ଭୁବନେଶ୍ୱର, ୦୮/୦୭: ରାଜ୍ୟସଭା ସାଂସଦ ତଥା ନରେନ୍ଦ୍ର ମୋଦୀଙ୍କ ମନ୍ତ୍ରିମଣ୍ଡଳରେ ନୂଆକରି ରେଳମନ୍ତ୍ରୀ ହୋଇଥିବା ଅଶ୍ୱିନୀ ବୈଷ୍ଣବ ଗୁରୁବାର ଦାୟିତ୍ୱ ଗ୍ରହଣ କରିଛନ୍ତି । ଦାୟିତ୍ୱ ଗ୍ରହଣ କରିବା ପରେ ସେ ପ୍ରଧାନମନ୍ତ୍ରୀ ମୋଦୀଙ୍କୁ ଧନ୍ୟବାଦ ଜଣାଇଛନ୍ତି । ଏହାସହ ରେଳ ବଭାଗକୁ ନେଇ ରହିଥିବା ମୋଦୀଙ୍କ ଭିଜନକୁ କାର୍ଯ୍ୟକାରୀ କରିବେ ବୋଲି ସେ କହିଛନ୍ତି । ୧୯୯୪ର ଓଡ଼ିଶା କ୍ୟାଡର ଆଇଏଏସ୍ ଅଶ୍ୱିନୀ ବୈଷ୍ଣବ ଚାକିରି ଛାଡ଼ିବା ପରେ ବିଜେପିରେ ଯୋଗ ଦେଇଥିଲେ । ୨୦୧୯ରେ ସେ ଓଡ଼ିଶାରୁ ରାଜ୍ୟସଭାକୁ ନିର୍ବାଚିତ ହୋଇଥିଲେ ।
ପୂର୍ବରୁ କଂଗ୍ରେସ ସରକାରରେ ଓଡିଶାରୁ କାହ୍ନୁଚରଣ ଲେଙ୍କା ରେଳ ରାଷ୍ଟ୍ରମନ୍ତ୍ରୀ ରହିଥିଲେ । ଏହାପରଠୁ ଏହି ଗୁରୁତ୍ୱପୂର୍ଣ୍ଣ ବିଭାଗ ଆଉ ଓଡିଶା ଭାଗରେ ପଡିନଥିଲା । ଏବେ କିନ୍ତୁ ପୁଣି ଓଡିଶାକୁ ଫେରିଛି ଅଶ୍ୱିନୀ । ଏହି ଗୁରୁ ଦାୟିତ୍ୱ ତାଙ୍କୁ ମିଳିଛି । ତେବେ ଲଗାତର ଓଡିଶା ସରକାର ରେଳ ବିଭାଗ ନିକଟରେ ରାଜ୍ୟକୁ ଅବହେଳା ହୋଇଥିଲା କହିଥାନ୍ତି । ଏପରିକି ରାଜ୍ୟର ଅନେକ ପ୍ରକଳ୍ପର କାମ ମଧ୍ୟ ଅଧାପନ୍ତରିଆ ଭାବେ ପଡିରହିଛି । ଅନେକ ଜିଲ୍ଲାକୁ ଏବେବି ରେଳ ସଂଯୋଗ ହୋଇନାହିଁ । ଏଦିଗରେ ଅଶ୍ୱିନୀ ବୈଷ୍ଣବ କାର୍ଯ୍ୟ କରିବେ ବୋଲି ଆଶା କରାଯାଉଛି ।
ରାଜସ୍ଥାନର ଯୋଧପୁରରେ ୧୯୭୦ରେ ଜନ୍ମ ନେଇଥିବା ଅଶ୍ୱିନୀ ଆଇଆଇଟି କାନପୁରରୁ ଏମଟେକ୍ ଶିକ୍ଷାଲାଭ କରିଥିଲେ । ଏହାସହ ସେ ହ୍ୱାରଟନ୍ ସ୍କୁଲ ଅଫ୍ ଦି ୟୁନିଭର୍ସିଟି ଅଫ୍ ପେନସିଲଭାନିଆରୁ ମଧ୍ୟ ଶିକ୍ଷାଗ୍ରହଣ କରିଥିଲେ ।୧୯୯୪ରେ ସେ ସର୍ବଭାରତୀୟ ସ୍ତରରେ ୨୦ ରାଙ୍କ ରଖି ଆଇଏଏସ୍ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ । ଆଇଏଏସ୍ ଚାକିରି କାଳ ଭିତରେ ଅଶ୍ୱିନୀ କଟକ ଓ ବାଲେଶ୍ୱର ଜିଲ୍ଲାପାଳ ଭାବେ କାର୍ଯ୍ୟ କରିଥିଲେ । ୨୦୦୩ ପର୍ଯ୍ୟନ୍ତ ସେ ଓଡ଼ିଶାରେ ରହି କାମ କରିଥିଲେ । ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ସମୟରେ ସେ ପ୍ରଧାନମନ୍ତ୍ରୀ କାର୍ଯ୍ୟାଳୟରେ ଉପସଚିବ ଥିଲେ ।
୨୦୧୦ରେ ସେ ଆଇଏଏସ୍ ଚାକିରି ଛାଡ଼ି ଜିଇ ଟ୍ରାନ୍ସପୋର୍ଟେସ୍ନର ପରିଚାଳନା ନିର୍ଦ୍ଦେଶକ ଓ ପରେ ସିମେନ୍ସ କମ୍ପାନିର ଉପସଭାପତି ଭାବେ କାର୍ଯ୍ୟ କରିଥିଲେ । ସରହରାଞ୍ଚଳ ଭିତ୍ତିଭୂମି ଓ ଲୋକୋମୋଟିଭ୍ସ ତାଙ୍କ ବେଶ ଅଭିଜ୍ଞତା ରହିଛି । ପ୍ରଶାସନିକ ସ୍ତରରେ ନିଜ ଦକ୍ଷତା ପ୍ରମାଣିତ କରିବା ପରେ ରାଜନୀତିରେ ନୂଆ ଇନିଂସ ଆରମ୍ଭ କରିଛନ୍ତି । ମୋଦିଙ୍କ ମନ୍ତ୍ରୀମଣ୍ଡଳରେ ଅଶ୍ୱିନୀ ସ୍ଥାନ ପାଇବେ ବୋଲି ବେଶ୍ କିଛି ଦିନ ହେବ ଆଲୋଚନା ହେଉଥିଲା । ପ୍ରଥମ ଥର ସାଂସଦ ହୋଇ ମଧ୍ୟ ସିଧା କ୍ୟାବିନେଟ ମନ୍ତ୍ରୀ ପଦ ମିଳିବା ପରେ ଅଶ୍ୱିନୀ ଜାତୀୟସ୍ତରରେ ବି ଚର୍ଚ୍ଚାକୁ ଆସିଛନ୍ତି ।
