ନୂଆଦିଲ୍ଲୀ, ୧୧|୦୬: ଦେଶରେ କରୋନା ଭାଇରସର ଆତଙ୍କ ଜାରି ରହିଛି । ଏହା ମଧ୍ୟରେ ଏକ ଆଶ୍ୱସ୍ତୀକର ଖବର ସାମ୍ନାକୁ ଆସିଛି । ଏବେ ସୁସ୍ଥ ହାର ୪୯.୨ ପ୍ରତିଶତ ହୋଇଥିବା ସ୍ୱାସ୍ଥ୍ୟ ମନ୍ତ୍ରାଳୟ କହିଛି ।
ଗୁରୁବାର ସ୍ୱାସ୍ଥ୍ୟ ମନ୍ତ୍ରାଳୟ ପକ୍ଷରୁ ସାମ୍ବାଦିକ ସମ୍ମିଳନୀରେ କୁହାଯାଇଛି ଯେ, ଏବେ ସୁସ୍ଥ ହୋଇଥିବା ଆକ୍ରାନ୍ତଙ୍କ ସଂଖ୍ୟା ସକ୍ରିୟ ସଂଖ୍ୟାଠୁ ଅଧିକ ରହିଛି । ଦେଶରେ ଏବେ ଗୋଷ୍ଠୀ ସଂକ୍ରମଣ ହୋଇନାହିଁ । ଆମକୁ ସେହି ଦେଶ ସହ ତୁଳନା କରିବା ଉଚିତ ଯାହାର ଜନସଂଖ୍ୟା ଭାରତ ସହ ପାଖାପାଖି ସମାନ । ଯେଉଁ ଦେଶର ଜନସଂଖ୍ୟା କମ୍ ସେହି ଦେଶ ସହ ତୁଳନା କରାଯିବ ଅନୁଚିତ ।
ଆଇସିଏମଆର ଡିଜି ବଳରାମ ଭାର୍ଗବ କହିଛନ୍ତି ଯେ, ଲକ୍ଷେ ଜନସଂଖ୍ୟାରେ ଆମ ଦେଶରେ ମାମଲା ବହୁତ କମ । ଅନ୍ୟ ଦେଶ ତୁଳନାରେ ଭାରତରେ ମୃତ୍ୟୁହାର ମଧ୍ୟ କମ୍ । ୮୩ ଜିଲ୍ଲାରେ ସର୍ଭେ କରାଯାଇ ଲକଡାଉନ୍ ସଫଳ ହୋଇଛି ବୋଲି ଜଣାପଡିଛି । ଏହି ସମୟରେ କରୋନାକୁ ନିୟନ୍ତ୍ରଣ କରାଯାଇ ପାରିଛି । ସମସ୍ତଙ୍କୁ ମାସ୍କ ପିନ୍ଧିବା ସହ ହାତ ଧୋଇବା ଓ ସାମାଜିକ ଦୂରତା ରକ୍ଷା କରିବା ଜରୁରୀ ଅଟେ ।
ଆଇସିଏମଆରର ତଥ୍ୟାନୁସାରେ, ସହରରେ ଗ୍ରାମ ତୁଳନାରେ ଅଧିକ ମାମଲା ସାମ୍ନାକୁ ଆସିଛି । ୨୪ ହଜାର ଲୋକଙ୍କୁ ନେଇ ଏହି ସର୍ଭେ କରାଯାଇଥିଲା । ଏପ୍ରିଲ ଶେଷ ଯାଏଁ କଣ ସ୍ଥିତି ରହିଛି ତାକୁ ନେଇ ଏହି ସର୍ଭେ ହୋଇଥିଲା । ମନରୁ ଡର କାଢିବାକୁ ହେବ । ଦେଶରେ ଏକ ପ୍ରତିଶତରୁ କମ୍ ଲୋକ ପ୍ରଭାବିତ ହୋଇଛନ୍ତି । ଏବେ ଭାରତରେ ଗୋଷ୍ଠୀ ସଂକ୍ରମଣ ନାହିଁ ବୋଲି ଆଇସିଏମଆର କହିଛି ।
