Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ବଞ୍ଚିଛି ମାନବିକତା

14/08/2018 at 7:42 AM

କୋରାପୁଟ ୧୪/୮ : ସଂସାରରେ ଯେ ମାନବିକତା ବଂଚି ରହିଛି ତାହା ଆଜି କୋରାପୁଟ ଆମ୍ବୁଲାନ୍ସ ଡ୍ରାଇଭର ଶଙ୍କର ପଟ୍ଟନାୟକଙ୍କ କାର୍ଯ୍ୟରୁ ବେଶ ପ୍ରମାଣିତ ହୋଇଛି । ଘଟଣାଟି ଘଟିଛି ଏହିପରି । ଆଜି ସକାଳେ ଶଙ୍କର କୋରାପୁଟରୁ ଜଣେ ରୋଗୀଙ୍କୁ ବିଶାଖାପାଟଣାର ଏକ ଘରୋଇ ଡାକ୍ତରଖାନାରେ ଭର୍ତ୍ତି କରାଇ ଫେରି ଆସୁଥିବା ବେଳେ ରାସ୍ତାକଡ଼ରେ ଚାରିଜଣଙ୍କ ପ୍ରାଣମୂର୍ଚ୍ଛା ଚିତ୍କାର ଶୁଣିବାକୁ ପାଇଲେ । ବିଶାଖାପାଟଣା ଭଳି ସହରରେ ଓଡ଼ିଆ ଭାଷା ରେ ଚିତ୍କାର ଶୁଣି ଆମ୍ବୁଲାନ୍ସ କୁ ତାଙ୍କ ଆଡକୁ ମୁହାଁଇଲେ । ପଚାରି ବୁଝିଲା ବେଳକୁ ଜଣାପଡ଼ିଲାଯେ ସେମାନେ ସମସ୍ତେ କୋରାପୁଟ ଜିଲ୍ଲା ବୈପାରିଗୁଡ଼ା ବ୍ଲକ ଅଂଚଳର ଯୁବକ । ବୈପାରିଗୁଡ଼ା ଅଂଚଳର ଜଣେ ଦଲାଲ ବିଶାଖାପାଟଣା ର ଗାଜୁବାକା ଅଂଚଳରେ କୌଣସି ଏକ ଠିକାଦାର ପାଖରେ ସେମାନଙ୍କୁ ଛାଡ଼ିଦେଇ ଫେରିଯାଇଥିଲା । ଠିକାଦାର ଦିନରାତି ଖଟେଇଲା ପରେ ମଧ୍ୟ କୌଣସି ମଜୁରୀ ନ ଦେବାରୁ ସେମାନେ କାମ କରୁଥିବା ସ୍ଥାନରୁ ଘରମୁହାଁ ହୋଇ ପ୍ରାୟ ୨୦ କିଲୋମିଟର ଚାଲି ଚାଲି ସେହି ସ୍ଥାନକୁ ପହଁଞ୍ଚିଥିଲେ । ସେମାନଙ୍କ ହାତରେ ପାଇସାଟିଏ ନଥିଲା। କିନ୍ତୁ ପେଟରେ ପ୍ରବଳ ଭୋକ । ସେମାନଙ୍କ ବିକଳ ଭାବକୁ ଦେଖି ଶଙ୍କର ସେମାନଙ୍କୁ ତୁରନ୍ତ ଗୋଟାଏ ହୋଟେଲକୁ ନେଇ ପେଟପୁରା ଖାଇବାର ବନ୍ଦୋବସ୍ତ କରିବା ପରେ ତାଙ୍କ ଗାଡିରେ ବସାଇ କୋରାପୁଟ ପର୍ଯ୍ୟନ୍ତ ନେଇଆସିଲେ । କୋରାପୁଟରେ ପହଂଚିଲା ବେଳକୁ ସନ୍ଧ୍ୟା ୫ଟା ହୋଇଯାଇଥିବା ଯୋଗୁଁ ଲେବର କାର୍ଯ୍ୟାଳୟ ବନ୍ଦ ହୋଇସାରିଥିଲା । ଶଙ୍କର କୋରାପୁଟ ପ୍ରେସକ୍ଲବର ସଭାପତି ଓ ଶୋଭା ସ୍ବେଚ୍ଛାସେବୀ ସଂସ୍ଥା ସହ ଯୋଗାଯୋଗ କରିବା ପରେ ସେହି ଚାରିଜଣଙ୍କୁ ସେମାନଙ୍କ ଘରକୁ ପଠାଇବାର ବ୍ୟବସ୍ଥା କରିଥିଲେ ।

   Related Posts