ଲକ୍ଷ୍ନୌ ୧୩।୮: କଂଗ୍ରେସ ମୁଖପାତ୍ର ରାଜୀବ ତ୍ୟାଗୀଙ୍କ ପରଲୋକକୁ ନେଇ ରାଜନୀତି ଏବେ ଉଷ୍ମ ହେବାରେ ଲାଗିଛି। ଉତ୍ତରପ୍ରଦେଶ କଂଗ୍ରେସ ନେତା ଅଂଶୁ ଅବସ୍ଥୀ ଏ ନେଇ ହଜରତଗଞ୍ଜ ଥାନାରେ ଏକ ଏତଲା ରୁଜୁ କରିଥିବା ବେଳେ ଏଥିରେ ବିଜେପି ନେତା ସମ୍ବିତ ପାତ୍ର, ନ୍ୟୁଜ୍ ଚାନେଲ ମାଲିକ ଓ ଆଙ୍କରଙ୍କୁ ଅଭିଯୁକ୍ତ କରିଛନ୍ତି।
ଅବସ୍ଥି ତାଙ୍କ ଅଭିଯୋଗରେ ଦେଶର ଗଣମାଧ୍ୟମ ଲୋକଙ୍କ ମନରେ ଯେପରି ବିଷ ସିଞ୍ଚନ କରୁଛନ୍ତି କଂଗ୍ରେସ ମୁଖପାତ୍ର ନିଜର ପ୍ରାଣ ଦେଇ ତାହା ପ୍ରମାଣିତ କରିଛନ୍ତି। ଯଦି ଏବେଠାରୁ ବୈଦୁତିକ ଗଣମାଧ୍ୟମଙ୍କ ଏପରି କାର୍ଯ୍ୟପ୍ରତି ଧ୍ୟାନ ଦିଆ ନ ଯାଏ ତେବେ ଦେଶରେ ଆଗକୁ ଏହା ନିୟମିତ ଘଟଣାରେ ପରିଣତ ନ ହେବା ତାହା କୁହାଯାଇ ନପାରେ ବୋଲି ଅବସ୍ଥି ଅଭିଯୋଗ କରିବା ସହ ବୈଧାନିକ କାର୍ଯ୍ୟାନୁଷ୍ଠାନ ଦାବି କରିଛନ୍ତି।
ମାମଲାରେ ଅବସ୍ଥି ନ୍ୟୁଜ୍ ଚାନେଲ ମାଲିକ ଅଋଣପୁରୀ, ଆଙ୍କର ରୋହିତ ସରଦାନା, ବିଜେପି ମୁଖପାତ୍ର ସମ୍ବିତପାତ୍ର ଓ ଅନ୍ୟମାନଙ୍କ ବିରୋଧରେ ହତ୍ୟା, ସାର୍ବଜନିକ ସ୍ଥଳରେ ଅପମାନିତ କରିବା, ନକଲୀ ହିନ୍ଦୁ କହି ଧାର୍ମିକ ଭାବନାକୁ ଆଘାତ ଦେବା ଓ ଏଥିଲାଗି ବ୍ୟକ୍ତିଗତ ଆକ୍ରମଣ କରିବା ନେଇ ଅଭିଯୋଗ କରିଛନ୍ତି। ପୋଲିସ ଅବସ୍ଥିଙ୍କଠାରୁ ଏତଲା ଗ୍ରହଣ କରିବା ସହ ଆଗାମୀ କାର୍ଯ୍ୟାନୁଷ୍ଠାନ ଗ୍ରହଣ କରିଛି।