କାବୁଲ ୦୭/୦୯ : ପଞ୍ଜଶୀର ଘାଟୀକୁ ଗତ ତାଲିବାନ କବ୍ଜା କରିନେଇଥିବା ଦାବି କରିଥିଲେ ମଧ୍ୟ ଏଯାଏଁ ସରିନି ଲଢେଇ । ଶେଷ ହୋଇନି ଯୁଦ୍ଧ, ଜାରି ରହିଛି ସଂଘର୍ଷ । ଏହାରି ଭିତରେ ପଞ୍ଜଶୀର ଘାଟୀରେ କିଛି ଅଜ୍ଞାତ ସୈନ୍ୟ ବିମାନ ଆକ୍ରମଣ କରିଥିବା ସୂଚନା ମିଳିଛି । ତାଲିବାନୀଙ୍କ ଠିକଣାକୁ ଟାର୍ଗେଟ୍ କରି ଏହି ଆକ୍ରମଣ କରାଯାଇଥିବା କୁହାଯାଉଛି ।
ଏହା ପୂର୍ବରୁ ସୋମବାର ତାଲିବାନୀମାନେ ପଞ୍ଜଶୀରରେ ପ୍ରବେଶ କରିଥିଲେ । ପଞ୍ଜଶୀରର ମୁଖ୍ୟ ପ୍ରବେଶ ପଥ ଓ ଗଭର୍ଣ୍ଣର ଅଫିସରେ ନିଜର ପତାକା ଉଡାଇଥିଲେ । କକେବଳ ସେତିକି ନୁହେଁ ତାଲିବାନୀମାନେ ଏକ ଭିଡିଓ ଜାରି କରି ପଞ୍ଜଶୀରକୁ ସମ୍ପୂର୍ଣ୍ଣ ରୂପେ ଦଖଲ କରିଥିବା ବି ଦାବି କରିଥିଲେ । ତେବେ ପଞ୍ଜଶୀରକୁ ସମ୍ପୂର୍ଣ୍ଣ ରୂପେ ନିଜ ଅକ୍ତିଆରକୁ ନେଇଥିବା ତାଲିବାନୀ ଦାବି କରିବା କିଛି ସମୟ ପରେ ନର୍ଦନ ଆଲାଏନ୍ସର ନେତା ଅହମ୍ମଦ ମାସୁଦଙ୍କ ପ୍ରତିକ୍ରିୟା ଆସିଥିଲା । ସେ ଏହାକୁ ଖଣ୍ଡନ କରିଥିଲେ ।
ନର୍ଦନ ଆଲାଏନ୍ସର ଯୋଦ୍ଧାମାନେ ରକ୍ତର ଶେଷ ବିନ୍ଦୁ ପର୍ଯ୍ୟନ୍ତ ଲଢେଇ ଜାରି ରହିବ ବୋଲି କହିଛନ୍ତି । ଏହାସହ ମଧ୍ୟ ଦାବି କରିଥିଲେ ଯେ, ପଞ୍ଜଶୀରର ଯୋଦ୍ଧାମାନେ ପାକିସ୍ତାନର ଜେଟ୍କୁ ଧ୍ଵଂସ କରିଛନ୍ତି । ସୂଚନା ଥାଉକି, ପଞ୍ଜଶୀର ଘାଟୀ ଆଫଗାନିସ୍ତାନର ଶେଷ ପ୍ରାନ୍ତରେ ଅବସ୍ଥିତ । ଏହି ଘାଟିକୁ ତାଲିବାନ ସମ୍ପୂର୍ଣ୍ଣ ରୂପେ ନିଜ ଅକ୍ତିଆରକୁ ନେଇଛି ବୋଲି କୁହାଯାଇ ପାରିବ ନାହିଁ ।
କାରଣ ନର୍ଦନ ଆଲାଏନ୍ସ ନାମକ ଏକ ସଙ୍ଗଠନ ତାଲିବାନୀଙ୍କ ସହ ଘମାଘୋଟ ଲଢେଇ କରୁଛି । ପଞ୍ଜଶୀର ପାହାଡ଼ ଉପରେ ଥିବା ନର୍ଦନ ଆଲାଏନ୍ସର ଯୋଦ୍ଧାମାନେ ଗରିଲା ଯୁଦ୍ଧ ଜରିଆରେ ତାଲିବାନୀଙ୍କୁ ଚ୍ୟାଲେଞ୍ଜ ଦେଉଛନ୍ତି । ଆଫଗାନିସ୍ତାନର ଉପରାଷ୍ଟ୍ରପତି ଅମରୁଲ୍ଲା ସାଲେହ ଏବଂ ତାଲିବାନୀ ବିରୋଧୀ ଶାହ ମାସୁଦଙ୍କ ପୁଅ ଅହମ୍ମଦ ମାସୁଦ ନର୍ଦନ ଆଲାଏନ୍ସର ନେତୃତ୍ଵ ନେଉଛନ୍ତି।