ମାଲକାନଗିରି, ୦୫।୦୯: ପୁଣି ସୀମାନ୍ତରେ ରକ୍ତର ହୋଲି ଖେଳିଲା ଲାଲ ବାହିନୀ। ପୋଲିସ ଇନଫର୍ମର ସନ୍ଦେହରେ ୪ ଜଣ ଗ୍ରାମବାସୀଙ୍କୁ ହତ୍ୟା କରିଛନ୍ତି ମାଓବାଦୀ ।
ସୂଚନାନୁସାରେ, ମାଲକାନଗିରି ସୀମାନ୍ତ ଛତିଶଗଡ଼ ବିଜାପୁର ଜିଲ୍ଲା ଗାଁଗଲୁର ଥାନା ଅନ୍ତର୍ଗତ ମେଟାପାଲ ଓ ପୁସନାଲ ଗ୍ରାମର ୨୫ ଜଣ ଗ୍ରାମବାସୀଙ୍କୁ ମାଓବାଦୀ ଅପହରଣ କରି ନେଇଥିଲେ । ପରେ ପ୍ରଜାକୋର୍ଟ କରି ୪ ଜଣ ଗ୍ରାମବାସୀଙ୍କୁ ହତ୍ୟା କରିଛନ୍ତି । ଅନ୍ୟ ଗ୍ରାମବାସୀ ମଧ୍ୟ ଏବେସୁଦ୍ଧା ମାଓବାଦୀଙ୍କ କବଜାରେ ରହିଥିବା ଜଣା ପଡିଛି ।
ଖବର ପାଇବା ପରେ ବିଜାପୁର ପୋଲିସ ପକ୍ଷରୁ ଅପରେସନ ଜୋରଦାର କରାଯାଇଛି । ତେବେ ଗ୍ରାମବାସୀଙ୍କର ମୃତଦେହକୁ ଉଦ୍ଧାର କରା ଯାଇଛି । ସେମାନଙ୍କ ପରିବାର ଲୋକେ ମୃତକମାନଙ୍କୁ ଚିହ୍ନଟ କରିଛନ୍ତି । ଏବେ ମଧ୍ୟ ଅପରେସନ ଚାଲିଥିବା ନେଇ ସୂଚନା ଦେଇଛନ୍ତି ବିଜାପୁର ଏସପି କମାଲ ଲୋଚନ କାଶ୍ୟପ।
