ଚେନ୍ନାଇ୦୬/୦୩ : ତାମିଲନାଡୁ ବିଧାନସଭା ନିର୍ବାଚନ ପାଇଁ ଭାରତୀୟ ଜନତା ପାର୍ଟି ଓ ଏଆଇଏଡିଏମକେ ମଧ୍ୟରେ ଆସନ ଭାଗବଣ୍ଟାକୁ ନେଇ ସହମତି ପ୍ରକାଶ ପାଇଛି । ବିଜେପି ଏଠାରେ ମୋଟ୍ ୨୦ଟି ଆସନରେ ନିର୍ବାଚନ ଲଢିବ । ଏହାବ୍ୟତୀତ କନ୍ୟାକୁମାରୀ ଲୋକସଭା ଆସନରେ ହେବାକୁ ଥିବା ଉପ ନିର୍ବାଚନରେ ମଧ୍ୟ ବିଜେପିର ପ୍ରାର୍ଥୀ ମଇଦାନକୁ ଓହ୍ଲାଇବେ ।
ଏପ୍ରିଲ ୬ ତାରିଖରେ ତାମିଲନାଡୁରେ ବିଧାନସଭା ନିର୍ବାଚନ ଅନୁଷ୍ଠିତ ହେବ । ଏଥିପାଇଁ ସରକାରରେ ଏଆଇଏଡିଏମକେ ଥିବା ଶୁକ୍ରବାର ୬ଟି ଆସନ ପାଇଁ ପ୍ରାର୍ଥୀ ତାଲିକା ଘୋଷଣା କରିଛି । ମୁଖ୍ୟମନ୍ତ୍ରୀ କେ ପଲ୍ଲାନୀସ୍ୱାମୀ ସେଲମ ଆଡାପଡିରେ ଓ ଉପ ମୁଖ୍ୟମନ୍ତ୍ରୀ ଓ ପନୀରସେଲଭମ ବଡିନାୟକ୍କନୁରରୁ ନିର୍ବାଚନ ଲଢିବେ । ସେହିପରି ବରିଷ୍ଠ ନେତା ଡି ଜୟକୁମାର ରୋୟାପୁରମ, ସିବି ସନମୁଗମ ବିଲ୍ଲୁପୁରମରୁ ମୁକାବିଲା କରିବେ ।
ସୂଚନାଯୋଗ୍ୟ, ନିର୍ବାଚନ ଆୟୋଗ ଗତ କିଛିଦିନ ତଳେ ୪ ରାଜ୍ୟ ଓ ଗୋଟିଏ କେନ୍ଦ୍ର ଶାସିତ ପ୍ରଦେଶର ବିଧାନସଭା ନିର୍ବାଚନ ତାରିଖ ଘୋଷଣା କରିଥିଲେ । ତାମିଲନାଡୁ, କେରଳ ଓ ପୁଡୁଚେରୀରେ ଏପ୍ରିଲ ୬ରେ ମତଦାନ ହେବ । ଏହି ଦିନ ମଲପୁରମ ଓ କନ୍ୟାକୁମାରୀ ଲୋକସଭା ଆସନରେ ମଧ୍ୟ ଭୋଟ୍ ଗ୍ରହଣ ହେବ ।
ଏହାମଧ୍ୟରେ କଂଗ୍ରେସ ନେତା କାର୍ତ୍ତି ଚିଦାମ୍ବରମ ଦଳର ରାଜ୍ୟ ନିର୍ବାଚନ ସମିତିଙ୍କ ନିକଟରେ ଏକ ଆବେଦନ କରିଛନ୍ତି । କନ୍ୟାକୁମାରୀ ଲୋକସଭା ଆସନରୁ ପ୍ରିୟଙ୍କା ଗାନ୍ଧୀଙ୍କୁ ପ୍ରାର୍ଥୀ କରାଯାଉ ବୋଲି ସେ ଆବେଦନରେ ଦର୍ଶାଇଛନ୍ତି । ଏହି ନିର୍ବାଚନ ଏପ୍ରିଲ ୬ରେ ଅନୁଷ୍ଠିତ ହେବ ।
