ନ୍ୟୁୟର୍କ, ୧୨|୦୭: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବେଯାଏଁ ମାସ୍କ ପିନ୍ଧିବାକୁ ମନା କରୁଥିଲେ । ମାର୍ଚ୍ଚ ମାସରେ ଆରମ୍ଭ ହୋଇଥିବା କରୋନା ଆତଙ୍କ ପରେ ମଧ୍ୟ ସେ ପ୍ରଥମ ଥର ପାଇଁ ଶନିବାର ସାର୍ବଜନିକ ଭାବେ ମାସ୍କ ପରିଧାନ କରିଛନ୍ତି । ଆମେରିକାରେ ଏବେସୁଦ୍ଧା କରୋନାରେ ୩୨ ଲକ୍ଷ ଲୋକ ସଂକ୍ରମିତ ହୋଇଥିବା ବେଳେ ୧ ଲକ୍ଷ ୩୪ ଜଣ ପ୍ରାଣ ହରାଇଛନ୍ତି । ତେବେ ଟ୍ରମ୍ପ ପ୍ରଥମ ଥର ପାଇଁ ସ୍ୱାସ୍ଥ୍ୟ ବିଭାଗର ନିର୍ଦ୍ଦେଶ ମାନିଛନ୍ତି ।
ଟ୍ରମ୍ପ ଶନିବାର ବୋଲ୍ଟର ରିଡ୍ ନ୍ୟାଶନାଲ ମିଲଟାରୀ ମେଡିକାଲ ସେଣ୍ଟରକୁ କରୋନା ଆକ୍ରାନ୍ତଙ୍କ ହାଲଚାଲ୍ ପଚାରିବାକୁ ଯାଇଥିଲେ । ଏହି ହସ୍ପିଟାଲ ଓ୍ୱାଶିଂଟନ ଉପନଗରରେ ରହିଛି । ସେହି ସମୟରେ ସେ ମାସ୍କ ପିନ୍ଧିଥିବା ଦେଖିବାକୁ ମିଳିଥିଲା । ଏହାସହ ସାମ୍ବାଦିକଙ୍କୁ ମଧ୍ୟ ହସ୍ପିଟାଲକୁ ଆସିଲେ ମାସ୍କ ପରିଧାନ କରିବା ଉଚିତ ବୋଲି ସେ କହିଥିଲେ ।
ଆମେରିକା ରାଷ୍ଟ୍ରପତି ହସ୍ପିଟାଲରେ ପହଁଚିବା ପରେ ତୁରନ୍ତ ମାସ୍କ ପିନ୍ଧିଥିଲେ । ତେବେ ସେ ହେଲିକପ୍ଟରରୁ ଓ୍ୱେଲଟର୍ ରୀଡ୍ ପହଁଚିବା ପରେ ମାସ୍କ ପିନ୍ଧିନଥିଲେ । କରୋନା ମହାମାରୀ ସମୟରୁ ଏବେସୁଦ୍ଧା ଟ୍ରମ୍ପ ସବୁଠାରୁ ବିଳମ୍ବରେ ମାସ୍କ ପିନ୍ଧିଥିବାଙ୍କ ମଧ୍ୟରୁ ଜଣେ ହୋଇଯାଇଛନ୍ତି ।
