ଶ୍ରୀନଗର, ୧୮|୦୬ ଭାରତ ଓ ଚୀନ ମଧ୍ୟରେ ଏବେ ଏଲଏସିରେ ତିକ୍ତତା ବୃଦ୍ଧି ପାଇଛି । ଏହା ମଧ୍ୟରେ ଭାରତୀୟ ସେନା ପାକିସ୍ତାନୀ ସେନାର ଏକ ବଡ ଧରଣର ଅନୁପ୍ରବେଶ ଉଦ୍ୟମକୁ ପଣ୍ଡ କରିଛି । ପାକ୍ର ଅସ୍ତ୍ରବିରତି ଉଲଙ୍ଘନର କଡା ଜବାବ ଦେଇଛି ଭାରତ । ଭାରତୀୟ ସେନାର ଆକ୍ରମଣରେ ଏକାଧିକ ପାକ୍ ପୋଷ୍ଟ ଧ୍ୱଂସ ହୋଇଥିବା ବେଳେ ୪ରୁ ଅଧିକ ପାକ୍ ରେଞ୍ଜର୍ସ୍ ନିହତ ହୋଇଛନ୍ତି । ଏହାସହ ୧୨ରୁ ଅଧିକ ପାକ୍ ସୈନ୍ୟ ଆହତ ହୋଇଥିବା ସୂଚନା ମିଳିଛି ।
ବୁଧବାର ବିଲମ୍ବିତ ରାତ୍ରରେ ଭାରତ ତରଫରୁ ଏହି କାର୍ଯ୍ୟାନୁଷ୍ଠାନ ନିଆଯାଇଛି । ପାକିସ୍ତାନକୁ କଜା ଜବାବ ଦେଇ ଭାରକ ଭିମ୍ବର, ନିଲମ, ନକୟାଲ ସେକ୍ଟରରେ ପାକିସ୍ତାନର ଅନେକ ପୋଷ୍ଟକୁ ଧ୍ୱଂସ କରିଦେଇଛି । ଗତ କିଛିଦିନ ଧରି ପାକିସ୍ତାନ ଲଗାତାର ଭାବେ ଏଲଓସିରେ ଅସ୍ତ୍ରବିରତ ଉଲଙ୍ଘନ କରିଆସୁଥିଲା । ଏପରିକି ଭାରତର ଜବାବରେ ଅନେକ ପାକ୍ ରେଞ୍ଜର୍ସ ନିଜ ପୋଷ୍ଟ ଛାଡି ପଳାୟନ କରିଥିଲେ ।
ବୁଧବାର ଜମ୍ମୁ-କାଶ୍ମୀରର ରଜୋରୀ ସେକ୍ଟରରେ ପାକିସ୍ତାନ ଲଗାତାର ଭାବେ ଅସ୍ତ୍ରବିରତି ଉଲଙ୍ଘନ କରିଥିଲା । ଏପରିକି ମୋର୍ଟାର ମାଡ ମଧ୍ୟ କରିଥିଲା । ଏହାପରେ ଭାରତୀୟ ସେନା ପ୍ରତି ଜବାବ ଦେଇଥିଲା ।
ପ୍ରତିରକ୍ଷା ମୁଖପାତ୍ର କହିଛନ୍ତି ଯେ, ବୁଧବାର ସନ୍ଧ୍ୟା ୭ଟା ୩୦ରେ ପାକ୍ ଅସ୍ତ୍ରବିରତି ଉଲଙ୍ଘନ କରିଥିଲା । ରଜୋରୀ ଓ ସୁନ୍ଦରବନୀ ସେକ୍ଟରରେ ପାକିସ୍ତାନ ତରଫରୁ ଗୁଳିଗୋଳା ମାଡ କରାଯାଇଥିଲା । ଭାରତୀୟ ସେନା ଏହାର ମୁହଁତୋଡ ଜବାବ ଦେଇଥିଲା ।
