Prameya News7

Prameya News7, News7 Odia, Odisha Latest News, Odisha Current Headlines, Odisha News Online

ପ୍ରମୁଖ ଖବର
  • ୨୫ ବର୍ଷ ପରେ ଦୁର୍ଲଭ ନାଗାର୍ଜୁନ ବେଶରେ ସଜେଇ ହେବେ ଶ୍ରୀଜିଉ, ଆରମ୍ଭ ହେଲା ପ୍ରସ୍ତୁତି
  • ||
  • କୋଇଲା ଖଣି ଆବଣ୍ଟନ ଦୁର୍ନୀତି ମାମଲାରେ ପୂର୍ବତନ କେନ୍ଦ୍ର ମନ୍ତ୍ରୀ ଦିଲ୍ଲୀପ ରାୟଙ୍କୁ ମିଳିଲା ଜାମିନ
  • ||
  • ମାଲକାନଗିରି : ମାଟି ତଳୁ ବିପୁଳ ପରିମାଣର ଅସ୍ତ୍ରଶସ୍ତ୍ର ସହ ବିସ୍ଫୋରକ ସାମଗ୍ରୀ ଜବତ
  • ||
  • ରାଜନଗର : ଭୋଗ ଖାଇ ୧୫୦ ଅସୁସ୍ଥ, ୩୦ ଜଣଙ୍କ ଅବସ୍ଥା ଗୁରୁତର
  • ||
  • ପାରାଦୀପ : ସମୁଦ୍ରରେ ବୁଡିଗଲା ମାଛଧରା ଟ୍ରଲର, ୫ ମତ୍ସ୍ୟଜୀବୀ ଉଦ୍ଧାର, ୪ ନିଖୋଜ
  • ||
  • ରାଜ୍ୟରେ ଆଉ ୧୪ କରୋନା ସଂକ୍ରମିତଙ୍କ ମୃତ୍ୟୁ
  • ||
  • ରାଜ୍ୟରେ ଆଉ ୧୪୮୦କରୋନା ସଂକ୍ରମିତ ଚିହ୍ନଟ
  • ||
  • ଟ୍ରେନ୍‌ରେ କଟି ବାପା-ଝିଅ-ପୁଅର ମୃତ୍ୟୁ, ଆତ୍ମହତ୍ୟା ସନ୍ଦେହ
  • ||
  • ବାଇକ୍‌କୁ ଧକ୍କାଦେଲା ହାଇଓ୍ୱା ଟ୍ରକ, ଆରୋହୀ ମୃତ
  • ||

ଗୁଣ୍ଡିଚା ମନ୍ଦିରରେ ଲାଗିଲା ତିନି ରଥ, ସଂଧ୍ୟା ୫.୪୫ରେ ଲାଗିଥିଲା ତାଳଧ୍ବଜ, ୬.୪୦ରେ ପହଞ୍ଚିଲା ନନ୍ଦିଘୋଷ

4/07/2019 at 7:21 PM

ବଡ଼ଦାଣ୍ଡେ ଗଡ଼ିଲା ନନ୍ଦିଘୋଷ ।  ଏଥର ନିର୍ଦ୍ଧାରିତ ସମୟର ଢ଼େର୍‌ ପୂର୍ବରୁ ବଡ଼ଦାଣ୍ଡରେ ଗଡ଼ିଛନ୍ତି ୩ରଥ ।  ରଥଟଣା ପାଇଁ ଅପରାହ୍ଣ ୪ଟାକୁ କଣ୍ଟ ରଖିଥିଲା ପ୍ରଶାସନ । ହେଲେ ଦିନ ୨ଟା ୧୫ରୁ ଆରମ୍ଭ ହୋଇଥିଲା ରଥ ଟଣା । ପ୍ରଥମେ ବଡ଼ଭାଇ ବଳଭଦ୍ରଙ୍କ ତାଳଧ୍ବଜ ରଥ ଟଣା ହୋଇଥିବା ବେଳେ ପରେ ପରେ ଗଡ଼ିଥିଲା ଦେବୀ ସୁଭଦ୍ରାଙ୍କ ଦର୍ପଦଳନ ରଥ । ଆଉ ଶେଷରେ କାଳିଆ ସାଆନ୍ତଙ୍କ ନନ୍ଦିଘୋଷ ରଥକୁ ଅତି ଆନନ୍ଦରେ ଟାଣିନେଇଥିଲେ ଭକ୍ତ । ତାଳଧ୍ବଜ ରଥ ୫ଟା ୪୦ରେ ଗୁଣ୍ଡିଚା ମନ୍ଦିର ନିକଟରେ ଲାଗିଥିବାବେଳେ ନନ୍ଦିଘୋଷ ରଥ ଲାଗିଥିଲା ୬ଟା ୪୦ମିନିଟ ବେଳେ ।

