ଭଦ୍ରକ ୧।୬: କରୋନା କବଳରୁ ମୁକ୍ତି ଦେବାକୁ ସରକାର ଘୋଷଣା କରିଛନ୍ତି ଲକଡାଉନ ଓ ସଟଡାଉନ । କରୋନା ଦ୍ବିତୀୟ ଲହର ଚାଲିଥିବା ବେଳେ ମନ୍ଦିର, ମସଜିଦରେ ତାଲା ଝୁଲୁଛି । ହେଲେ ପ୍ରଶାସନିକ ନିଷ୍ପତ୍ତି କ୍ରମେ ରୀତିନୀତି ଅନୁଯାଇ ଭଦ୍ରକ ଜିଲ୍ଲାର ପ୍ରସିଦ୍ଧ ଶୈବ ପୀଠର ପୂଜକ ବା ସେବାୟତ ପୂଜାର୍ଚ୍ଚନା କରୁଛନ୍ତି । ଭକ୍ତ ବିନା ପୂଜା ପାଉଛନ୍ତି ଦେବାଦେବୀ ହେଲେ ପୂଜକ ପରିବାର ଜୀବିକାକୁ ନେଇ ଏବେ ଚିନ୍ତାରେ । ଏହିଭଳି ସମସ୍ୟାକୁ ନେଇ ପ୍ରସିଦ୍ଧ ଶୈବପୀଠ ବାବା ଆଖଣ୍ଡଳମଣୀଙ୍କ ପୂଜକମାନେ ବିଭିନ୍ନ ଦାବିକୁ ନେଇ ଜିଲ୍ଲାପାଳଙ୍କୁ ଭେଟିବା ସହ ଦାବିପତ୍ର ପ୍ରଦାନ କରିଛନ୍ତି ।
ତେବେ ବାବା ଆଖଣ୍ଡଳମଣୀଙ୍କ ନୀତିକାନ୍ତି ପାଇଁ ପ୍ରତ୍ୟକ ଦିନ ୧୦ ହଜାରରୁ ଅଧିକ ଟଙ୍କା ଖର୍ଚ୍ଚ ହେଉଛି । ଏମିତି ସମୟରେ କୌଣସି ସହାୟତା ମଧ୍ୟ ମିଳୁନାହିଁ । ତେଣୁ ଆରଡି ମନ୍ଦିରର କେତେକ ସେବାୟତ ପୂର୍ବରୁ ଜିଲ୍ଲା ପ୍ରଶାସନର ସହଯୋଗ ଲୋଡିଥିଲେ । କିନ୍ତୁ ସହଯୋଗ ନ ମିଳିବାରୁ ଏବେ କ୍ଷୋଭର ସହ ଜିଲ୍ଲା ପ୍ରଶାସନକୁ ଭିକ୍ଷା ମାଗିଛନ୍ତି । ସେବାୟତମାନେ କହିଛନ୍ତି ଯେ, ଆମ ସହାୟତା ମାଗିଲୁ ଦେଲେନାହିଁ, ଏବେ ଭିକ ମାଗୁଛୁ ଭିକ ଦିଅ । ନହେଲେ ଆଗାମୀ ଦିନରେ ଆମ ପରିବାର ଲୋକେ ଆସି ଭିକ ମାଗିବେ ।
