ଖୋର୍ଦ୍ଧା ୩।୧: ଚିଲିକାରେ ପକ୍ଷୀଗଣନା ଆରମ୍ଭ ହୋଇଛି । ଆଜି ସିଡିଏ ଚିଲିକା ଉନ୍ନୟନ କର୍ତ୍ତୃପକ୍ଷଙ୍କ ପକ୍ଷରୁ ଗଣନା କାର୍ଯ୍ୟକ୍ରମ ଆରମ୍ଭ ହୋଇଛି । କେବଳ ପକ୍ଷୀ ନୁହନ୍ତି ଚିଲିକାରେ ଥିବା ଡଲଫିନଙ୍କ ସଂଖ୍ୟା ମଧ୍ୟ ଗଣନା କରାଯିବ । ମୁମ୍ବାଇର ବମ୍ବେ ନାଚ୍ୟୁରାଲ ହିଷ୍ଟୋରୀ ଅଫ ସୋସାଇଟର ମୁଖ୍ୟ ଏନ. ବାଲଚନ୍ଦ୍ରନଙ୍କ ନେତୃତ୍ଵରେ ଏହି ଗଣନା କାର୍ଯ୍ୟ ଆରମ୍ଭ ହୋଇଛି । ସିଡିଏ କର୍ମଚାରୀ, ପକ୍ଷୀ ସୁରକ୍ଷା ବାହିନୀ, ପକ୍ଷୀ ବିଶାରଦ, ବନ୍ୟପ୍ରାଣୀ ବିଭାଗ କର୍ମଚାରି, ଓୟୁଏଟି ଛାତ୍ରଛାତ୍ରୀ ଏଥିରେ ସାମିଲ ହୋଇଛନ୍ତି ।
ଏହି ଗଣନାରେ ୧୪୫ ଜଣ ଗଣନାକାରୀ ନିୟୋଜିତ ହୋଇଛନ୍ତି । ବାଇନ-କୁଲାର ଦ୍ଵାରା ଏହି ଗଣନା ଚାଲିଥିବା ବେଳେ ୨୯ଟି ଗ୍ରୁପ କରାଯାଇଛି । ପ୍ରତି ଗ୍ରୁପରେ ୫ ଜଣ ପକ୍ଷୀ ବିଶାରଦ, ଗବେଷକ ଅଛନ୍ତି । ସାତପଡାରେ ୧୧ଟି, ଚନ୍ଦ୍ରାପୁଟରେ ୧୪ଟି ଏବଂ ମଙ୍ଗଳାଯୋଡିରେ ୪ଟି ଗ୍ରୁପ ହୋଇ ଏହି ଗଣନା କରାଯାଉଛି ।
ସେପଟେ ଆସନ୍ତା ୫ରୁ ଚିଲିକା ବନ୍ୟପ୍ରାଣୀ ଡିଭିଜନ ପକ୍ଷରୁ ମଧ୍ୟ ପକ୍ଷୀ ଗଣନା କରାଯିବ । ଏଥିପାଇଁ ଆସନ୍ତାକାଲି ବାଲୁଗାଁ ସ୍ଥିତ ସିଡିଏ କାର୍ଯ୍ୟାଳୟରେ ଏକ ପ୍ରଶିକ୍ଷଣ ଶିବିର ଅନୁଷ୍ଠିତ ହେବ । ପକ୍ଷୀ ବିଶେଷଜ୍ଞମାନେ ପକ୍ଷୀ ଗଣନାକାରୀଙ୍କୁ ଟ୍ରେନିଂ ଦେବେ । ଚିଲିକା ବନ୍ୟପ୍ରାଣୀ ଡିଭିଜନ ଅଧୀନରେ ଥିବା ୫ଟି ରେଞ୍ଜ ଯଥା ଟାଙ୍ଗୀ, ରମ୍ଭା, ନୂଆପଡା, ବାଲୁଗାଁ, ସାତପଡାରେ ହେବ ପକ୍ଷୀ ଗଣନା।