ଆଜିଠାରୁ ପବିତ୍ର ଅମରନାଥ ଯାତ୍ରା ଆରମ୍ଭ । ଏଥିପାଇଁ ପଞ୍ଜୀକୃତ ହୋଇଛନ୍ତି ୨ଲକ୍ଷ ୧୨ହଜାର ଯାତ୍ରୀ । କଡା ନିରାପତ୍ତା ମଧ୍ୟରେ ଜମ୍ମୁର ଭଗୱନ୍ତ ନଗରସ୍ଥିତ ବେସ କ୍ୟାମ୍ପରୁ ପ୍ରଥମ ପର୍ଯାୟରେ କିଛି ଶ୍ରଦ୍ଧାଳୁ କାଶ୍ମୀର ସ୍ଥିତ କ୍ୟାମ୍ପରେ ପହଞ୍ଚିଛନ୍ତି । ଏହି ଶ୍ରଦ୍ଧାଳୁମାନେ କାଶ୍ମୀର ସ୍ଥିତ କ୍ୟାମ୍ପରୁ ୩୮୮୦ ମିଟର ଉଚ୍ଚରେ ଥିବା ଗୁମ୍ଫାକୁ ଚାଲା ଚାଲି ଯିବେ । ଅଗଷ୍ଟ ୨୬ତାରିଖ ଯାଏ ଅମରନାଥ ଯାତ୍ରା ଚାଲିବ । ଏଥର ତୀର୍ଥଯାତ୍ରୀଙ୍କ ଉପରେ ଆତଙ୍କୀ ହମଲା ଆଶଙ୍କା ଥିବାରୁ କେନ୍ଦ୍ର ସରକାର ବ୍ୟାପକ ନିରାପତ୍ତା ବ୍ୟବସ୍ଥା କରିଛନ୍ତି । ଯାତ୍ରା ସମୟରେ ଗାଡି ଗୁଡିକ ଉପରେ ନଜର ରଖିବା ଲାଗି ଟ୍ରାକିଂ ଚିପ୍ ଲଗାଯିବ । ଏହାଛଡା ଡ୍ରୋନ୍ ମାଧ୍ୟମରେ ରାଜପଥ ଉପରେ ନଜର ରଖାଯିବ । ସିଆରପିଏଫ୍ ର ସ୍ବତନ୍ତ୍ର ମୋଟରସାଇକେଲ୍ ସ୍କାଡ୍ ମଧ୍ୟ ଶ୍ରଦ୍ଧାଳୁଙ୍କ ସୁରକ୍ଷାକୁ ଅନୁଧ୍ୟାନ କରିବ । ଏହାଛଡା ଏନ୍ଏସ୍ଜି କମାଣ୍ଡୋମାନେ ମଧ୍ୟ ଯାତ୍ରୀଙ୍କ ନିରାପତ୍ତା ଦାୟିତ୍ବରେ ନିୟୋଜିତ ରହିବେ। ସୁରକ୍ଷା ପାଇଁ ପୁଲିସ, ଅର୍ଦ୍ଧସାମରିକ ସାମରିକ ବାହିନୀ ଏବଂ ସେନାର ୪୦ହଜାର ଯବାନଙ୍କୁ ମୁତୟନ କରାଯାଇଛି । ଟେଲିଫୋନ କନଭେକ୍ଚିଭିଟି ପାଇଁ ଅମରନାଥ ଗୁମ୍ଫା ପର୍ଯ୍ୟନ୍ତ ଅପ୍ଟିକାଲ୍ ଫାଇଭର କେବଲ୍ ବିଛାଇଛି ବିଏସ୍ଏନ୍ଏଲ୍ । ସେପଟେ ଆତଙ୍କବାଦୀ ସଂଗଠନ ହିଜବୁଲ ମୁଜାହିଡିନ୍ ଏକ ଭିଡିଓ ଜାରି କରି କହିଛି ସେମାନେ ଅମରନାଥ ଯାତ୍ରୀଙ୍କୁ ଟାର୍ଗେଟ କରିବେ ନାହିଁ।