ଝାରସୁଗୁଡା୩/୧୧: ଝାରସୁଗୁଡା ଜିଲ୍ଲାର ବିଭିନ୍ନ ଅଂଚଳରେ ଲଘୁ ଖଣିଜ ସମ୍ପଦର ବ୍ୟାପକ ଚୋରି ହେଉଥିବା ଅଭିଯୋଗ କରିଛି ବିଜେପି । ଗ୍ରାମାଞ୍ଚଳ ନିକଟରେ ଥିବା ଜଙ୍ଗଲିଆ ଅଂଚଳ ହେଉ କି ସହରାଞ୍ଚଳ ହେଉ ସବୁ ଅଞ୍ଚଳରେ ଏହି ଖଣି ମାଫିଆ ମାନେ ସକ୍ରିୟ ହୋଇ ରହିଛନ୍ତି । ପ୍ରଶାସନର ନାକତଳେ ଖଣିଜ ସମ୍ପଦ ଖୋଲାଖୋଲି ଲୁଟ ହେଉଛି ।
ପ୍ରତିବାଦ କରୁଥିବା ଜନସାଧାରଣଙ୍କୁ ଏହି ମାଫିଆ ମାନେ ନାନାପ୍ରକାର ଧମକ ଚମକ ଦେଉଛନ୍ତି । ଅଭିଯୋଗ କଲେ ମଧ୍ୟ କେହି ଶୁଣୁ ନଥିବାରୁ ଏହି ଲୁଟରେ ପ୍ରଶାସନିକ ଅଧିକାରୀମାନେ ସାମିଲ ଥିବା ଅଭିଯୋଗ ହୋଇଆସୁଛି । ବିଡମ୍ବନା ଯେ, ଝାରସୁଗୁଡା ସହରାଞ୍ଚଳରେ ବିସ୍ତୃତ ଅଞ୍ଚଳରେ ବେଆଇନ ମୋରମ ଖନନ ଚାଲିଛି । ସମସ୍ତ ଅଧିକାରୀ ଅ ସମ୍ବନ୍ଧରେ ଅବଗତ ଥିଲେ ମଧ୍ୟ ନିରବଦ୍ରଷ୍ଟା ସାଜିଛନ୍ତି । ଆହୁରି ଗୁରୁତର ଘଟଣା ହେଲା ଯେ, ଝାରସୁଗୁଡା ସହର ନିକଟବର୍ତ୍ତି ଏକ ବିସ୍ତ୍ରୁତ ଅଞ୍ଚଳରେ ମାଫିଆ ମାନେ ଏହି ଖନନ କାର୍ଯ୍ୟ କରୁଛନ୍ତି ।
ଦଲକି ଗାଁ ଖାତା ନମ୍ବର ୪୪୪ରେ ଥିବା ଜମିର ବ୍ୟାପକ ଅଞ୍ଚଳରେ ବଡ ବଡ ମେସିନ ଲଗାଇ ଏହି ମୋରମ ଓ ମାଟି ଖନନ ଚାଲିଛି । ଶହଶହ ହାଇବା ଲଗାଇ ମୋରମ ବୁହା ଚାଲିଛି । ମାତ୍ର ଏ ସମ୍ବନ୍ଧରେ କୌଣସି ସରକାରୀ ଅଧିକାରୀ ମୁହଁ ଖୋଲିବାକୁ ଅନିଚ୍ଛୁକ । ଦୀର୍ଘଦିନ ହେଲା ଜିଲ୍ଲାର ବିଭିନ୍ନ ଅଞ୍ଚଳରେ ବେଆଇନ ଖନନ ଚାଲିଛି , ମାତ୍ର ଏହାକୁ ବନ୍ଦ କରିବା ଅବା ଏହି ଲଘୁ ଖଣିଜ ସମ୍ପଦ ଲୁଟକୁ ରୋକିବା ପାଇଁ କୌଣସି ପଦକ୍ଷେପ ଗ୍ରହଣ କରାଯାଇନାହିଁ । ଜିଲ୍ଲାର ବିଭିନ୍ନ ଅଂଚଳରେ ବେଆଇନ ମୋରମ ଖନନ ଓ ଆଶ ପକାଇବା ଚାଲିଥିବା ବେଳେ ଏହା ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଦାବି କରିଛି ବିଜେପି ।