ଆଜି ବଡ଼ଦାଣ୍ଡରେ ଭକ୍ତ ଓ ଭଗବାନଙ୍କ ମିଳନର ଅପୂର୍ବ ଦୃଶ୍ୟକୁ ଦେଖୁଥିଲା ସାରା ଜଗତ ।  ୧୫ଦିନ କାଳ ଅନବସରରେ ରହିଥିବା ମହାପ୍ରଭୁ ଭକ୍ତ ଠାରୁ ଦୂରେଇ ରହିବାର ଦୁଃଖକୁ ଆଉ ସମ୍ଭାଳିପାରୁନଥିଲେ । ସେଇଥିପାଇଁ ତ ପ୍ରଶାସନର ନୀତି ନିର୍ଘଣ୍ଟକୁ ଅପେକ୍ଷା ନକରି ଖେଚୁଡ଼ି ମୁଠାଏ ଖାଇ ସଅଳ ସଅଳ ବାହାରିପଡ଼ିଥିଲେ ବଡ଼ଦାଣ୍ଡକୁ ।  ପରମ୍ପରା ମୁତାବକ ଧାଡ଼ି ପହଣ୍ଡିରେ ଶ୍ରୀମନ୍ଦିରରୁ ବାହାରିଥିଲେ ଚତୁର୍ଦ୍ଧାମୂରତି । 

ପ୍ରଥମେ ହୋଇଥିଲା ଚକ୍ରରାଜ ସୁଦର୍ଶନଙ୍କ ପହଣ୍ଡି । ତାଙ୍କ ପଛକୁ ପହଣ୍ଡି ହୋଇଥିଲେ ବଡ଼ ଠାକୁର ବଳଭଦ୍ର ମହାପ୍ରଭୁ ।  ତାଳଧ୍ବଜ ରଥର ଚାରମାଳ ଉପରକୁ ବଡ଼ ଠାକୁର ଉଠିବା ବେଳକୁ ସିଂହଦ୍ବାର ସାମ୍ନାରେ ପହଞ୍ଚିଯାଇଥିଲେ କାମ୍ପିଲ୍ୟବାସିନୀ ଦେବୀ ସୁଭଦ୍ରା ।  ସେତେବେଳକୁ ୨୨ପାହାଚ ଉପରୁ ଟାହିଆ ହଲାଇ ଚକାଚକା ଆଖିରେ ତାଙ୍କ ଭକ୍ତଙ୍କୁ ନିରେଖି ଦେଖୁଥିଲେ ଚକାନୟନ ।

କେତେବେଳେ ଝପଟି ଆସୁଥିଲେ ତ କେତେବେଳେ ଟିକେ ଅଟକି ଯାଇ ବୁଲି ବୁଲି ଦେଖୁଥିଲେ ତାଙ୍କ ଭକ୍ତମାନଙ୍କୁ ।  କିଏ କିଏ ଆସିଛନ୍ତି, ଆଉ କେହି କେଉଁଠି ଅଟକି ଯାଇନି ତ । ଏପଟେ କାଳିଆ ଠାକୁରଙ୍କ ଛେଚାକଚା ପହଣ୍ଡି ଦର୍ଶନ କରି ଭକ୍ତର ମନ ବି ଭକ୍ତିରେ ଭିଜି ଯାଉଥିଲା । ଆଖିରୁ ଝରିପଡ଼ୁଥିଲା ଆନନ୍ଦାଶ୍ରୁ । ଏତେ ଦିନ ପରେ ମହାପ୍ରଭୁଙ୍କୁ ପାଖରେ ପାଇ ମନ ଭିତରେ ସବୁ ଅଳି ଅର୍ଦ୍ଦଳୀ ଜଣାଇବାକୁ ଯେମିତି ଭକ୍ତର ମନ ଅଥୟ ହୋଇପଡ଼ୁଥିଲା ।

