Wednesday, August 21, 2019

Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ପିପିଲି ମାଜିଷ୍ଟ୍ରେଟଙ୍କୁ ଆକ୍ରମଣ ଘଟଣାରେ ବିଜେଡି ବିଧାୟକ ପ୍ରାର୍ଥୀ ପ୍ରଦୀପ ମହାରଥୀଙ୍କ ଗିରଫ ଦାବି କଲେ ବିଜେପି ଓ କଂଗ୍ରେସ

ଭୁବନେଶ୍ୱର ୨୨/୪ : ପିପିଲିରେ ଫ୍ଲାଇଂ ସ୍କାର୍ଡ ମାଜିଷ୍ଟ୍ରେଟ ରବିନାରାୟଣ ପାତ୍ରଙ୍କୁ ଆକ୍ରମଣ ଘଟଣାରେ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛି ବିଜେପି ଓ କଂଗ୍ରେସ | ମାଜିଷ୍ଟ୍ରେଟଙ୍କୁ ନିଜେ ପିପିଲି ବିଧାୟକ ପ୍ରାର୍ଥୀ ପ୍ରଦୀପ ମହାରଥୀ ଆକ୍ରମଣ କରିଛନ୍ତି ବୋଲି ଅଭିଯୋଗ କରିଛି ବିଜେପି | ଏକଥା ମାଜିଷ୍ଟ୍ରେଟ ତାଙ୍କ ମନ୍ତବ୍ୟରେ କହିଛନ୍ତି | ତେଣୁ ପ୍ରଦୀପ ମହାରଥୀଙ୍କୁ ଗିରଫ କରାଯାଉ ବୋଲି ଦାବି କରିଛି ବିଜେପି | ତୁରନ୍ତ ଗିରଫ କରାନଗଲେ ଶ୍ରୀମନ୍ଦିର ସମ୍ମୁଖରେ ବିଜେପି ଧାରଣା ଦେବା ବୋଲି ଦଳ ପକ୍ଷରୁ ଚେତାବନୀ ଦିଆଯାଇଛି | ଧାରଣାରେ ପୁରୀ ଲୋକସଭା ପ୍ରାର୍ଥୀ ସମ୍ବିତ ପାତ୍ର ବସିବେ | ସମ୍ବିତ ପାତ୍ରଙ୍କ ସହ ବିଜେପି ସଭାପତି ବସନ୍ତ ପଣ୍ଡା, ଉପସଭାପତି ସମୀର ମହାନ୍ତି ପ୍ରମୁଖ ନିର୍ବାଚନ ଅଧିକାରୀଙ୍କ ନିକଟରେ ଫେରାଦ ହୋଇଛନ୍ତି |

ସମାନ ଢଂଗରେ ଏହି ଘଟଣାରେ କଂଗ୍ରେସ ମଧ୍ୟ ପ୍ରଦୀପ ମହାରଥୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛି । ଏଥି ସହ ଘଷିପୁରାରେ ଅଧିକ ଫୋର୍ସ ମୁତୟନ ପାଇଁ ମଧ୍ୟ କଂଗ୍ରେସ ଦାବି କରିଛି । ଶିବାନନ୍ଦ ରାୟଙ୍କ ନେତୃତରେ ୧୫ଜଣିଆ କଂଗ୍ରେସ ଦଳ ମୁଖ୍ୟ ନିର୍ବାଚନ ଅଧିକାରୀଙ୍କୁ ସାକ୍ଷାତ କରିଥିଲା । ଗତକାଲି ଘଷିପୁରାରେ ନିରଂଜନ ଓ ବଦ୍ରୀଙ୍କ ସମର୍ଥକ ମୁହାଁମୁହିଁ ହୋଇଥିଲେ । ଏଥିରେ ୧୫ରୁ ଅଧିକ ଗାଡି ଭଙ୍ଗାରୁଜା ହୋଇଥିବାବେଳେ ୬ଜଣ ାହତ ହୋଇଥିଲେ । ୮ଜଣଙ୍କୁ ପୋଲିସ ଗିରଫ କରିଛି । କଂଗ୍ରେସ କର୍ମୀଙ୍କ ଗିରଫ ଦାବୀରେ କଂଗ୍ରେସ ଆନନ୍ଦପୁର ଏସଡିପିଓ କାର୍ଯ୍ୟାଳୟ ଘେରାଉ କରିଛି ।

ସୂଚନାଯୋଗ୍ୟ ଯେ, ଗତକାଲି ରାତିରେ ପିପିଲିରେ ମାଜିଷ୍ଟ୍ରେଟ ପରେ ଆକ୍ରମଣ ହୋଇଥିଲା । ଆକ୍ରମଣରେ ମାଜିଷ୍ଟ୍ରେଟଙ୍କ ସହ ୨ ପୋଲିସ ଅଫିସର ଓ ଭିଡିଓଗ୍ରାଫର ଆହତ ହୋଇଛନ୍ତି | ଭୋଜି ଓ ଟଙ୍କା ବଣ୍ଟା ଚାଲିଥିବା ବେଳେ ଖବର ପାଇ ଫ୍ଲାଇଂ ସ୍କ୍ବାଡ୍ ଏସଏସଟି ଏବଂ ଭିଡିଓ ସର୍ଭିଲାନ୍ସ ଟିମ୍ ଚଢାଉ କରିଥିଲା | ଚଢ଼ାଉ ବେଳେ ପିପିଲି ବିଧାୟକ ପ୍ରଦୀପ ମହାରଥୀଙ୍କ ସମର୍ଥକ ଏମାନଙ୍କ ଉପରେ ଆକ୍ରମଣ କରିଥିବା ଅଭିଯୋଗ ହୋଇଛି | ପ୍ରଦୀପ ମହାରଥୀଙ୍କ ଫାର୍ମ ହାଉସରେ ଚାଲିଥିଲା ଭୋଜି |

450 Views

   ସମ୍ବନ୍ଧିତ ଖବର