ସମ୍ବଲପୁର ୧୪।୧୦: ସମ୍ବଲପୁର ନାକଟିଦେଉଳ ଥାନା ଏଏସଆଇ ଗୁରୁଚରଣ ବେହେରାଙ୍କୁ ନିଲମ୍ବିତ କରାଯାଇଛି । ବଟି ଆଦାୟ ଅଭିଯୋଗରେ ଗୁରୁଚରଣକୁ ନିଲମ୍ବିତ କରିଛନ୍ତି ସମ୍ବଲପୁର ଏସପି ଡକ୍ଟର କନଓ୍ବର ବିଶାଲ ସିଂ ।

ସୂଚନା ଅନୁସାରେ ଗତ ୨୮ ତାରିଖରେ ଚନ୍ଦ୍ରପୁର ଅଞ୍ଚଳରେ ହୋଇଥିବା ସଡକ ଦୁର୍ଘଟଣାରେ ଟ୍ରକ ଜବତ ହୋଇଥିଲା । ଜବତ ଟ୍ରକକୁ ଛାଡିବା ପାଇଁ ଏଏସଆଇ ଗୁରୁଚରଣ ୧୫ ହଜାର ଟଙ୍କା ଲାଞ୍ଚ ମାଗିଥିଲେ । ଏନେଇ ଏସପିଙ୍କ ନିକଟରେ ଗାଡି ମାଲିକ ଅଭିଯୋଗ କରିଥିଲେ । ପରେ ସମ୍ପୃକ୍ତ ଘଟଣାର ତଦନ୍ତ କରିବା ପାଇଁ ଅତିରିକ୍ତ ଏସପି ଅମରେଶ ପଣ୍ଡାଙ୍କୁ ନିର୍ଦ୍ଦେଶ ଦେଇଥିଲେ ଏସପି । ତେବେ ଅଭିଯୋଗ ସତ ପ୍ରମାଣିତ ହେବା ପରେ ଏଏସଆଇଙ୍କୁ ଏସପି ନିଲମ୍ବିତ କରିଛନ୍ତି ।