାଯାଇଛି ।
ଶାସକ ଦଳର ଅସନ୍ତୁଷ୍ଟ ନେତାଙ୍କୁ ଆଣି ନିଜ ବଳ ବଢାଇବା ସହ ନୂଆ ସମୀକରଣ ସୃଷ୍ଟି କରୁଥିବା ବିଜେପି ୧୪୨ ବିଧାନସଭା ଓ ୨୦ ଲୋକସଭା ସିଟ ଲାଗି ପ୍ରାର୍ଥୀ ଘୋଷଣା କରିସାରିଛି । ବାକି ୫ ବିଧାନସଭା ଓ ଜଗତସିଂହପୁର ଲୋକସଭା ସିଟ ଲାଗି ଅଙ୍କ କଷୁଛି ଦଳ ।