ରଣପୁର ୨୧।୦୬: ବିଜ୍ଞାନ ଯୁଗରେ ଏବେ ବି ଗୁଣି ଗାରେଡିର ପ୍ରଭାବ ରହିଥିବା ଦେଖିବାକୁ ମିଳିଛି । ନୟାଗଡ ଜିଲ୍ଲା ରଣପୁର ଥାନା ମହତପଲ୍ଲା ପଞ୍ଚାୟତର ଭଳିଆମାଳ ଗାଁରେ ଶନିବାର ରାତିରେ ଏହିପରି ଏକ ଅଭାବନୀୟ ଘଟଣା ଘଟିଥିବା ଦେଖିବାକୁ ମିଳିଛି ।
ଗୁଣି ଗାରେଡି ସନ୍ଦେହରେ ଭଳିଆମାଳ ଗାଁର ଜଣେ ଯୁବକଙ୍କୁ ଗ୍ରାମବାସୀମାନେ ଘରୁ ଘୋଷାରି ଆଣିଥିଲେ । ଗାଁ ଠାକୁରାଣୀଙ୍କ ପାଖରେ ଚୁଲିରେ ବସିଥିବା ହଣ୍ଡାରେ ଫୁଟୁଥିବା ଗରମ ପାଣିରେ ଜବରଦସ୍ତି ହାତକୁ ବୁଡାଇ ଦେଇଥିଲେ । ଯୁବକ ଜଣଙ୍କ କଷ୍ଟରେ ଚିତ୍କାର କରିଥିଲେ ମଧ୍ୟ ଗ୍ରାମବାସୀମାନେ ତାର କଷ୍ଟକୁ କର୍ଣ୍ଣପାତ କରିନଥିଲେ । ଏତିକିରେ ଗ୍ରାମବାସୀଙ୍କ ରାଗ ଶାନ୍ତ ହୋଇନଥିଲା । ହାତକୁ ଫୁଟନ୍ତା ପାଣିରେ ପୋଡିବା ପରେ ଗାଁର କିଛି ଲୋକ ଯୁବକଙ୍କୁ ମାଡ଼ ମାରିଥିଲେ । ଫଳରେ ଯୁବକ ଜଣଙ୍କ ହାତ ପୋଡି ଯାଇ ଫୋଟକା ଉଠି ଯାଇଛି । ଯୁବକ ଜଣକ ହେଲେ ବସନ୍ତ ଦିହୁରି, ବୟସ – ୪୫ ବର୍ଷ । ସେଠାରୁ ଯୁବକଙ୍କୁ ପରିବାର ଲୋକେ ଉଦ୍ଧାର କରି ରଣପୁର ଡାକ୍ତରଖାନାକୁ ଚିକିତ୍ସା ନିମନ୍ତେ ଆଣି ଭର୍ତ୍ତି କରିଥିଲେ । ଡାକ୍ତରଖାନାରେ ତାଙ୍କର ଚିକିତ୍ସା ଜାରି ରହିଛି ।
