ନୂଆଦିଲ୍ଲୀ ୦୭/୦୧ : ଆମେରିକାରେ ନବ ନିର୍ବାଚିତ ରାଷ୍ଟ୍ରପତି ଜୋ ବାଇଡେନ ଏବଂ ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ ଛକା ପଞ୍ଝା ଲାଗି ରହିଛି । ଟ୍ରମ୍ପଙ୍କ ସମର୍ଥକମାନେ ରାଜରାସ୍ତାରେ ହିଂସା ଜାରି ରଖିଛନ୍ତି । ଆମେରିକା ପୋଲିସ ଏବଂ ଲୋକଙ୍କ ମଧ୍ୟରେ ଧସ୍ତା ଧସ୍ତି ମଧ୍ୟରେ ୪ ଜଣଙ୍କର ମୃତ୍ୟୁ ମଧ୍ୟ ହୋଇସାରିଲାଣି ।
ତେବେ ଏହାରି ମଧ୍ୟରେ ଆଉ ଏକ ବଡ ଖବର ସାମ୍ନାକୁ ଆସିଛି । ଗୋଟିଏ ପଟେ ହିଂସାକାଣ୍ଡ ଜାରି ରହିଥିବା ବେଳେ ଅନ୍ୟ ପଟେ ଆମେରିକା କଂଗ୍ରେସ ଜୋ ବାଇଡେନ୍ଙ୍କ ବିଜୟ ଉପରେ ମୋହର ଲଗାଇଦେଇଛନ୍ତି । ଆମେରିକା ରାଷ୍ଟ୍ରପତି ହେବା ପାଇଁ ମୋଟ ୨୭୦ ଇଲେକ୍ଟୋରାଲ ଭୋଟ ଦରକାର ଥିବାବେଳେ ଜୋ ବାଇଡେନଙ୍କୁ ମିଳିଛି ମୋଟ ୩୦୬ ଭୋଟ । ଆମେରିକା କଂଗ୍ରେସ ମଞ୍ଜୁରୀ ଦେବା ପରେ ଜୋ ବାଇଡେନ ବିଧିବଦ୍ଧଭାବେ ରାଷ୍ଟ୍ରପତି ହେବେ ।
ଏହାକୁ ନେଇ ଅସନ୍ତୁଷ୍ଟ ଡୋନାଲ୍ଡ ଟ୍ରମ୍ପ କହିଛନ୍ତି, ସେ ନିର୍ବାଚନ ଫଳାଫଳକୁ ସମର୍ଥନ କରୁନାହାନ୍ତି । ଏହା ପରେ ମଧ୍ୟ ସତ୍ତାକୁ ଜୋ ବାଇଡେନଙ୍କୁ ସଠିକ ଭାବେ ଆମନ୍ତ୍ରଣ କରାଯିବ ବୋଲି ଟ୍ରମ୍ପ କହିଛନ୍ତି । ତେବେ ଡୋନାଲ୍ଡ ଟ୍ରମ୍ପ କିନ୍ତୁ ପରାଜୟକୁ ସ୍ବୀକାର କରିନାହାନ୍ତି ଏବଂ କୋର୍ଟରେ ଏହାକୁ ଚ୍ୟାଲେଞ୍ଜ କରିବାକୁ ଘୋଷଣା କରିଛନ୍ତି ।
ସେପଟେ ଆମେରିକା କଂଗ୍ରେସ ମୋହର ମାରିବା ପରେ ଜୋ ବାଇଡେନ ଜାନୁୟାରୀ ୨୦ରେ ଆମେରିକାରର ରାଷ୍ଟ୍ରପତି ଭାବେ ଶପଥ ନେବେ ବୋଲି ଆପାତତ ସ୍ପଷ୍ଟ ହୋଇସାରିଛି । ଏହା ପୂର୍ବରୁ ଟ୍ରମ୍ପଙ୍କ ସମର୍ଥକମାନେ ଓ୍ବାଶିଂଟନର କ୍ୟାପିଟାଲ ସିଟିରେ ଜୋରଦାର ହଂଗାମା କରିଛନ୍ତି । ଏହି ବିକ୍ଷୋଭ ପ୍ରଦର୍ଶନ ମଧ୍ୟରେ ୪ଜଣ ସାଧାରଣ ଲୋକଙ୍କର ମୃତ୍ୟୁ ଘଟିଥିବା ସୂଚନା ମିଳିଛି ।
ଜୋ ବାଇଡେନ ଏବଂ ଆମେରିକାର ପୂର୍ବତନ ରାଷ୍ଟ୍ରପତି ବାରାକ ଓବାମା ଏହି ହିଂସାକାଣ୍ଡର ଦୃଢ ନିନ୍ଦା କରିଛନ୍ତି । ଏଥିପାଇଁ ଡୋନାଲ୍ଡ ଟ୍ରମ୍ପ ହିଁ ଦାୟୀ ବୋଲି ବାରାକ ଓବାମା ଅଭିଯୋଗ କରିଛନ୍ତି । ବାଇଡେନ କହିଛନ୍ତି ଏହି ହିଂସାକାଣ୍ଡ ପାଇଁ ଟ୍ରମ୍ପ ତୁରନ୍ତ କ୍ଷମା ମାଗିବା ଉଚିତ ।
