ନୂଆଦିଲ୍ଲୀ ୧୧/୦୧ : ବଲିଉଡର ଲୋକପ୍ରିୟ ଅଭିନେତା ଅନିଲ କପୁର ନିଜ ଚଳଚିତ୍ର ମାଧ୍ୟମରେ ଲୋକଙ୍କ ହୃଦୟ ଜିତିବା ପାଇଁ କୌଣସି ପ୍ରୟାସ ଛାଡ଼ିନାହାଁନ୍ତି | କ୍ୟାରିୟର ଆରମ୍ଭ ଠାରୁ ଏ ପର୍ଯ୍ୟନ୍ତ, ଅନେକ ସମୟରେ ବ୍ଲକବଷ୍ଟର୍ ଚଳଚିତ୍ର ମାଧ୍ୟମରେ ନିଜର ସ୍ବତନ୍ତ୍ର ଏକ ପରିଚୟ ସୃଷ୍ଟି କରିପାରିଛନ୍ତି । ଏହାରି ମଧ୍ୟରେ ଆଉ ଏକ ବଡ ଖୁଲାସା କରିଛନ୍ତି ଅନିଲ କପୁର । ଏକ ଇଣ୍ଟରଭ୍ୟୁରେ ସେ କହିଛନ୍ତି, ଏମିତି ବି କିଛି ଫିଲ୍ମ ଅଛି , ଯାହାକୁ ସେ କେବଳ ଟଙ୍କା ପାଇଁ କରିଛନ୍ତି । ସେ କହିଛନ୍ତି ସେତେବେଳେ ତାଙ୍କ ପରିବାର ଘୋର ଆର୍ଥିକ ସଙ୍କଟରେ ଥିଲା ଏବଂ ତାଙ୍କୁ ଯେଉଁ ଫିଲ୍ମ ପାଇଁ ଅଫର ମିଳୁଥିଲା, ଟଙ୍କା ପାଇଁ ସେ ତାହାକୁ କରିବା ପାଇଁ ରାଜି ହୋଇଯାଉଥିଲେ ।
ଫିଲ୍ମ 'ଅନ୍ଦାଜ୍' ଏବଂ 'ହୀର୍ ରାଞ୍ଝା' ସେ କେବଳ ଟଙ୍କା ପାଇଁ କରିଥିଲେ ବୋଲି କହିଛନ୍ତି |ଅନିଲ କପୁର କହିଛନ୍ତି ‘ଫିଲ୍ମ 'ରୂପ କି ରାନୀ' ଏବଂ 'ଚୋରୋଁ କା ରାଜା' ପରେପରେ ପରିବାରର ଆର୍ଥିକ ପରିସ୍ଥିତି ସଙ୍କଟ ରେ ଆସିଯାଇଥିଲା ଏବଂ ଆମକୁ ଯାହା ଅଫର ମିଳିଥିଲା କରିଥିଲୁ | ଏହାକୁ ସ୍ୱୀକାର କରିବାରେ ମୁଁ ସଂକୋଚ କରୁନାହିଁ’ | ରୂପ କି ରାନୀ ଏବଂ ଚୋରୋଁ କା ରାଜା ଯାହକି ୧୯୯୩ ମସିହାରେ ରିଲିଜ ହୋଇଥିଲା କିନ୍ତୁ ପରେ ଏହି ଦୁଇଟି ଫିଲ୍ମ ସୁପର ଫ୍ଲପ୍ ହୋଇଯାଇଥିଲା |
ଅନିଲ ଆହୁରି ମଧ୍ୟ କହିଛନ୍ତି, ‘ମୋ ପରିବାର ଆଉ ମୁଁ ଭାଗ୍ୟଶାଳୀ କି ସେହି ସମୟଗୁଡିକ ଚାଲିଯାଇଛି ଏବଂ ସେବେଠାରୁ ଆଜି ପର୍ଯନ୍ତ ଆମର ପରିସ୍ଥିତି ଏତେ କଠିନ କେବେ ହୋଇନାହିଁ | କିନ୍ତୁ ଯଦି ପୁଣିଥରେ ସେଭଳି ସମୟ ଆସେ କିମ୍ବା ଆମକୁ ଖରାପ ସମୟରେ ଗତିକରିବାକୁ ପଡିବ , ତାହେଲେ ମୁଁ ସେ କାମ କରିବାକୁ ପୁନର୍ବାର ଚାହିଁବିନି । ସେ ଏହା ମଧ୍ୟ କହିଛନ୍ତି ଯଦି ନିଜକୁ ଚଳଚ୍ଚିତ୍ର ଜଗତରେ କ୍ୟାରିୟର ଗଢିବାକୁ ଅଛି ତାହେଲେ ତୁମକୁ ନିଜର ସବୁକିଛି ଦେବାପାଇଁ ପ୍ରସ୍ତୁତ ହେବାକୁ ପଡିବ | ଏଥିରେ ଲାଗି ରହିବା ପାଇଁ ସାହସ ଏବଂ ଉତ୍ସାହ ଦରକାର ବୋଲି ଅନିଲ କପୁର କହିଛନ୍ତି ।