ନୂଆଦିଲ୍ଲୀ ୧୮।୪: ଟେଲିକମ୍ ଅପରେଟର ଭାରତୀ ଏୟାରଟେଲ ଏବଂ ଭୋଡାଫୋନ୍-ଆଇଡିଆ ପ୍ରିପେଡ୍ ଆକାଉଣ୍ଟର ବୈଧତାକୁ ଆସନ୍ତା ୩ ତାରିଖ ପର୍ଯ୍ୟନ୍ତ ବୃଦ୍ଧି କରିବାକୁ ଘୋଷଣା କରିଛନ୍ତି । ଭାରତରେ କରୋନା ସଂକ୍ରମିତଙ୍କ ସଂଖ୍ୟା ବୃଦ୍ଧି ହେତୁ ସରକାର ଲକ୍ ଡାଉନ୍ କୁ ଆସନ୍ତା ୩ ତାରିଖ ପର୍ଯ୍ୟନ୍ତ ବୃଦ୍ଧି କରିଛନ୍ତି । ଫଳରେ କମ୍ପାନୀଗୁଡିକ ଏଭଳି ଘୋଷଣା କରିଥିବା ଜଣାପଡିଛି ।
ଏହାପୂର୍ବରୁ ଉଭୟ ଏୟାରଟେଲ ଏବଂ ଭୋଡାଫୋନ୍-ଆଇଡିଆ ଗ୍ରାହକଙ୍କ ଆକାଉଣ୍ଟ ବୈଧତାକୁ ୧୭ ଅପ୍ରେଲ ପର୍ଯ୍ୟନ୍ତ ବୃଦ୍ଧି କରିଥିଲେ । ୧୦ ଟଙ୍କାର ଟକ୍ ଟାଇନ୍ ମଧ୍ୟ ପ୍ରଦାନ କରିଥିଲେ । ବର୍ତ୍ତମାନ ଲକ୍ ଡାଉନ୍ ସମୟସୀମା ବୃଦ୍ଧି ହେବା ପରେ, ଉଭୟ କମ୍ପାନୀ ପୁନର୍ବାର ପ୍ରିପେଡ୍ ବ୍ୟବହାରକାରୀଙ୍କ ଆକାଉଣ୍ଟ ବୈଧତାକୁ ମେ ୩ ତାରିଖ ପର୍ଯ୍ୟନ୍ତ ବୃଦ୍ଧି କରିଛନ୍ତି ।
ଗୋଟିଏ ପଟେ ଭୋଡାଫୋନ୍-ଆଇଡିଆ କହିଛି ଯେ ଏହି ପଦକ୍ଷେପ ୯୦ ନିୟୁତ ସ୍ବଳ୍ପ ଆୟକାରୀ ଫିଚର ଫୋନ୍ ବ୍ୟବହାରକାରୀଙ୍କୁ ଉପକୃତ କରିବ । ଅନ୍ୟପକ୍ଷରେ ଏୟାରଟେଲ୍ କହିଛି ଯେ ସ୍ବଳ୍ପ ଆୟ ଗ୍ରାହକଙ୍କ ଆକାଉଣ୍ଟ ବୈଧତା ବୃଦ୍ଧି କରୁଛି ।
ସୂଚନାଯୋଗ୍ୟ ଯେ, ଏହି ଦୁଇ କମ୍ପାନୀର ଏକ ମିନିମମ୍ ରିଚାର୍ଜ ପଲିସି ରହିଛି । ଯାହା ଅଧୀନରେ ଜଣେ ଗ୍ରାହକଙ୍କ ବର୍ତ୍ତମାନର ପ୍ଲାନ୍ ଶେଷ ହେବାପରେ ସେ ୭ ଦିନ ପରେ ଇନକମିଂ କଲ୍ ଆସିବା ବନ୍ଦ ହୋଇଯାଇଥାଏ । ବର୍ତ୍ତମାନ ଏକ ନୂତନ ପ୍ରେସ୍ ବିଜ୍ଞପ୍ତିରେ ଏୟାରଟେଲ୍ କହିଛି ଯେ, ଲକ୍ ଡାଉନ୍ ସମୟରେ ମୋବାଇଲ୍ ନମ୍ବର ରିଚାର୍ଜ କରିବାକୁ ପ୍ରାୟ ୩୦ ନିୟୁତ ଗ୍ରାହକ ଅସମର୍ଥ । ତାଙ୍କୁ ସାହାଯ୍ୟ କରିବା ପାଇଁ କମ୍ପାନୀ ପ୍ରିପେଡ୍ ଆକାଉଣ୍ଟ ବୈଧତାକୁ ୩ ମେ ୨୦୨୦ ପର୍ଯ୍ୟନ୍ତ ବୃଦ୍ଧି କରିବାକୁ ନିଷ୍ପତ୍ତି ନେଇଛି । ଏହାର ଅର୍ଥ ହେଉଛି ଯେ, ଗ୍ରାହକଙ୍କ ନିକଟରେ ଏକ ସକ୍ରିୟ ରିଚାର୍ଜ ପ୍ଲାନ୍ ନଥିଲେ ମଧ୍ୟ ସେମାନେ ଇନକମିଂ ଭଏସ୍ କଲ୍ ଗ୍ରହଣ କରିପାରିବେ ।
ଅନ୍ୟପଟେ ଭୋଡାଫୋନ୍-ଆଇଡିଆ ଲକ୍ ଡାଉନ୍ ର ପ୍ରଥମ ପର୍ଯ୍ୟାୟରେ ଅପ୍ରେଲ ୧୭ ପର୍ଯ୍ୟନ୍ତ ମାଗଣାରେ ଆକାଉଣ୍ଟ ବୈଧତା ବୃଦ୍ଧି କରିଥିଲା ଏବଂ ୧୦ ଟଙ୍କାର ଟକ୍ ଟାଇମ୍ ପ୍ରଦାନ କରିଥିଲା । ଏବେ କମ୍ପାନୀ ମେ ୩ ପର୍ଯ୍ୟନ୍ତ ଫିଚର ଫୋନ୍ ବ୍ୟବହାରକାରୀ ପ୍ରାୟ ୯୦ ମିଲିୟନ ସ୍ବଳ୍ପ ଆୟକାରୀ ପ୍ରିପେଡ୍ ଗ୍ରାହକଙ୍କ ପାଇଁ ବୈଧତା ବୃଦ୍ଧି କରିଛି।
