ଲକ୍ଷ୍ନୌ, ୧୩।୦୯ : କିଛିମାସ ପରେ ଉତ୍ତର ପ୍ରଦେଶରେ ଅନୁଷ୍ଠିତ ହେବ ବିଧାନସଭା ନିର୍ବାଚନ । ନିର୍ବାଚନ ପୂର୍ବରୁ ନେତାଙ୍କ ଦଳବଦଳ ରାଜନୀତି ଆରମ୍ଭ ହୋଇଗଲାଣି ।
ଅବକୀ ବାର୍ ୩୦୦ ପାର୍ ନାରା ଦେଉଥିବା ଭାରତୀୟ ଜନତା ପାର୍ଟି ଓ ସମାଜବାଦୀ ପାର୍ଟି ମଧ୍ୟରେ କଡା ମୁକାବିଲା ଦେଖିବାକୁ ମିଳୁଛି । ରବିବାର ବିଜେପିର ଜଣେ ବିଧାୟର ଏସପିର ଅଧ୍ୟକ୍ଷ ଅଖିଲେଶ ଯାଦବଙ୍କୁ ଭେଟିଛନ୍ତି ।
ସୀତାପୁର ସଦର ବିଧାୟକ ରାକେଶ ରାଠୋର ଅଖିଲେଶଙ୍କୁ ତାଙ୍କ ବାସଭବନରେ ଭେଟିଛନ୍ତି । ଏହି ଭୋଟଘାଟର ଫଟୋ ଫେସବୁକରେ ଭାଇରାଲ ହୋଇଛି । ଏହାକୁ ନେଇ ରାଜନୀତି ମଧ୍ୟ ସରଗରମ ହୋଇ ଉଠିଛି ।
ଭେଟଘାଟକୁ ନେଇ ରାକେଶ ରାଠୋର କିମ୍ବା ଅଖିଲେଶ ଯାଦବ କୌଣସି ପ୍ରକାର ପ୍ରତିକ୍ରିୟା ଦେଇ ନାହାଁନ୍ତି । କିନ୍ତୁ ସୂତ୍ରାନୁସାରେ, ସୀତାପୁର ସଦର ବିଧାନସଭା ଆସନର ବିଜେପି ବିଧାୟକ ରାକେଶ ଅତିଶୀଘ୍ର ସାଇକେଲ ଚଢିପାରନ୍ତି । ସମାଜବାଦୀ ପାର୍ଟି ନେତାଙ୍କ କହିବାନୁସାରେ, ବିଜେପିର ୧୨ରୁ ଅଧିକ ବିଧାୟକ ଏସପି ସହ ସମ୍ପର୍କରେ ଅଛନ୍ତି । ପୂର୍ବରୁ ଅନେକ ଥର ରାକେଶ ନିଜ ଦଳ ପାଇଁ ଅପ୍ରୀତିକର ପରିସ୍ଥିତି ସୃଷ୍ଟି କରିସାରିଛନ୍ତି ।