ନୂଆଦିଲ୍ଲୀ ୧୩/୧୧: ଦିଲ୍ଲୀର ଅଲିପୁର ଅଞ୍ଚଳରେ ଥିବା ହୋଟେଲରୁ ଜଣେ ମହିଳା(୩୩)ଙ୍କ ହତ୍ୟା ଘଟଣା ସାମନାକୁ ଆସିଛି। ଏହି ଘଟଣାର ଅଭିଯୁକ୍ତ ହେଉଛି ମହିଳାଙ୍କ ବୟଫ୍ରେଣ୍ଡ।
ସୂଚନା ଅନୁଯାୟୀ ଖେରା କଲାନରେ ରହୁଥିବା ମହିଳା ତାଙ୍କ ବୟଫ୍ରେଣ୍ଡ ବିକ୍କି ମାନ(୨୧)ଙ୍କ ସହ ହୋଟେଲରେ ଜନ୍ମଦିନ ପାଳନ କରିବା ପାଇଁ ସୋମବାର ରହିଥିଲେ। ସୂଚନା ଅନୁଯାୟୀ, ଉଭୟଙ୍କ ମଧ୍ୟରେ ମଦ ପିଇବାକୁ ନେଇ ଝଗଡ଼ା ହୋଇଥିଲା।
ପୋଲିସଙ୍କ କହିବାନୁସାରେ ମଦ ପିଇବାକୁ ନେଇ ଆରମ୍ଭ ହୋଇଥିବା ଝଗଡ଼ାରେ ବିକ୍କି ମାନ ମହିଳାଙ୍କ ବେକରେ ଧାରୁଆ ଅସ୍ତ୍ରରେ ଆକ୍ରମଣ କରିଥିଲା। ମହିଳା ବେହୋଶ ହୋଇଯିବାରୁ ସେ ତାଙ୍କୁ ହୋଟେଲ ରୁମରେ ଛାଡ଼ି ଫେରାର ହୋଇଯାଇଥିଲା। ହୋଟେଲ୍ କର୍ମଚାରୀମାନେ ମହିଳାଙ୍କୁ ହସ୍ପିଟାଲରେ ଭର୍ତ୍ତି କରାଇଥିଲେ କିନ୍ତୁ ଡାକ୍ତରମାନେ ତାଙ୍କୁ ମୃତ ଘୋଷିତ କରିଥିଲେ।
ଅଭିଯୁକ୍ତ ବିରୋଧରେ ହତ୍ୟା ମାମଲା ରୁଜୁ କରାଯାଇ ତାକୁ ଗିରଫ କରାଯାଇଛି। ପଚରାଉଚୁରା ସମୟରେ ସେ ଭୁଲରେ ମହିଳାଙ୍କୁ ହତ୍ୟା କରିଥିବା କଥା ସ୍ବୀକାର କରିଛି।