ସେପଟେ ଭକ୍ତର ସବୁ ମିନତୀକୁ ଯେମିତି ମୁଣ୍ଡ ହଲାଇ ଶୁଣୁଥିଲେ ମହାପ୍ରଭୁ ।  ଭକ୍ତ ଆଉ ଭଗବାନଙ୍କ ଭିତରେ ସମ୍ପର୍କର ଏହି ଦୁର୍ଲଭ ମୁହୁର୍ତ୍ତକୁ ଯିଏ ଦେଖିଛି ସେ ହିଁ ବୁଝିବ ବିଶ୍ବନିୟନ୍ତାଙ୍କ ଏହି ମାନବୀୟ ଲୀଳା କେତେ ମହାନ୍‌ । ଜାତି ଧର୍ମ ବର୍ଣ୍ଣ ନିର୍ବିଶେଷରେ ସମସ୍ତଙ୍କୁ ଦର୍ଶନ ଦେବାକୁ ବର୍ଷରେ ଗୋଟିଏ ଥର ବଡ଼ଦାଣ୍ଡକୁ ଓହ୍ଲାଇ ଆସନ୍ତି ସ୍ବୟଂ ଜଗନ୍ନାଥ । ସେଇଥିପାଇଁ ତ ସେ ଜଗତ ଠାକୁର । 

ଦାସିଆ ବାଉରି ହାତରୁ ନଡ଼ିଆ ନେଇ, ଭକ୍ତ ସାଲବେଗ ପାଇଁ ଅଟକି ଯାଇ କାହିଁ କେତେ ପ୍ରମାଣ ଦେଇସାରିଛନ୍ତି ଏହି ଭକ୍ତବତ୍ସଳ ଭଗବାନ ।  ସେପଟେ ଆଜି ପ୍ରଶାସନର ସବୁ ନିର୍ଘଣ୍ଟକୁ ପଛରେ ପକାଇ ଠାକୁରଙ୍କ ସବୁ ନୀତି ସଅଳ ସଅଳ ସାରିବାରେ ବ୍ୟସ୍ତ ଥାଆନ୍ତି ସେବାୟତ ।  ଚତୁର୍ଦ୍ଧାମୂରତି ରଥାରୁଢ଼ ହେବା ପରେ ପରମ୍ପରା ଅନୁସାରେ ଆଦିଗୁରୁ ଶଙ୍କରାଚାର୍ଯ୍ୟ ପହଞ୍ଚିଥିଲେ ବଡ଼ଦାଣ୍ଡରେ । ରଥରେ ଶ୍ରୀଜିଉଙ୍କୁ ଦର୍ଶନ କରିଥିଲେ ଜଗତ୍‌ଗୁରୁ । 

ଏହା ପରେ ରଥରେ ଛେରାପହଁରା କରିବାକୁ ଆସିଥିଲେ ମହାପ୍ରଭୁଙ୍କ ଆଦ୍ୟ  ସେବକ ଗଜପତି ମହାରାଜ୍‌ । ପ୍ରଥମେ ବଡ଼ ଠାକୁର ତାଳଧ୍ବଜ, ପରେ ଦେବୀ ସୁଭଦ୍ରାଙ୍କ ଦର୍ପଦଳନ ଓ ଶେଷରେ ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥରେ ପବିତ୍ର ଜଳ ସିଞ୍ଚନ ଏବଂ ଆଳତୀ କରିବା ପରେ ସୁନାର ଝାଡ଼ୁରେ ଛେରାପହଁରା କରିଥିଲେ ଗଜପତି । 

ଏହାପରେ ଦିନ ପ୍ରାୟ ୨ଟା ୧୫ବେଳକୁ ଆରମ୍ଭ ହୋଇଥିଲା ରଥଟଣା । ଘଣ୍ଟଘଣ୍ଟା, କାହାଳୀ ମର୍ଦ୍ଦଳର ଶବ୍ଦରେ ଫାଟି ପଡ଼ୁଥିଲା ବଡ଼ଦାଣ୍ଡ ।  ଲୋକାରଣ୍ୟ ହୋଇପଡ଼ିଥିଲା ସାରା ଶ୍ରୀକ୍ଷେତ୍ର । ବିଶ୍ବ ନିୟନ୍ତାଙ୍କ ବିଶ୍ବ ପ୍ରସିଦ୍ଧ ରଥଯାତ୍ରା ।  ଦେଶ ବିଦେଶରୁ ଅସଂଖ୍ୟ ଭକ୍ତ ବଡ଼ଦାଣ୍ଡରେ ମହାପ୍ରଭୁଙ୍କ ଘୋଷଯାତ୍ରାରେ ସାମିଲ ହୋଇ ନିଜକୁ ଧନ୍ୟ ମଣୁଥିଲେ । 

   Related Posts