ଝାରସୁଗୁଡା ୧୫।୧୨: ପରୀକୁ ନ୍ୟାୟ ଦେବା ପାଇଁ ବିଜେପି ପକ୍ଷରୁ ଦଳୀୟ ରାଜ୍ୟ ସଭାପତି ବିଭିନ୍ନ ଜିଲ୍ଲା ଗସ୍ତ ଅବସରରେ ଝାରସୁଗୁଡା ସର୍କିଟ୍ ହାଉସରେ ପହଞ୍ଚିଥିଲେ । ସେଠାରେ ଦଳୀୟ କର୍ମକର୍ତ୍ତାଙ୍କ ସହ ଆଲୋଚନା କରି ପରୀକୁ ନ୍ୟାୟ ଦେବା ପାଇଁ ବିଜେପି ପକ୍ଷରୁ କରାଯାଉଥିବା ପଦଯାତ୍ରାରେ ଯୋଗଦେବା ପାଇଁ ଆହ୍ବାନ ଦେଇଛନ୍ତି ରାଜ୍ୟ ବିଜେପି ସଭାପତି ସମୀର ମହାନ୍ତି । ଝାରସୁଗୁଡାରେ ପହଞ୍ଚିବା ପରେ ବଡ଼ମାଲଠାରେ ଦଳୀୟ କର୍ମକର୍ତ୍ତା ଓ କର୍ମୀମାନେ ବିପୁଳ ସ୍ବାଗତ କରିଥିଲେ ।
ଏହି ଅବସରରେ ସମୀର ମହାନ୍ତି କହିଛନ୍ତି ଯେ, ପରୀ ପରି ରାଜ୍ୟରେ ଗତ ୨ ବର୍ଷ ମଧ୍ୟରେ ୫ ହଜାର ଶିଶୁ ନିଖୋଜ ହେଉଛନ୍ତି । ତେଣୁ ଏହାକୁ ରୋକିବା ସହ ପରୀକୁ ନ୍ୟାୟ ଦେବା ପାଇଁ ଝାରସୁଗୁଡା ପ୍ରତ୍ୟେକ ବ୍ୟକ୍ତି ଏକ ହୋଇ ବିଜେପିର ପଦଯାତ୍ରାରେ ସାମିଲ ହୁଅନ୍ତୁ ବୋଲି କହିଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ପରୀର ହତ୍ୟାକାଣ୍ଡକୁ ୪ ମାସ ବିତି ଯାଇଥିଲେ ସୁଦ୍ଧା ପୋଲିସ ଦୋଷୀମାନଙ୍କୁ ଏପର୍ଯ୍ୟନ୍ତ ଗିରଫ କରି ନାହିଁ । ଏହା ରାଜ୍ୟ ସରକାରଙ୍କ ବିଫଳତା ଓ ପୋଲିସର ନିଷ୍କ୍ରିୟତାକୁ ଦର୍ଶାଉଛି ।
ଅନ୍ୟପଟେ ପରୀର ହତ୍ୟାକାଣ୍ଡରେ ବବୁଲ ନାଏକର ସମ୍ପୃକ୍ତି ଥିଲେ ସୁଦ୍ଧା ତା ମୁଣ୍ଡରେ ଅରୁଣ ସାହୁଙ୍କ ହାତ ଥିବାରୁ ପୋଲିସ ତାକୁ ଗିରଫ କରୁନାହିଁ ବୋଲି ବିଜେପି ପକ୍ଷରୁ ସାଂଘାତିକ ଅଭିଯୋଗ କରାଯାଇଛି । ତେଣୁ ରାଜ୍ୟ ସରକାର ଅରୁଣ ସାହୁଙ୍କୁ ମନ୍ତ୍ରୀ ପଦରୁ ବହିଷ୍କାର କରିବା ସହ ଦୋଷୀମାନଙ୍କୁ ଶୀଘ୍ର ଗିରଫ କରି ପରୀକୁ ନ୍ୟାୟ ପ୍ରଦାନ କରନ୍ତୁ ବୋଲି ଜିଲ୍ଲା ବିଜେପି ପକ୍ଷରୁ ଦାବି କରାଯାଇଛି । ଅନ୍ୟପଟେ ଆଗାମୀ ପୌର ନିର୍ବାଚନ ପାଇଁ ଜିଲ୍ଲା ବିଜେପି ଲୋକଙ୍କ ନିକଟକୁ ଯାଇ ସେମାନଙ୍କ ସମସ୍ୟାର ଭାଗିଦାରୀ ହୋଇ ତାର ସମାଧାନର ରାସ୍ତା ଫିଟାଇବ ବୋଲି ସମୀର ମହାନ୍ତି କହିଛନ୍ତି।