ବାରାଣାସୀ ୧୫।୫: ଦେଶରେ କରୋନା ମହାମାରୀର ଦ୍ବିତୀୟ ଲହର ତାର କାୟା ବିସ୍ତାର କରିଚାଲିଛି । ଏହି ସମୟରେ ବିଭିନ୍ନ ସହରରେ ଥିବା ଡାକ୍ତରଖାନାରୁ ଅବହେଳାର ଖବର ମଧ୍ୟ ପ୍ରତିଦିନ ଶୁଣିବାକୁ ଏବଂ ଦେଖିବାକୁ ମିଳୁଛୁ । ଏବେ ଉତ୍ତରପ୍ରଦେଶର ସମସ୍ତ ସହରରେ ଥିବା ଡାକ୍ତରଖାନାରେ ବେଡ୍ ଏବଂ ଅମ୍ଳଜାନର ଅଭାବ ରହିଛି । ଏସବୁ ଭିତରେ ବାରାଣାସୀର ହୋମି ଭାବା କ୍ୟାନସର ହସ୍ପିଟାଲରୁ ଏକ ଭଲ ଖବର ଆସିଛି ।
କ୍ୟାନସର ହସ୍ପିଟାଲରେ ଭର୍ତ୍ତି ହୋଇଥିବା ୩ ବର୍ଷର ଶିଶୁ କରୋନାଙ୍କୁ ମାତ୍ ଦେଇଛି । ରକ୍ତ କର୍କଟ ରୋଗରେ ପୀଡିତ ଏହି ଶିଶୁ ୭ ଦିନ ପୂର୍ବରୁ ଡାକ୍ତରଖାନାକୁ ଆସିଥିଲା । ସେତେବେଳେ ତାଙ୍କୁ ବଞ୍ଚାଇବାର ସାମାନ୍ୟ ଆଶା ଥିଲା । ଡାକ୍ତରଖାନାରେ ଭର୍ତ୍ତି ହୋଇଥିବା ଅନ୍ୟ ରୋଗୀମାନେ ମଧ୍ୟ ତାଙ୍କୁ ଦେଖି ଆଶ୍ଚର୍ଯ୍ୟ ହୋଇଥିଲେ । କିନ୍ତୁ କ୍ୟାନସର ହସ୍ପିଟାଲର ଡାକ୍ତରଙ୍କ କଠିନ ପରିଶ୍ରମ ଯୋଗୁଁ ୩ ବର୍ଷ ବୟସରେ ରକ୍ତ କର୍କଟ ଭଳି ଗୁରୁତର ରୋଗ ଥିବା ସତ୍ତ୍ବେ ୭ ଦିନରେ କରୋନାକୁ ମାତ୍ ଦେଇଛି ଶିଶୁ ।
ଶିଶୁଟିର କରୋନା ରିପୋର୍ଟ ନେଗେଟିଭ୍ ଆସିଲା ପରେ ଡାକ୍ତରଖାନାର ଡାକ୍ତର ଏବଂ ନର୍ସମାନେ ଖୁସିରେ ନାଚି ଉଠିଥିଲେ । ହସ୍ପିଟାଲ ୱାର୍ଡରେ ପିପିଏ କିଟ୍ ପିନ୍ଧି ଡାକ୍ତର ଏବଂ ନର୍ସମାନେ ଆନନ୍ଦରେ ବୁଲୁଥିବାର ନଜର ଆସିଥିଲେ । ଡାକ୍ତର ଏବଂ ନର୍ସଙ୍କ ସହ ୩ ବର୍ଷର ଶିଶୁ ଏବଂ ୱାର୍ଡରେ ଭର୍ତ୍ତି ହୋଇଥିବା ଅନ୍ୟ ରୋଗୀ ମଧ୍ୟ କରତାଳି ଦେଉଥିବା ନଜର ଆସିଥିଲେ ।
