ଆସିକା୧୨|୧୦: ବନ୍ୟା ପାଣିରେ ବୁଡ଼ିଲା ଆସ୍କା । ତିତଲି ପ୍ରଭାବରେ ଋଷିକୁଲ୍ୟା ଓ ବଡ଼ନଦୀରେ ବନ୍ୟା ଆସିଥିବା ବେଳେ ଆସ୍କା ସହର ହୋଇଛି ଉବୁଟୁବୁ । ସହର ଭିତରେ ୬-୭ ଫୁଟ ଉଚ୍ଚର ପାଣି । ଲୋକଙ୍କ ଅବସ୍ଥା କହିଲେ ନସରେ । ତିତଲି ବୁଡ଼ାଇ ଦେଲା । ଏ ଦୃଶ୍ୟ ଗଞ୍ଜାମ ଆସ୍କାର । ଯୁଆଡ଼େ ଚାହିଁବ ଖାଲି ପାଣି ଆଉ ପାଣି । ଆସ୍କା ସହର ପୂରା ବୁଡ଼ି ଯାଇଛି । ଯେଉଁଠି ରାସ୍ତା ଉପରେ ୬-୭ ଫୁଟର ପାଣି, ସେଠି ଘର କଥା ବା ପଚାରେ କିଏ ? ମେଡିକାଲ୍ ଭିତରେ ପାଣି ପଶି ଯାଇଛି । ବଡ଼ନଦୀ ଓ ଋଷିକୁଲ୍ୟାର ଉଛୁଳା ପାଣି କାଲି ରାତିରେ ସହର ଭିତରେ ପଶିବା ଆରମ୍ଭ କଲା । ଆଉ ରାତି ପାହିଲା ବେଳକୁ ଯିଏ ଯେଉଁଠି ଅଛନ୍ତି, ସେଇଠି । ହାଲ୍ ଦେଖି ଲୋକଙ୍କ ହଲକ୍ ଶୁଖିଗଲା ।
ଆସ୍କା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ବନ୍ୟା ପାଣି ଘେରରେ । ସ୍ବାସ୍ଥ୍ୟକେନ୍ଦ୍ରର ସ୍ବାସ୍ଥ୍ୟ ବିଗାଡ଼ି ଦେଇଛି । ୫ ଟି ଆମ୍ବୁଲାନ୍ସ ଅଧା ବୁଡ଼ିଯାଇଛି । ମେଡିକାଲ୍ ଓ ଆମ୍ବୁଲାନ୍ସ ଅବସ୍ଥା ଯଦି ଏମିତି, ଲୋକଙ୍କ ଦେହପା ଖରାପ ହେଲେ ସେମାନେ କୁଆଡ଼େ ଯିବେ ? ଅଧିକାଂଶ ସ୍ଥାନରେ ଘଣ୍ଟା ଘଣ୍ଟା ଧରି ଛାତ ଉପରେ ରହିଛନ୍ତି ଲୋକେ । ଓଡ୍ରାଫ୍ ଏବଂ ଏନଡିଆରଏଫ୍ ଟିମ୍, ପାଣି ଘେରରେ ଥିବା ଲୋକଙ୍କୁ ଉଦ୍ଧାର କରିବାରେ ଲାଗିଛନ୍ତି । ଋଷିକୁଲ୍ୟା ନଦୀର ବାମ ପଟେ ୬ଟି ଓ ଡାହାଣ ପଟେ ୪ଟି ବୋଟ୍ ଲାଗିଛି ।
ଆସ୍କା ସହରର ମଧୁସୂଦନ ନଗର, ଲକ୍ଷ୍ମୀବଜାର, ପାକଲାଗୁଲି, ଗାନ୍ଧିନଗର, ସୁନାମ୍ବ ସାହି, ତହସିଲ୍ ଓ ବ୍ଲକ୍ ଅଫିସ୍, ଲାଲାଶାସନ, ସବ୍ ଜେଲ୍, ବାଣୀବିହାର, ବସଷ୍ଟାଣ୍ଡ ଆଦି ଏରିଆ ପୂରା ପାଣି ଘେରରେ । ହଜାର ହଜାର ଲୋକ ଫସି ରହିଥିବା ବେଳେ ସ୍ଥାନୀୟ ଲୋକଙ୍କୁ ଧରି ଉଦ୍ଧାର କାମରେ ଲାଗିଛି ପ୍ରଶାସନ ।ଲୋକଙ୍କ ପାଖରେ ରନ୍ଧାଖାଦ୍ୟ ପୁଡ଼ିଆ ପହଞ୍ଚାଇବାକୁ ବ୍ୟବସ୍ଥା କରାଯାଇଛି । ତେବେ ପ୍ରଶାସନର ସହାୟତା ସମୁଦ୍ରକୁ ଶଂଖେ ବୋଲି କହିଛନ୍ତି ପ୍ରବାବିତ ଲୋକେ । ଦୀର୍ଘ ୧୨ ଘଣ୍ଟା ଧରି ପାଣି ଘରରେ ରହିବାପରେ ଅପରାହ୍ନରେ ଅଗ୍ନିଶମ ବାହିନୀ ୬ଟି ଡଂଗାରେ ବିପନ୍ନ ଲୋକଙ୍କୁ ଉଦ୍ଧାର କାର୍ଯ୍ୟ ଆରମ୍ଭ କରିଛି।