ଆାଗ୍ରା: ସ୍ମାର୍ଟ ଯୁଗରେ ସ୍ମାର୍ଟ ଲୁଟେରା । ଫିଲ୍ମ ଷ୍ଟାଇଲ୍ରେ କରୁଛନ୍ତି ଲୁଟ । ଆଗ୍ରାର ରାଜପୁର ଚୁଙ୍ଗିରେ ଥିବା ଏକ ଗହଣା ଦୋକନାରୁ ଲକ୍ଷାଧିକ ଟଙ୍କାର ଗହଣା ଲୁଟ କରି ଫେରାର ହୋଇଥିବା ଲୁଟେରାକୁ ନେଇ ଏବେ ଚର୍ଚ୍ଚା । ଗ୍ରାହକ ସାଜି ଆସିଲେ, ୧୦୦୦ ଟଙ୍କା ଆଡଭାନ୍ସ ଦେଲେ କିନ୍ତୁ ଲୁଟିନେଲେ ୩ ଲକ୍ଷ ଟଙ୍କାର ଗହଣା ।ଦିନ ଦ୍ବିପ୍ରହରେ ଦୋକାନ ମାଲିକ ଓ କର୍ମଚାରୀଙ୍କ ଆଖିରେ ଧୂଳିଦେଇ ଲୁଟିନେଲେ ଳକ୍ଷାଧିକ ଟଙ୍କାର ଗହଣା ।
ପ୍ରଥମେ ଦୁଇ ଜଣ ଗ୍ରାହକ ସାଜି ଦୋକାନରେ ପ୍ରବେଶ କରିଥିଲେ । ପରେ ସମସ୍ତଙ୍କୁ ଚକ୍ମା ଦେଇ ଲୁଟିନେଲେ ଗହଣା । ଦୋକାନ ମାଲିକଙ୍କ କହିବା ଅନୁସାରେ, ଦିନ ୩ଟା ସମୟରେ ଦୁଇ ଜଣ ବ୍ୟକ୍ତି ଦୋକନାକୁ ଆସିଥିଲେ। ସେତେବେଳେ ଦୋକାନରେ ମାଲିକ ଶିବକୁମାର ଗୁପ୍ତା ଉପସ୍ଥିତ ଥିଲେ । ଦୁଇ ବ୍ୟକ୍ତି ଦୋକନରେ ପ୍ରବେଶ କରିବା ପରେ ରୂପାର ଗହଣା ଦେଖାଇବାକୁ କହିଥିଲେ । ଏହାସହ ସେମାନଙ୍କ ମଧ୍ୟରେ ଜଣେ ସୁନାର ପ୍ୟାଣ୍ଡେଣ୍ଟ କଣିବାକୁ କହିଥିଲା ।
ସେମାନଙ୍କ କଥା ବୁଝି ହେଉନଥିବା କହିଛନ୍ତି ଶିବକୁମାର । ଜଣେ ସୁନା କାନଫୁଲ ଦେଖାଇବାକୁ କହିବାରୁ ସେ କିଛି ଗହଣା ବାକ୍ସ ସେମାନଙ୍କ ସାମ୍ନାରେ ରଖିଥିଲେ । ଏହାପରେ ଜଣେ ପ୍ୟାଣ୍ଡେଣ୍ଟ ଦେଖାଇବାକୁ କହିଥିଲା। ଯେମିତି ଶିବକୁମାର ପଛକୁ ବୁଲିଛନ୍ତି ପୂର୍ବ ଯୋଜନା ମୁତାବକ ସେମାନେ ସୁନା ଅଳଙ୍କାର ଥିବା ଏକ ବାକ୍ସକୁ ଲୁଚାଇଦେଲେ। ଏହାପରେ ଦୁଇ ବ୍ୟକ୍ତି ଦୋକାନରୁ ଗୋଟିଏ ଜିନିଷ ପସନ୍ଦ କରିବା ସହ ହଜାରେ ଟଙ୍କା ଆଡଭାନ୍ସ ଦେଇ ପଛରେ ପୂରା ଟଙ୍କା ଦେଇ ଜିନିଷ ନେବେ ବୋଲି କହିଥିଲେ।
ସେମାନଙ୍କ କଥାରେ ରାଜି ହୋଇଥିଲେ ଶିବକୁମାର। ଦୁଇ ବ୍ୟକ୍ତି ବାହାରକୁ ଯାଇ ସୁନା ଆଭୂଷଣ ସଜାଡ଼ୁଥିବା ଦେଖି ଜଣାପଡ଼ିଲା ଯେ ଦୋକାନରୁ କିଛି ଚୋରି ହୋଇଛି । ଦେଖିବା ପରେ ଜଣାପଡ଼ିଲା ସୁନା ଅଳଙ୍କାର ଭର୍ତ୍ତି ଏକ ବାକ୍ସ ଗାଏବ ହୋଇଯାଇଛି । ସେଥିରେ ୩ ଲକ୍ଷ ଟଙ୍କାର ସୁନା ଅଳଙ୍କାର ଥିଲା । ପରେ ସିସିଟିଭି ଦେଖିବା ପରେ ସ୍ମାର୍ଟ ଚୋରଙ୍କ କାରନାମା ଜଣାପଡ଼ିଥିଲା । ତେବେ ଅଭିଯୋଗ ପାଇ ପୋଲିସ ଘଟଣାସ୍ଥଳରେ ପହଞ୍ଚିଥିଲା। କିନ୍ତୁ ଲୁଟେରାଙ୍କ ଟେର ପାଇନଥିବା ସୂଚନା ମିଳିଛି।
