ମେଲବର୍ଣ୍ଣ ୦୨/୦୧ : ଭାରତୀୟ କ୍ରିକେଟ୍ ଟିମର ୫ ଜଣ ଖେଳାଳୀଙ୍କୁ ଆଇସୋଲେସନ କରାଯାଇଥିବା ସୂଚନା ମିଳିଛି । ନୂଆବର୍ଷ ଅବସରରେ ଭାରତୀୟ ଦଳର ଖେଳାଳି ରୋହିତ ଶର୍ମା, ଋଷଭ ପନ୍ତ, ଶୁଭମନ ଗିଲ୍, ପୃଥ୍ୱୀ ଶ ଓ ନବଦୀପ ସୈନୀ ମେଲବର୍ଣ୍ଣର ଏକ ରେଷ୍ଟୁରାଣ୍ଟରେ ଲଞ୍ଚ୍ କରୁଥିବା ନଜର ଆସିଥିଲେ । ଏମାନଙ୍କ ବିରୁଦ୍ଧରେ ବାୟୋ-ସିକ୍ୟୁରିଟି ପ୍ରୋଟୋକଲ ଭାଙ୍ଗିବା ଅଭିଯୋଗ ଆସିଥିଲା । ଏହା ପରେ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ(BCCI) ତଦନ୍ତ ଆରମ୍ଭ କରିଥିଲା ।
ରେଷ୍ଟୁରାଣ୍ଟରେ ଲଞ୍ଚ୍ କରୁଥିବା ଫଟୋ ଭାଇରାଲ ହେବା ପରେ ଏହାର ତଦନ୍ତ ଆରମ୍ଭ କରିଥିଲା ବିସିସିଆଇ । ଖେଳାଳୀମାନେ ବାୟୋ ସିକ୍ୟୁରିଟି ପ୍ରୋଟୋକଲର ଉଲଙ୍ଘନ କରିଥିବା ଅଭିଯୋଗ ହୋଇଥିଲା । ତେବେ ଏହାର ତଦନ୍ତ କରି ବିସିସିଆଇ ସଂପୃକ୍ତ ୫ ଜଣ ଖେଳାଳୀଙ୍କୁ ଆଇସୋଲେସନରେ ରହିବାକୁ ନିର୍ଦେଶ ଦେଇଛି ।
କରୋନା କାରଣରୁ କ୍ରିକେଟ୍ ଅଷ୍ଟ୍ରେଲିଆ ପକ୍ଷରୁ ସ୍ବତନ୍ତ୍ର ଗାଇଡଲାଇନ ଜାରି କରାଯାଇଥିଲା । ଏହି ଗାଇଡଲାଇନରେ ଉଲ୍ଲେଖ୍ୟ ଥିଲା ଯେ, ଉଭୟ ଭାରତ ଓ ଅଷ୍ଟ୍ରେଲିଆ ଦଳର ସଦସ୍ୟ ବାହାରେ ବୁଲିପାରିବେ କିନ୍ତୁ ବାହାରେ କିଛି ଖାଇପାରିବେ ନାହିଁ । କିଛି ଖାଇବା ଓ ରେଷ୍ଟୁରାଣ୍ଟରେ ବସିବା ପାଇଁ ବାରଣ କରାଯାଇଥିବା ବେଳେ ଖେଳାଳିମାନେ କିନ୍ତୁ ନିୟମ ଉଲ୍ଲଂଘନ କରି ଚେଡଷ୍ଟନ୍ ସପିଂ ସେଣ୍ଟରର ବାର୍ ବି କ୍ୟୁ ରେଷ୍ଟୁରାଣ୍ଟ ଭିତରେ ଖାଉଥିବା ଦେଖିବାକୁ ମିଳିଥିଲା । ରେଷ୍ଟୁରାଣ୍ଟର କର୍ମଚାରୀ ସିଡନୀ ମର୍ଣ୍ଣିଂ ହେରାଲ୍ଡକୁ କହିଥିଲେ ଯେ, ଭାରତୀୟ ଖେଳାଳି ନୂଆବର୍ଷ ଦିନ ଏଠାକୁ ଆସିଥିଲେ ।
ତେବେ ବର୍ତ୍ତମାନ ଆଇସୋଲେସନରେ ଥିବା ଖେଳାଳୀମାନେ ପରବର୍ତ୍ତୀ ମ୍ୟାଚ୍ ଖେଳିପାରିବେ କି ନାହିଁ ସେ ନେଇ ଆଶଙ୍କା ସୃଷ୍ଟି ହୋଇଛି । ତେବେ ଯଦି ଆଇସୋଲେସନରେ ଥିବା ଖେଳାଳୀମାନେ ତୃତୀୟ ଟେଷ୍ଟ ନଖେଳନ୍ତି ତେବେ ଭାରତ ପାଇଁ ଏକ ବଡ ସମସ୍ୟା ହେବ।