ନୂଆଦିଲ୍ଲୀ ୨୨/୬ : ପଞ୍ଜାବ କଂଗ୍ରେସରେ ବଢୁଥିବା ବିବାଦ ମଧ୍ୟରେ ମୁଖ୍ୟମନ୍ତ୍ରୀ ଅମରିନ୍ଦର ସିଂ ଦିଲ୍ଲୀରେ ଅଛନ୍ତି । ଆଜି କ୍ୟାପଟେନ କଂଗ୍ରେସ ପାର୍ଟି ପ୍ୟାନେଲକୁ ଭେଟିବାର କାର୍ଯ୍ୟକ୍ରମ ରହିଛି । ପ୍ୟାନେଲରେ ରାଜ୍ୟସଭାରେ ବିରୋଧୀଦଳର ନେତା ମଲ୍ଲିକାର୍ଜୁନ ଖଡଗେଙ୍କ ନେତୃତ୍ୱ ନେଉଥିବାବେଳେ ହରିଶ ରାୱତ ଏବଂ ଜେପି ଅଗ୍ରୱାଲ ଏହାର ସଦସ୍ୟ ଅଛନ୍ତି । ସକାଳ ୧୧ଟାରେ ବୈଠକ ହେବାର ଅଛି ।
କଂଗ୍ରେସ ନେତା ରାହୁଲ ଗାନ୍ଧୀ ସୋମବାର ପଞ୍ଜାବର କିଛି ନେତାଙ୍କୁ ଭେଟିଥିଲେ । ଯେଉଁଥିରେ ଅମୃତସର ସାଂସଦ ଗୁରୁଜିତ ସିଂ ଔଜେଲା ଏବଂ ଫତେହଗଡ ସାହିବ ବିଧାୟକ କୁଲଜିତ ସିଂ ନାଗ୍ରା ସହ ଅନେତ କଂଗ୍ରେସ ନେତାଙ୍କୁ ଭେଟିଥିଲେ । ଆଜି ବି ସେ ଆଉ କିଛି ନେତାଙ୍କୁ ଭେଟିବେ ବୋଲି ଆଶା କରାଯାଉଛି । ତେବେ ଅସନ୍ତୁଷ୍ଟ ନେତା ନବଜୋତ ସିଂଙ୍କ ସମର୍ଥମାନେ ପୁଣି ଥରେ ମୁଖ୍ୟମନ୍ତ୍ରୀଙ୍କ ବିରୋଧରେ ମୋର୍ଚ୍ଚା ଖୋଲିବା ନେଇ ବୈଠକରେ ଗୁରୁତ୍ୱ ବଢିଛି ।
ପୂର୍ବରୁ ସିଦ୍ଧୁ କହିଛନ୍ତି ଯେ ସେ ନିର୍ବାଚନରେ ବ୍ୟବହୃତ ହେବାକୁ ଥିବା ଏକ ସୋ ପିସ୍ ନୁହେଁ । ପଞ୍ଜାବ ୟୁନିଟରେ ଦଳଭେଦ ସମାଧାନ ପାଇଁ ଗଠିତ କଂଗ୍ରେସ ପ୍ୟାନେଲ ଜୁନ୍ ୧୦ରେ ଦଳର ମଧ୍ୟବର୍ତ୍ତୀକାଳୀନ ଅଧ୍ୟକ୍ଷ ସୋନିଆ ଗାନ୍ଧୀଙ୍କ ନିକଟରେ ଏହାର ରିପୋର୍ଟ ଦାଖଲ କରିଛି । ସୂତ୍ରରୁ ପ୍ରକାଶ ଯେ ପ୍ୟାନେଲ ମୁଖ୍ୟମନ୍ତ୍ରୀଙ୍କୁ ହଟାଇବାକୁ ସୁପାରିଶ କରିନାହିଁ ଏବଂ କ୍ୟାପଟେନ ଅମରିନ୍ଦର ସିଂ ଆସନ୍ତା ନିର୍ବାଚନରେ ଦଳର ନେତୃତ୍ୱ ନେବାର ସମ୍ଭାବନା ରହିଛି ।
ଏହା ବଦଳରେ ଦଳର ରାଜ୍ୟ ୟୁନିଟରେ ଅନେକ ସଂସ୍କାର ପାଇଁ ପରାମର୍ଶ ଦିଆଯାଇଛି । ତେବେ ନବଜୋତ ସିଂ ସିଦ୍ଧୁଙ୍କ ଭାଗ୍ୟ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ । ପଞ୍ଜାବ କ୍ୟାବିନେଟକୁ ଫେରିବା ପାଇଁ ପ୍ୟାନେଲ ଚାହୁଁଛି । ସିଦ୍ଧୁଙ୍କୁ ଡେପୁଟି ସିଏମ୍ କରାଯିବା ବିରୋଧରେ ଅମରିନ୍ଦର ସିଂ ବିରୋଧୀ, କିନ୍ତୁ ତାଙ୍କୁ କ୍ୟାବିନେଟରେ ଅନ୍ତର୍ଭୁକ୍ତ କରିବାକୁ ପ୍ରସ୍ତୁତ ଅଛନ୍ତି । ଏହି ପ୍ୟାନେଲରେ ମୁଖ୍ୟମନ୍ତ୍ରୀ ଅମରିନ୍ଦର ସିଂ ଏବଂ ନବଜୋତ ସିଂ ସିଦ୍ଧୁଙ୍କ ସମେତ ଦଳର ସମସ୍ତ ହିତାଧିକାରୀଙ୍କୁ ଭେଟିଥିଲେ।