ପାଟନା ୦୬/୧୧ : ବିହାରରେ ବିଷାକ୍ତ ମଦ ଜନୀତ ମୃତ୍ୟୁ ମାମଲା ବୃଦ୍ଧି ପାଇବାରେ ଲାଗିଛି । ଗତକାଲି ବିଷାକ୍ତ ମଦପିଇ ୩୧ ଜଣଙ୍କର ମୃତ୍ୟୁ ଘଟିଥିବା ବେଳେ ଆଜି ସମସ୍ତୀପୁରରେ ୪ ଜଣଙ୍କର ମୃତ୍ୟୁ ଘଟିଛି । ମୃତକଙ୍କ ମଧ୍ୟରେ ୨ ଜଣ ସେନା ଯବାନ ଥିବା ଜଣାପଡିଛି ଏବଂ ଅନ୍ୟ ଦୁଇ ଜଣ ସାଧାରଣ ଲୋକ । ବର୍ତ୍ତମାନ ସୁଦ୍ଧା ଏହି ମାମଲାରେ କାହାରିକୁ ଗିରଫ କରାଯାଇ ନାହିଁ ।
ମଦ ଜନୀତ ମୃତ୍ୟୁ ଲଗାତାର ଭାବେ ବୃଦ୍ଧି ପାଉଥିବା ବେଳେ ରାଜନୀତି ମଧ୍ୟ ସରଗରମ ହେବାରେ ଲାଗିଛି । କାରଣ ବିହାରରେ ମଦ ସମ୍ପୂର୍ଣ୍ଣ ଭାବେ ବ୍ୟାନ୍ ଅଛି । ତଥାପି ଚୋରା ମଦ କାରବାର ବ୍ୟାପକ ମାତ୍ରାରେ ବୃଦ୍ଧି ପାଇବାରେ ଲାଗିଛି । ଯାହା ଫଳରେ ବିଷାକ୍ତ ମଦ ଜନୀତ ମୃତ୍ୟୁ ସଂଖ୍ୟା ବୃଦ୍ଧି ପାଉଛି । ଘଟଣାକୁ ନେଇ ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଘେରିଛନ୍ତି ବିରୋଧୀ ।
ଶନିବାର ମୃତ୍ୟୁବରଣ କରିଥିବା ୪ ଜଣଙ୍କ ମଧ୍ୟରେ ୨ ଜଣ ଭାରତୀୟ ସେନାରେ କାର୍ଯ୍ୟରତ ଯବାନ ଥିବା ବେଳେ ଏହାକୁ ନେଇ ପ୍ରତିକ୍ରିୟା ରଖିଛନ୍ତି ସମସ୍ତୀପୁର ଏସ୍ପି ମାନବଜୀତ ସିଂହ ଡିଲ୍ଲୋ । ସେ କହିଛନ୍ତି, ‘ଭାରତୀୟ ସେନାର ଜଣେ ଯବାନ ମଦ ନେଇକି ଆସିଥିଲେ । ଘଟଣାସ୍ଥଳରୁ ମଦ ବୋତଲ ମଧ୍ୟ ଜବତ ହୋଇଛି । ପୋଲିସ ଘଟଣାର ଯାଞ୍ଚ ଆରମ୍ଭ କରିଛି । ମୃତକ ସେନାର ୨ ଯବାନଙ୍କ ପରିବାର ଲୋକଙ୍କୁ ପଚରାଉଚରା କରାଯିବ ।’
ଗତ ଦୁଇ ଦିନ ମଧ୍ୟରେ ବିଷାକ୍ତ ମଦ ଜନୀତ ମୃତ୍ୟୁ ସଂଖ୍ୟା ବୃଦ୍ଧି ପାଇ ୩୫ରେ ପହଞ୍ଚିଛି । ଗୋପାଳଗଞ୍ଜରେ ବର୍ତ୍ତମାନ ସୁଦ୍ଧା ୨୦ ଜଣଙ୍କ ମୃତ୍ୟୁ ଘଟିଥିବା ବେଳେ, ବେତିୟାରେ ୧୫ ଜଣଙ୍କର ମୃତ୍ୟୁ ହୋଇସାରିଲାଣି । ଏବେ ମଧ୍ୟ ଅନେକ ଲୋକ ଗୁରୁତର ଅବସ୍ଥାରେ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଘଟଣା ପରେ ଅକଳରେ ପଡିଛନ୍ତି ମୁଖ୍ୟମନ୍ତ୍ରୀ ନୀତିଶ କୁମାର । ବିବାଦୀୟ ମନ୍ତବ୍ୟ ଦେଇ ବିରୋଧୀଙ୍କ ସମାଲୋଚନାର ଶିକାର ହୋଇଛନ୍ତି । ବିଷାକ୍ତ ମଦ ମୃତ୍ୟୁ ଘଟଣାକୁ ନେଇ ନୀତିଶ କୁମାର କହିଥିଲେ,‘ବାରମ୍ବାର ମନା କରିବା ପରେ ବି ଲୋକମାନେ ମଦ ପିଉଛନ୍ତି । ତେଣୁ ଯିଏ ବିଷାକ୍ତ ମଦ ପିଇବେ ତାଙ୍କ ଅବସ୍ଥା ଏମିତି ହିଁ ହେବ’ । ନୀତିଶ କୁମାରଙ୍କ ଏଭଳି ବୟାନ ପରେ ବିରୋଧୀ ଜୋରଦାର ଟାର୍ଗେଟ କରିଥିଲେ । ପୂଜା ପରବର୍ତ୍ତୀ ସମୟରେ ମଦ ବନ୍ଦକୁ ନେଇ ସମୀକ୍ଷା ବୈଠକ ଏବଂ ମଦ ବନ୍ଦ ନିୟମକୁ ଆହୁରି କଡାକଡି କରାଯିବ ବୋଲି ସିଏମ୍ ନୀତିଶ କୁମାର କହିଛନ୍ତି ।
