ନୂଆଦିଲ୍ଲୀ, ୩୦|୦୫: ଶନିବାର ସକାଳେ ନୂଆଦିଲ୍ଲୀରୁ ମସ୍କୋ ଅଭିମୁଖେ ଯାଉଥିବା ଏୟାର ଇଣ୍ଡିଆର ଏକ ବିମାନ ଫେରିଆସିଛି । ବିମାନର ଜଣେ ପାଇଲଟ୍ କରୋନା ପଜିଟିଭ୍ ଚିହ୍ନଟ ହେବା ପରେ ବିମାନଟିକୁ ଫେରାଇ ଆଣିବା ପାଇଁ କର୍ତୃପକ୍ଷ ଏହି ନିଷ୍ପତ୍ତି ନେଇଥିଲେ। ଉଜବେକିସ୍ତାନରୁ ଏହି ବିମାନକୁ ଫେରାଇ ଅଣାଯାଇଛି ।
ଉଡାଣ ପୂର୍ବରୁ ବିମାନର ସମସ୍ତ କର୍ମଚାରୀଙ୍କ ଟେଷ୍ଟ୍ କରାଯାଇଥିଲା । ତେବେ ଜଣେ ପାଇଲଟଙ୍କ ଟେଷ୍ଟ୍ ରିପୋର୍ଟ ପଜିଟିଭ୍ ଥିଲା ବେଳେ ଭୁଲବଶତଃ ଏହାକୁ ନେଗେଟିଭ୍ ବୋଲି କୁହାଯାଇଥିଲା । ପରେ ସତ ଜଣାପଡିବା ପରେ ତୁରନ୍ତ ବିମାନଟିକୁ ଫେରାଇ ନିଆଯାଇଛି ।
ଏୟାର ଇଣ୍ଡିଆର ଏହି ବିମାନ ଏ-୩୨୦ ନିଓ ଶନିବାର ଦିନ ୧୨ଟା ୩୦ରେ ଦିଲ୍ଲୀକୁ ଫେରିଆସିଥିଲା । ଏବେ ବିମାନର ସମସ୍ତ କର୍ମଚାରୀଙ୍କୁ କ୍ୱାରେଣ୍ଟାଇନରେ ପଠାଯାଇଛି । ଏହା ବଦଳରେ ଏୟାର ଇଣ୍ଡିଆ ଆଉ ଏକ ବିମାନକୁ ମସ୍କୋ ଅଭିମୁଖେ ପଠାଇଛି ।
ଶନିବାର ସକାଳେ ବିନା କୌଣସି ଯାତ୍ରୀରେ ବିମାନଟି ନୂଆଦିଲ୍ଲୀରୁ ମସ୍କୋ ଅଭିମୁଖେ ଉଡାଣ ଭରିଥିଲା । ତେବେ ଉଡାଣ ବେଳେ କର୍ମଚାରୀଙ୍କ ସ୍ୱାସ୍ଥ୍ୟ ପୁନଃଯାଞ୍ଚ କରାଯାଇଥିଲା । ଏହି ସମୟରେ ଜଣେ ପାଇଲଟଙ୍କ ରିପୋର୍ଟ ପଜିଟିଭ୍ ବୋଲି ଜଣାପଡିଥିଲା । ଏହାପରେ ତୁରନ୍ତ ବିମାନଟିକୁ ଫେରାଇ ନିଆଯାଇଥିଲା ।
କରୋନା ଆତଙ୍କକୁ ନଜରରେ ରଖି କେନ୍ଦ୍ର ସରକାରଙ୍କ ପକ୍ଷରୁ ପ୍ରତିଦିନ ୩୦୦ରୁ ଅଧିକ ବିମାନ କର୍ମଚାରୀଙ୍କ କରୋନା ଟେଷ୍ଟ୍ କରାଯାଉଛି । ଯେଉଁ କର୍ମଚାରୀଙ୍କ ରିପୋର୍ଟ ନେଗେଟିଭ୍ ଆସୁଛି କେବଳ ସେମାନଙ୍କୁ ହିଁ ବିମାନରେ କାର୍ଯ୍ୟ କରିବାକୁ ଅନୁମତି ମିଳୁଛି ।