ମେକ ଇନ୍ ଓଡିଶାରେ ଯୋଗ ଦେବେ ୮ଶହ ପ୍ରତିନିଧି, କାହିଁକି ଡକାଯାଇନି କେନ୍ଦ୍ରମନ୍ତ୍ରୀଙ୍କୁ : ବିଜେଡି-ବିଜେପି କାଦୁଅ ଫିଙ୍ଗା ଫିଙ୍ଗି
Published By : Prameya-News7 Bureau | November 09, 2018 IST
ଭୁବନେଶ୍ବର ୯|୧୧: ମେକ ଇନ୍ ଓଡିଶାକୁ ନେଇ ବିଜେଡି ବିଜେପି ଭିତରେ ବାକ ଯୁଦ୍ଧ ଛିଡୁନି । ନୂଆ ନୂଆ ତଥ୍ୟ ସମ୍ନାକୁ ଆଣି ବିଜେପି ଘେରୁଛି ରାଜ୍ୟସରକାରଙ୍କୁ । ସେପଟେ ମେକଇନ୍ ଓଡିଶା କାର୍ଯ୍ୟକ୍ରମକୁ ବଡ ଆକାରରରେ ଆୟୋଜନ କରିବାକୁ ପୁରା ଦମ ଲାଗାଇଛନ୍ତି ରାଜ୍ୟସରକାର । ମେକ ଇନ୍ ଓଡିଶା କାର୍ଯ୍ୟକ୍ରମକୁ କେନ୍ଦ୍ର ମନ୍ତ୍ରୀମାନଙ୍କୁ ନ ଡାକିବା ଏବଂ କେନ୍ଦ୍ର ଅର୍ଥ ବିନିଯୋଗ ନକରିବା ପ୍ରସଙ୍ଗ ଉଠାଇ ଏହି କାର୍ଯ୍ୟକ୍ରମକୁ ପାଣିଚିଆ କରିବା ଯୋଜନାରେ ଅଛି ବିଜେପି । ଏହାକୁ ନେଇ ବିଜେଡି ଓ ବିଜେପି ଭିତରେ ଚାଲିଛି କାଦୁଅ ଫିଙ୍ଗା…
ମେକ ଇନ୍ ଓଡିଶା କାର୍ଯ୍ୟକ୍ରମରେ ଯୋଗ ଦେବେ ୮ଶହ ପ୍ରତିନିଧି। କିନ୍ତୁ କାହିଁକି କେନ୍ଦ୍ରର ମନ୍ତ୍ରୀଙ୍କୁ ଡକାଯାଉନାହିଁ ବୋଲି ପ୍ରଶ୍ନ କରିଛି ବିଜେପି । ଓଡିଶାର ବିଭିନ୍ନ ପ୍ରକଳ୍ପରେ ବିତନିଯୋଗ ହେଉଥିବାବେଳେ କାହିଁକି କେନ୍ଦ୍ର ମନ୍ତ୍ରୀ ମାନଙ୍କୁ ଡକାଯାଇନି ବୋଲି ବିଜେପି ପ୍ରଶ୍ନ କରିଛି। ଦଳ ପ୍ରଭାରୀ ଅରୁଣ ସିଂ କହିଛନ୍ତି ଛୋଟ ମନରେ କେହି ବଡ ହୋଇପାରିବେ ନାହିଁ। ବିଜେପି ରେଳ ପ୍ରକଳ୍ପର ଉଦାହରଣ ଦେଇଛି । ଗତ ପାଞ୍ଚ ବର୍ଷରେ ରେଳ ବିକାଶ ପାଇଁ ୨୦ ହଜାର କୋଟି ଟଙ୍କାରୁ ଅଧିକ ମିଳିଛି, କିନ୍ତୁ ଅଧା ଖର୍ଚ୍ଚ ହିଁ ହୋଇପାରିନି। ଖୋର୍ଦ୍ଧା –ବଲାଙ୍ଗୀର ରେଳ ପ୍ରକଳ୍ପରେ ୩୭୯୧ କୋଟି , ତାଳଚେର ବିମଳାଗଡରେ ୧୯୨୮ କୋଟି, ପରାଦୀପ-ହରିଦାଶପୁର ପାଇଁ ୧୮୪୪କୋଟି, ଅନୁଗୁଳ-ସୁକିନ୍ଦା ପ୍ରକଳ୍ପ ପାଇଁ ୧୨୦୩ କୋଟି ଟଙ୍କା ଖର୍ଚ୍ଚ ହୋଇନାହିଁ । ଏହା ହେଉଛି ପୁଞ୍ଜି ନିବେଶର ବାସ୍ତବ ଚିତ୍ର ବୋଲି ବିଜେପି କହିଛି। ଶିଳ୍ପ ମନ୍ତ୍ରୀ ଅନନ୍ତ ଦାସ ବିଜେପି ପ୍ରଶ୍ନର ଜବାବ ରଖିଛନ୍ତି।
ସେହିଭଳି ଏମସିଏଲର ଅବ୍ୟବହୃତ ଜମିକୁ କୃଷକମାନଙ୍କୁ ଫେରାଇଦେବାକୁ କେନ୍ଦ୍ର କୋଇଲାମନ୍ତ୍ରୀ ପିୟୁଷ ଗୋଏଲଙ୍କୁ ଚିଠି ଲେଖିଥିଲେ ନବୀନ । ଏହାର ଜବାବରେ ବିଜେପି ପକ୍ଷରୁ ଏକ ଖୋଲା ଚିଠି ଦିଆଯାଇଛି ମୁଖ୍ୟମନ୍ତ୍ରୀଙ୍କୁ । ବିଜେପିର ଅଭିଯୋଗ ବିଭିନ୍ନ ପ୍ରାଇଭେଟ କମ୍ପାନୀକୁ ପବ୍ଲିକ ପ୍ରପୋଜ କ୍ଲଜ ଅନୁଯାୟୀ ୧୪,୨୯୬ ଏକର ଚାଷ ଜମି ଦିଆଯାଇଛି । ସେହିଭଳି ଏମରଜେନସି ପ୍ରୋଭିଜନରେ ୭୦୨୫ଏକର ଚାଷଜମି ଦିଆଯାଇଛି। କିନ୍ତୁ ତାହା ବ୍ୟବହାର ନହୋଇ ପଡି ରହିଛି। ସେ ସବୁ ଜମିକୁ କାହିଁକି ରାଜ୍ୟ ସରକାର କୃଷକମାନଙ୍କୁ ଫେରାଇ ଦେଉ ନାହାନ୍ତି ବୋଲି ବିଜେପି ପ୍ରଶ୍ନ କରିଛି ।
ଏମଜିଏମ, ମନେଟ ପାଓ୍ବାର ଓ ଷ୍ଟିଲକୁ ୧୨ ୦୦ଏକର ଅଧିକା ଚାଷ ଜମି ହସ୍ତାନ୍ତର କରାଯାଇଛି। ରେମୁଣାରେ ୧୧ଶହ ଏକର ଜମି ଇଣ୍ତଷ୍ଟ୍ରିଆଲ ପାର୍କ ପାଇଁ ଶୁଭ ଦେଇଥିଲେ ସରକାର । ସେଠି ମଧ୍ୟ ପ୍ରକଳ୍ପ ଆରମ୍ଭ ହୋଇନି । ରାଜ୍ୟରେ କେତେ ଜମି ଅବ୍ୟବହୃତ ହୋଇ ପଡିଛି ତା ଉପରେ ଶ୍ବେତପତ୍ର ଜାରି କରିବାକୁ ବିଜେପି ଦାବି କରିଛି।