ବାଙ୍କୀ, ୨୩/୧୦: ବାରହା ଉପଦ୍ରବ । ନଷ୍ଟ କରୁଛନ୍ତି ଫସଲ ।ଚିନ୍ତାରେ ଚାଷୀ । ରାତିହେଲେ ହାତରେ ନିଆଁ ହୁଳା ଧରି ଘଉଡାଇବାକୁ ପଡୁଛି ଚାଷୀଙ୍କୁ ।ବନବିଭାଗକୁ ଗୁହାରି କଲେ ବି ଫଳ ଶୂନ ।ଏଭଳି ଘଟଣା ଦେଖିବାକୁ ମିଳିଛି କଟକ ଜିଲ୍ଲା ବାଙ୍କୀ ପାଥପୁର ପଞ୍ଚାୟତର ଚାରିଘରିଆ, କଇଁମୁଣ୍ଡି ଓ ଉପରପାଥପୁର ଆଦି ଅଞ୍ଚଳରେ ।
ଚାଷୀମାନେ ଅଭିଯୋଗ କରିଛନ୍ତି ଯେ, ସନ୍ଧ୍ୟା ହେଲେ ନିକଟସ୍ଥ ଡମପଡା-ଚନ୍ଦକା ଅଭୟାରଣ୍ୟରୁ ଜଙ୍ଗଲୀ ବାରହା ଆସି ଏକର ଏକର ପନିପରିବା ଓ ଧାନ ଫସଲ ନଷ୍ଟ କରୁଛନ୍ତି ।ସେମାନେ ଧାର କରଜ କରି ଜମିରେ ଫସଲ କରିଥିବା ବେଳେ ମହାଜନଙ୍କ କରଜ କିପରି ସୁଝିବେ ସେନେଇ ଚିନ୍ତାରେ ପଡିଛନ୍ତି ।
ସେପଟେ ବନବିଭାଗ ପକ୍ଷରୁ ଏହି ଜଙ୍ଗଲୀ ବାରହାଙ୍କୁ ଘଉଡାଇବା ପାଇଁ କୌଣସି ଠୋସ ପଦକ୍ଷେପ ନିଆଯାଉ ନାହିଁ ବୋଲି ଚାଷୀମାନେ ଅଭିଯୋଗ କରିଛନ୍ତି। ତେବେ ଜମିରେ ଥିବା ପନିପରିବା-ଫସଲର ସୁରକ୍ଷା ଓ ସରକାରୀ ସହାୟତାନେଇ ଚାଷୀମାନେ ଦାବି କରିଛନ୍ତି ।
