ନୂଆଦିଲ୍ଲୀ,୨୯/୧୨: ସାରା ଦେଶ ନୂଆ ବର୍ଷ ପାଳନ ପାଇଁ ଉତ୍ସାହିତ ଥିବା ବେଳେ ଏକ ଚିନ୍ତାଜନକ ଖବର ସାମ୍ନାକୁ ଆସିଛି । ଭାରତରେ କରୋନା ଭାଇରସର ନୂଆ ଷ୍ଟ୍ରେନ୍ ମୋଟ୍ ୬ଟି ମାମଲା ମିଳିଛି । ମଙ୍ଗଳବାର ସରକାରଙ୍କ ତରଫରୁ ଏନେଇ ସୂଚନା ଦିଆଯାଇଛି । ଏହାମଧ୍ୟରୁ ତିନୋଟି ବେଙ୍ଗାଲୁରୁ, ୨ଟି ହାଇଦ୍ରାବାଦ ଓ ଗୋଟିଏ ପୁଣେ ଲ୍ୟାବର ସାମ୍ପଲରେ ମିଳିଛି ।
ବ୍ରିଟେନରୁ ଆସୁଥିବା ଲୋକଙ୍କ ଜିନୋମ୍ ସ୍କିବୋସିଂ କରାଯାଇଥିଲା । ଯାହାର ରିପୋର୍ଟ ମଙ୍ଗଳବାର ସାମ୍ନାକୁ ଆସିଛି । ଏଥିରେ ବିଭିନ୍ନ ଲ୍ୟାବରେ ଟେଷ୍ଟ ହୋଇଥିବା ନମୂନାର ରିପୋର୍ଟ ବାବଦରେ ସୂଚନା ଦିଆଯାଇଛି ।
କେଉଁଠୁ ମିଳିଥିଲା ନୂଆ ଷ୍ଟ୍ରେନ୍
ନଭେମ୍ବର ୨୫ରୁ ଡିସେମ୍ବର ୨୩ ମଧ୍ୟରେ ବ୍ରିଟେନରୁ ପ୍ରାୟ ୩୩,୦୦୦ ଲୋକ ଭାରତ ଆସିଛନ୍ତି । ସମସ୍ତଙ୍କୁ ଟ୍ରାକ୍ କରାଯାଇଛି । ଏଥିରେ ୧୧୪ଜଣ କରୋନା ପଜିଟିଭ୍ ଚିହ୍ନଟ ହୋଇଥିଲେ । ଏହାପରେ ସମସ୍ତଙ୍କ ନମୂନା ଦେଶର ୧୦ଟି ଲ୍ୟାବକୁ ପଠାଯାଇଥିଲା । ଏଥିରୁ ୬ଟିରେ ନୂଆ ଷ୍ଟ୍ରେନ୍ ଠାବ ହୋଇଛି । ସମସ୍ତ ସଂକ୍ରମିତଙ୍କୁ ଆଇସୋଲେସନରେ ରଖାଯାଇଛି । ସେମାନଙ୍କ ସମ୍ପର୍କରେ ଆସିଥିବା ଅନ୍ୟମାନଙ୍କୁ କ୍ୱାରେଣ୍ଟାଇନ କରାଯାଇଛି । ସେମାନଙ୍କ ଟ୍ରାଭେଲ୍ ହିଷ୍ଟ୍ରୀକୁ ମଧ୍ୟ ଯାଞ୍ଚ୍ କରାଯାଉଛି ।
